Hakha Ah An Kap Awsal – Chin ramkulh Hakha khawpi in Thantlang khawpi fehnak lamzin Lungkhar khua kiangkap hrawngah mipi cun August 1, zanlam nazi 4 in nazi 5 tiang puak awn phunphun an thei.
Hakha ih um pakhat cun “July 30 ah Chin ralkap komkhawm le ralhrang ralkap pawl cu Hakha le Thantlang karlak ah an rak kap aw zo. Cumi hnu August 1 ah ralhrang ralkap le Chin ralkap komkhawm pawl cu Hakha le Thantlang karlak ah kap aw sal.
“Kannih kiangkap ih um pawl cun meithal puak aw, bomb puak awn le ralthuampi puak awn pawl kan thei. Ralhrang pawl timit lilawn tumtahnak an neih tikah Chin ralkap lamin rem an tilo ih, lamzin an bawh. Cutikah ni 2 an kap aw thlang a si,” tin a sim.
Ralhrang ralkap le Chin ralkap komkhawm pawl cu Hakha le Thantlang karlak ah vei 2 an do aw thlang nan, ralhrang thih thu ah mipi ralkap lam cun felfai in thusuahmi an nei hrih lo.
ASEAn Meeting Ah Ralhrang Palai Tel Lo – ASEAN pawlkom sungin ramdang vuanci palai pawl cu tui zarh sung meeting nei ding an si ih,July 31 ah meeting an rak thok zo. August 6 tiang meeting nei ding an si.
Meeting ahcun ASEAN sungtel lakin ramdang vuanci palai pawl sawm thluh an sinan, ralhrang ramdang vuanci cu an sawm duh lo. ASEAN cun ralhrang palai an sawm lo ruangah mipi lamin palai pakhat nan thlah thei tin ralhrang an sim thei nan, ralhrang cun anmai sung lo c meeting ah zohman an thlah duh lo.
Curuangah ASEAN ramdang palai pawl meeting an tuahmi ahcun Myanmar ram dinhmun ah totu zohman an um lo ih, a lawng.
Ralhrang in dothlengnak ruangih an kaihmi mi 4 pawl an thlaithat ruangah ASEAN pawlkompi cu ralhrang parah an lungawi lo tukih, Malaysia cun ralhrang palai hrimhrim cu ASEAN meeting ah sawm lo hrimhrim dingin thu an bur.
Japan In Ralhrang Ca An Kuat – Yangon ih Japan mino kaih a si thu ah Japan cozah cun ralhrang ca an kuatih, an kaihmi Japan mino thlah zalen sal dingin an theihter.
Japan mino pakhat Toru ( kum 25 ) cu July 30 ah ralhrang ralkap pawlin an kai ih, ralhrang mihremnak hmunah an khum. Japan mino rualin ralhrang ralkap cun mino dang pathum khal an kai tel ih, annih pawl khal thlah zalen an si hrih lo. Mino dang pathum pawl cu ralhrang uknak dokalhtu an si ih, Japan mino cu Journalist pakhat a si.
Japan cozah cun ralhrang hnenah “Myanmar ram thuneitu pawlin a rang thei bikin Japan mino an kaihmi thlah zalen dingah kan dil. A luat theinak dingah Myanmar ih Japan Embassy khalin theitawk an suah rero zo a si,” tin mipi an simthei.
Ralhrang ralkap cun ziangruangah Japan mino Toru an kai timi a san an phuang hrih lo. 2021, April thla khalah ralhrang ralkap cun Japan thuthanglatu pakhat an rak kai zo ih, cumi ahcun thuthang dik lo a thlah ruangah tin an sim. Hmaisa ih Japan thuthanglatu an kaihmi cu ralhrang in thla khat hnuah an suah zalen ih, Japan ah an rak kuat.
Tu ah Japan mino Joru cu ralhrang uknak dokalhtu pawl video ih a lak ruangah kaih a si ih, ralhrang pawlin Japan cozah dilnak ngai poimawh in an thlah lohli pei maw timi cu theih a si hrih lo.
Ralhrang In Pyu Saw htee Pawl Ralthuam An Pe – Ralhang ralkap cun Pyu Saw Htee an um lo tin an el rero nan, Pyu Saw Htee an um rori ko tin mipi ralkap lam cun an sim.
Ralhrang ralkap cun July thlacem zawng khalah Pyu Saw Htee hotu hnenah ralthuam an rak pe. Pyu Saw Htee pawl cu Sagaing ramthen sungah luarkai tukin an cangvai tin mipi lam cun an sim.
Sagaing PDF hotu cun “Ralrang in Pyu Saw htee kan nei lo an ti nan, Sagaing ramthen sung ahcun Pyu Saw Htee taktak an tam. Ahleicein Kanbilu, Tanse le Kyuanhla pawl ah ralhrang lamtang Pyu Saw Htee an tam.
“Pyu Saw Htee pawl cu ralhrang hnenin ralthuam an ngah ih, ralhrang thawn kan doawk caan ah ralhrang lamah an ttang. Ralhrang cun hmin an pe lo khal a si thei,asinan ralhrang lamtang Pyu Saw Htee an si ih, ralhrang pawl khalin ralhtuam an pe. Cucu, felfai zetih kan hmuhmi le theihmi a si,” tin a sim.
Ralhrang ralkap cun Pyu Saw Htee kan nei lo, mipi kiltu lawng din rori kan tum ko tin an rel bangin dankalh ih cangvai ciamco Pyu Saw Htee pawl cu mipi kiltu ralkap ah hman an tum tin thunetabik a suak.
Ralhrang Mawtaw 2 An Puah Siat – Sagaing ramthen Sagaing khawpi ih penguk zung le sipin zung cu August 1, sun nazi 2:15 hrawngah mipi ralkap lam cun Drone in bomb an thlak ih, penguk zung le sipin zung a kang phah tlunah mawtaw pahnih a siat tin ralhrang cun thu an suah.
Sagaing ih um pakhat cun “A dik ko, tuini ah penguk zung le Sipin zungah bomb a puak. Bomb puak ruangah zung a kang phah ih, ralhrang mawtaw pahnih khal a kang siat thluh. Sipin zung hnanin ralrhang penguk zung an kang nasa sawn. Penguk zung le Sipin zung bomb puak ah mithi an um maw timi cu felfai in kan thei lo a si,” tin a sim.
Sagaing PDF cun “Ralhrang penguk zung le sipin zung bomb kan puahmi ah thu felfai kan dong thei hrih lo nan, anmah ralhrang lamin penguk zung le sipin zung a kang thu mipi theihternak an nei. Bomb kan puahmi cun ralhrang mawtaw pahnih khal a tlaksiat thluh ih, ralhrang thi khal an um rori ding a si,” tin a sim.
Sakhan Cuhawknak Ah Ralhrang 12 An Thi – Mandalay ramthen Tharsi myone Miat-kha-in’ khua kiangih PDF ralthuam tuahnak sakhan cu Ralhrang ralkap in lak tumin an do ih, sakhan cuh aw doawknak ah ralhrang 12 an thi tin Tharsi PDF cun mipi theihternak an nei.
Tharsi PDF cun “Ralhrang mipum 20 hrawng an si ih, kan sakhan lak tumin ni 2 in do. Nikhatnak ah ralhrang pawlin kan sakhan in nam ih, nasaten kan do aw. Doawknak ah ralhrang 2 an thi man ih, kan himnak hrang kan sakhan kan suansan thluh. Curuangah ralhrang ralkap cun kan sakhan sungin ralthuam tuahnak thilri le ralthuam hrekkhat in laksak.
“Sakhan kan suahsan hnuah kan sakhan dinhmun kan thlir cih ih, ralhrang ralkap pawl kan sakhan sungih an luh veten kan kamciami bomb pawl kan puakter. Bomb kan puahmi ah ralhrang 10 an thi ih, hriamhma ngah tampi an um. Kannih lamin miraltha pakhat a hlo ih, tuini tiang kan pehtlaih thei hrih lo a si,” tin a sim.
Leave a Reply