India ram cozah dinglai BJP palai Sharma in Muslim puithiam Muhammad thuhla nautat zetih a rel ruangah leitlun Muslim ram pawl an lungawi lo zetih India ramsung khalah lamzawhnak tiang an neih phah.
Ahleice in BJP palai ih thurelmi ruangah Al Qaida pawlkom cun India ram sung Gujarat , UP le Bombai pawl ah bomb kan puah ding tin thu an suah. Kan puithiam an relsiat ruangah phuba kan la tengteng dingih, midang khal kan puithiam hrang phuba la dingin kan lo sawm tin thu an suah.
BJP palai Sharma cun TV Debate ah Muslim puithiam a relsia ih, a nautat. Cumi ruangah India ram sungih um Muslim pawl siseh leitlun Muslim pawl khal BJP party parah an thinheng.
Hivek ruangah BJP party khalin an party palai cu a hna in an cawlhter hrih sung thu mipi an simthei ve. Culawng siloin BJP cun ziang biaknak khal nautat zawngin kan tongsan nawn lo dingih, biaknak lamhoi zawng hrimhrim kan palai pawlin relsuak nawn lo dingin kan kham thluh an ti.
Asinan, mipi cun BJP ih thusuah cu an zum theilo ih, a takin hremnak an pe cuang lo ding an ti. Muslim puithiam relsetu cu a takin hremnak pek siseh tin mipi cun aupi. BJP in ngaithiam an dil hnuah le biaknak lam an tong nawn lo ding thu an sim hnuah Al Quida pawl an lungkim pei maw timi cu theih a silo. Tu ahcun India mipi pawl cu fimkhur ten um dingin theihter an si ih, mipi tamnak hmun hrial dingin theihter an si.
China In Ramleng Ah Thupten Ralkap Hmun An Sak – China cun an ralkap pawl hman dingin thupten Combodia ramsung tipi kap ah ralkap hmun an sak rero ih, leitlun hmun tinkim ah a tul dan vekin an ralkap kuat theinak hmun dingin an tum.
China in thupten ralkap hmunpi an saknak hmun cu Thailand tipi kap Combodia ramsung hmun pakhat a si. Himi hlanah China cun Africa saklam Djibouti ah ralkap hmunpi an rak nei zo.
China in Combodia ramsung ih an sakmi ralkap hmunpi cu ralkap lawng tam tuk um thei dingin an tumih, leitlun uk vivo an tumnak pakhat ah hman an tum tin zingzoitu pawl cun an sim. Hivek in China in ramdang ih ralkap hmunpi an neih theinak ah ramdang pawl cu thupten remnak an tuahpi vivo tin zingzoitu pawl cun an sim.
Leave a Reply