AA In Ramleng Pompi An Phut – AA cun September 19 ni ah media komnak an nei ih, cumi ahcun ramleng in AA an pom veten Bangladesh ih tlan Rohingya pawl kan ko tlung thluhsal ding tin an sim.
Ralhrang cun 2017 kum ah Rakhine ramkulh sungin Buti Taung myone le Maungtaw myone sungih Rohingya pawl an rak that ciamco ih, cumi ruangah Rohingya mi tamzet cu Bangladesh lamah an rak tlan. Tu ah Bangladesh cun an ram sungah Rohingya pawl umter an siang nawn lo ih, Myanmar kuat tlung rori an rak tum ve.
AA cun “Rohingya pawl buaiknak tifel dingah a hmaisabik ahcun Bangladesh le ramleng pawlin AA in cohlan hmaisa a tul. Bangladesh , UN le leitlun ram picang pawlin AA in pom veten kannih cun Rohingya pawl Rakhine ramkulh sungah kan ko kirsal ding.
“Tufang ih kannih AA tummi cu ramleng le UN ih pommi si thei dingin kan zuam rero. Cucu, politics lamih kan tummi a si. Leihnuai ahcun nasaten ralhrang ralkap thawn kan doaw. Doawknak a sosan tikah ralhrang pawl cu kan hnenah an pe aw rero. Kan doawk hlanih pe aw khal an um nan, ralhrang thawn kan doawk hnuah kan hnenih ralhrang pawl pe aw an tam deuhdeuh ih, za tlun cu an si ding,” tin media an simthei.
Ralhrang In Matupi AH Man Olten Thil An Zuar – Ralhrang ralkap cun Chin ramkulh Hakha khawpi , Falam khawpi le Tedim khawpi pawlih man olten thil an zuar hnuah Chin ramkulh Matupi khawpi khalah man olten thil an zuar peh ih, Matupi ahcun danglam zetin dawr tuahtu pawlin an lei ciamco tin an sim.
Hakha, Falam le Tedim pawl ahcun ralhrang in man olten thil an zuarmi cu reilote sungah mipi in an lei cem thluh. Matupi ahcun dawr tuahtu pawlin an lei ciamco tin an sim.
Khuami pakhat cun “Matupi ahcun a leng thilri man thawn a thlau aw tuk zo. Thawng 2 hrawngin a thlau aw. Eiin phunphun an zuar ih, an zuarnak kiangkap cu ralhrang ralkap le palik in an kil thepthep thluh. Mipi lamin an lei tam tuk man hlanah dawr tuah pawlin zamrangten an lei lohli ih, an cem lohli. Dawr tuah pawl cun man tamsawn in mipi hnenah an zuarsal ko ding.
“Thuhla kan theih dan vek asile Chin ramkulh lawngah a silo, ramthen le ramkulh dang khalah ralhrang in mipi tlonnak ah man olten thil an zuar vivo. Nitin le an zuar thei fawn lo. An duh asile nitin zuar lawlaw hai sehla. Chin ramkulh sungin peng dang khal an feh vivo ko ding,” tin a sim.
Kalay GTC Kotah Ralhrang Bomb An Puah – Sagaing ramthen Kalaymyo thlanglam GTC tlawng kotih um ralhrang ralkap pawl cu September 19 sun ah Kalay pDF pawlin bomb an puah tin an sim.
Sun nazi 12 hrawngah ralhrang pawl Check Gate kiltu an thlengaw ih, cumi laifang ah Kalay PDF cun bomb an rak puah. Bomb puak ruangah ralhrang pawl cun minute 30 hrawng kiangkap an kap ciamco phah.
Kalay PDF cun “GTC kotih duty ralhrang pawl an thlengawk laifang ah bomb pahnih in kan puah ih,kannih PDF pawl cu himdamten dung kan sip hngal. Ralhrang pawl cun duhtawkin kiangkap an kap ciamco. Bomb kan puahmi ruangah ralhrang thi an um thei nan, a zat kan fiah thei lo a si,” tin thu an suah.
Ralhrang ralkap in rampi thuneihnak an lak hnuah Kalay peng sungih cangvai dingin ralhrang pawl cu GTC tlawngah umhmun an khuar ringring ih, tu khalah ralhrang pawl GTC tlawnginn sungah an umlai tin kiangkap mipi cun an sim.
Falam Ah Covid 19 Nat Nei 5 An Hmu – Chin ramkulh Falam khawpi ih pituh sizung ah covid 19 nat nei mi 5 kan tuamhlawm rero lai tin Falam sizung ih hnatuan sibawi Tluang Cung Thang cun mipi theihternak a nei.
Kan dung khalah Myanmar harhdamnak zung cun kalay ah Covid 19 nat nei pahnih an hmuh thu le Tedim ah Covid 19 nat nei 3 an hmuh thu an rak than zo. Hivek ruangah mipi cu daithlang lo dingin theither an si.
Falam ih um pakhat cun “Falam ah covid 19 nat nei 5 an tuamhlawm rero tin kan thei ih, mipi kan fimkhur thiam a tul ding. Culo ih kan thlahdah aw men asile kan buai thluh ding. Ran buai le harsat thawn cozah lam bawmtu ding an um lo ding tikah mipi kanmahten fimkhur thiam ding kan si,” tin a sim.
Ralhrang Mawtaw An Kap Ih ,Ralthuam An Laksak – Mandalay ramthen Thabeikkyin myone Chuangkyi khua kiangah Thabeikkyin PDF cun ralhrang mawtaw an kap ih, ralhrang bawi telin ralhrang 3 an thih tlunah an ralthuam pawl an laksak thei thu an pholang.
Thabeikkyin PDF cun “Zanlam nazi 5:30 hrawngah Chuangkyi kiangah feh ralhrang mawtaw pakhat cu naiten kan kap ciamco ih, ralbawi telin a sungih to ralhrang 3 an thi. Ralhrang mawtaw cun MA3 zunhnih, MA1 zunkhat, cerek bawm 413 ,bomb 8 le thildang neuhneuh pawl kan la.
“Ralthuam kan lakmi lakin MA3 zunkhat le MA1 zunkhat cu mawtaw sungih ralhrang pawl kan kah ciamconak ah kan rak kap siat ngah pang.September 19. zinglam nazi 7:30 hrawng khalah ralhrang mataw bomb kan puah betih, hriamhma ngah tampi an um tin thuhla felfai kan thei zo a si,” tin thu an suah.
Doawknak Ah PDF 2 An Thi – Shan le kayah ramri ih um Moebe khawpi ah ralhrang ralkap le mipi ralkap komkhawm pawl an do awsal ih, ralhrang in duhtawkin ralthuampi an kah ciamco ruangah PDF 2 an thi.
Kan dungah ralhrang ralkap pawl cun Moebe khua an rak suahsan nan, September 19 , zinglam nazi 10 hrawngah ralhrang ralkap cun hmun 2 in Moebe khua an luhcilh sal ih, mipi ralkap komkhawm thawn an do aw ciamco.
Doawknak ah a sosan tikah Loikaw le Phekung ih um ralhrang hmunpi cun duhtawk in ralthuampi an kap ciamco ih, Moebe PDF sungin mi pahnih a tlak ngah ih, an nunnak a cem. PDF dang 5 khal hriamhma an ngah tin Moebe PDF cun thu an suah.
Doawknak ah ralhrang ralkap lam khal thi an um rori nan, a zat an fiah thei hrih lo. Ralhrang pawl cu Moebe khua an luhcilh hnuah phungki tlawng le Biakinn sungah umhmun an khuarsal. Khua sung an luh theinak dingah ralhrang ralkap pawl cun mipi 100 hrawng an kai ih, ralphaw ah an hmang tin PDF lam cun an sim.
Leave a Reply