November 19: Faizong (Cherry) phuntu pastor VB Lian thawn camkhat – Chinram, Falam khawpi ih hminsinnak hmunhma pakhat in hmuhaw in ti sehla, Lai tong in Faizong tiih kawhmi Cherry kung mawi zetih par mawi zet khi ka lo hmuh ko ding. Tui hlan kum 6 hrawng ihsin pastor pakhat in Falam ram hmun dangdang ah Faizong kung a rak phun. Pastor in bulpak dinhmun in ziangtin Faizong a rak phun thawk ti le harsatnak a tawnmi pawl, hmailam a tumtahmi thawn pehparin pastor cu a tuvekin kan suhmi a si.
Q : Ziangmi hrangah Faizong na rak phun?
A : Falam khawpi le ram mawitertu dingah, ramsung ramleng mikhual in Faizong par can ah an ra dingih hotel, rawl dawr, dawr dangdang, sumlut ngah ding. Mipi cawlh le lennak hmun nuam si dingah (tu tiang hivek hmun kan nei hrih lo).
Faizong kung hi a par zik hi thla khat hnih lawng a-hnah a tlak, cu lo sung hmuahhmuah thla 10 zikte a-hnah a hring ringring ih khua le ram a mawiter, kiangkap (environment) kilkhawinak hrang khal a bawm zet. Faizong par pawl khi Khuai in an zuk ruangah khuai vulh a theih ding.
Q: Zo le pawl thawn nan rak phun? Cemliam mi budget ziangtin nan tawlrel?
A : A thok, Kum 2017 ahcun keimah lawng in ka phun. Lehhnu ah mino pawl hlawh phalh in ka cing thawk. A thawk ahcun keimah te sumpai in ka phun. Neta ahcun ramsung ramleng in kyats ting 15 lai in bawm. Asinan keimah bulpak thawhmi a tam sawn.
Q: Falam peng khuitawk pawl ah nan cing? Kung ziat nan cing thei?
A : Lungpi veng tlun ih Tlangzim parah (hlan ahcun thing tumpipi an um nain Apple cinnak ah an rak hau dah ih a kawlh theh), Falam – Lungpi zinpi kap, Rihzin tluan, Falam – C. Zamual (Falam-Kalay zinpi kap), Zalai – Laizo lak ih tlang parah, Zalai veng tlun tlang parah, Falam -Hakha zinpi tlun tlang zim pawlah kan rak phun.
Kum 2017 in 2021 tiang kum khat ah kung 500-1000 karlak kan phun ringring. A zatein Kung 4000- 5000 karlak cu kan rak phun.
Q: Faizong kung in boruak thlakthlengawk (Climate Changte) ah a tangkai maw?
A : Thal caan ah a-hnah a hring ringring ih daihnem mi a pe. Minung ih kan tulmi Oxygen a suahpi. Ruah ti kha lei parah direct tla lo in a kham in Leimin, Lihong ti pawl a kham.
Q: Faizong kung phun ih hlawknak rah pawl?
A : Minung pawl nawmnak a pe; hmunkhat ah kung 5 umnak tivek a um lo ruangah hmun khat ah kung 500 lai kan phun tikah cun lenvahnak a si. Zuk mawi, video zuknak hrang hmun remcang a si. Ramsung ramleng khualtlawng mikhual pawl an rat theinak hmun a si dingih sum lak luh a theih ding. Chin nunphung thilri le Chin thuam pawl kim zetih kan zuar theinak hmun a si thei. Faizong kung rinsan in khuai vulh in sumpai lakluhnak pakhat a si thei.
Q: Faizong hi a thang cakmi kung a si maw? Ziangvek teuh ha a si?
A : Leivawr parih cinmi cu kum 3 ah Pi 5-10 lak cu an thang thei. Asinan tuih kan cinnak tam sawn cu zanthing malnak, leilung siatnak Tlang zim, a dai tuknak hmun tivek ah a si ih kum 3 ah pi 3-5 tluk lawng an thang.
Q: Faizong kung na phunnak ah harsatnak na tonmi pawl?
A : Kan phunnak hmun hi zinkap a si ih Leivawr duhduh in an hlawn ih an thi cingcing. Me rawl ah an lak theu. Sia le Caw in an ei. Sia cun a kung ban tiatia tla an hngawng in an rawt ih an ei. Thal ah meisa in a kaang ringring ih mei lam sial kan tuah thei theh lo. Lamzin in tlang zimih kan phurhnak hi furlong 3-8 lai a si ih thingfa an siat duh zet. Motor san ding a um theu lo ih motor cycle in kan phurh tikah Kung 20-30 tiang lawng an phur thei ih Kung khat ah Ks. 1000 lai a cem.
Q : Boruak thlakthlengawk (climate change) thawn pehpar in kan kiangkap leilung, khua le ram pawl kilkhawi a tul zia na hmuh dan?
A : Kan kiangkap boruak hi kilkhawi a tulzet. Thal tintein ram meisa a kaang ringring ih curcik kharbok, ramsa tinkim tampi an thi. Lo an ur ih mei lam sialnak an tuah lo ruangah ram a kaang cih.
Kan kiangkap boruak kan kilkhawi lole, ruahti a mal vivo ding, can hman in ruah a sur nawn lo vivo, thal can ah Falam khaw sung rori tla a sa tuk zo. Leimin a tam vivo tivek pawl a si tikah kan kilkhawi a tul zet.
Q: Faizong thawn pehpar in saduhthahmi le tumtahmi pawl?
A: Kan ram hi Faizong parmawi thawn thuam ding. Mipi lenvahnak hmun ah tuah ding. Ramsung ramleng mikhual pawl ra lennak hmun si ding. Tourist pawl hnenin sumpai ngah thei ding. Lai thilri thansoh ter ding. Faizong kung in Chin ram hring mawi ter ih, thingkung, pangpar cingin kan kiangkap boruak kilkhawinak ah zohthim tlak si ding le Faizong par can ah khuai vulh ih sumpai lakluh thei ding ka tumtah.
Pastor pa ih Faizong a phunnak cu sunlawih in Falam hrambun Chinland Herald media cun a hmin ah “Salai Faizong Bawi” tiin an rak sak.
Leave a Reply