Tender Thu Ah Mindat Mipi Uktu Thu An Thleng – Mindat mipi uktu le Mindat CDF cun Mindat peng sungih tender thuhla thawn pehpar aw in July 18 ah meeting an rak nei ih, Mindat thansohnak hrang le mipi hlawknak hrang tender tuanter an sian thu mipi an rak theihter.
Asinan, a hnu reilo ah Mindat mipi uktu le Mindat CDF pawl cun ralhrang pekmi tender pohpoh tuan lo dingin mipi le company theihternak an neisal ih, ziangahtile, ralhrang in an tender hmangin kan thuhla le cangvaih dan an zingzoi thei pang ding tin thu an suahsal.
A hlan ahcun Mindat mipi uktu le Mindat CDF cun mipi hrang hlawknak le Mindat thansohnak hrang tender cu ttuan an rak siang lawk nan, neta ahcun ralhrang pawlin tender hmangin dalan an tuan ding an phan ruangah ralhrang pekmi tender pohpoh cohlang lo dingin mipi an theihtermi a si.
Kalay Ah Ralhrang 13 An Thi – Sagaing ramthen Kalay peng myinttar nisuahnak lam Kinmon Chung khua lamah ralhrang ralhrang ralkap le Kalay PDF pawl July 21 ah nasaten an do aw ih, doawknak ah ralhrang thi an tam tin NUG le Kalay PDF cun thu an suah veve.
NUG humhimnak vuanci zung cun “July 21, zinglam nazi 10:30 in sun nazi 1:30 tiang Kalay peng Kinmon Chung khua lamah ralhrang ralkap le Kalay PDF tatyin 6-nak pawl an do aw ih, doawknak ah ralhrang bawi pakhat telin ralhrang pathum an thi ih, , bomb puak ah ralhrang dang thi an tam. July 20 khalah Kalay PDF tatyin 6-nak cun ralhrang pawl bomb an rak puah zo ih, cumi ahcun ralhrang 10 an thih tlunah ralhrang tampi hriamhma ngah an um a si,” tin thu an suah.
Kalay PDF tatyin 6-nak cun “Kalay peng Kinmon Chung khua lamih feh ralhrang ralkap pawl cu kannih Kalay PDF tatyin 6-nak pawlin July 21 ah kan do ih, ralhrang 10 hrawng an thi. Ralhrang pawlin ralthuampi an hman tlunah Pyu Saw Htee pawlin an bawm nan, thi an tamih dung an sip rualah Inkyaw khua in inn hrekhat an urkang.
“Doawknak taktak cu zanlam nazi 6 hrawngah a daifang. Doawknak ah ralhrang thi an tamih, an phurh thei lo ruangah ralhrang thi ruang pawl cu an urkang cih men. Kannih mipi ralkap lam cu kan him thluh nan, veikhat ral kan do tikah ral dosalnak hrang cerek kan tul ringringih, in bawm dingin mipi kan lo sawm a si,” tin thu an suah.
kinmon Chung khuami pakhat cun “Kan khua kiangih doawknak a um tikah kannih mipi pawl cu khua ah um ngam loin kan tlan thluh. Zanlam nazi 4 hrawng ahcun kan khua in meikhu a suak ih, ziangdang a silo ralhrang pawlin kan khua in inn hrekkhat an urkang timi a fiang cih. Tu ahcun kan khua in inn ziangzat ciah a kang timi felfai in kan thei hrih lo a si,” tin a sim.
Ralhrang In Pyu Saw Htee 15 An Kai – Mandalay ramthen Myin Gyan myone ah ralhrang ralkap le Pyu Saw Htee pawl an kap aw ih, palik pakhat a thih tlunah Pyu Saw htee 15 pawl kaih an si tin Myin Gyan mipi uktu cun thu an suah.
July 20 ah sungkhua lamzin cek ih vak ralhrang ralkap le Pyu Saw Htee pawl tithiam aw loin an kap aw ih, ralhrang lamtang palik pakhat a thih tlunah palik pakhat khal hriamhma a ngah. Sungkhua ahcun Pyu Saw Htee pawl an tam zetih ralthuam khal an nei fekfek tin an sim.
Myin Gyan mipi uktu cun “Khat le khat an kahawk hnuah Pyu Saw Htee hotu San Maung telin Pyu Saw Htee 15 pawl cu ralhrang pawlin an kai. Pyu Saw Htee pawl cu ralhrang pawlin ralthuam an pek copmi an sinan, an par ih ralhrang pawl thuneih tuk dan ah khat le khat tithiam aw lo an si. Tu ahcun Pyu Saw Htee hotu telin Pyu Saw Htee 15 pawl cu ralhrang pawlin an kai ih, ziangtin an tuah ding ti cu kan thei hrih lo a si,” tin mipi theihternak an nei.
AA In Mipi Vaksuak Lo Dingin An Sawm – A tufang Rakhine ramkulh sungih ralhrang ralkap le AA karlak boruak a that lo ruangah AA cun mipi pawl cu a tul tuk lo ahcun suakvak lo dingin theihternak an nei ih, suahvah tengteng a tul asikhalle ralhrang kaih theimi pawl keng lo dingin mipi an theihter.
AA cun “Doawknak a um tinten ralhrang pawl an tuarnat caan le ralhrang lam thi an tam tikah ralhrang pawl cu mipi tuar ding zawngin an cangvai ringring. Cucu, kum tampi sung a si zo. Ahleicein tlangpar miphun lakah ralhrang ralkap pawl cu rapthlak tukin an cangvai ringring. Tukhalah ralhrang ralkap in ralthuam rinsan ih rampi thuneihnak an lak hnuah mipi tuar ding zawngih an cangvaihnak a tam zo.
“Ralhrang pawl cun duhtawk in mipi an kai, an hrem, phungki tlawng le biakinn khal an urkang. Mipi sukso vak pawlih phone, bike le mawtaw khal duhduh in an lonsak ih, mipi parah dankalh in an cangvai ringring. Hivek tlunah ralhrang pawl cun mipi thilri computer le Tablet tivek khal an laksak ih, AA thawn pehparawknak nei zuk le ca tivek ruangah hremnak an pekmi mipi khal an tam tuk zo.
“Curuangah mipi hnenih zangfah kan lo dil duhmi cu a tuvek caan ah a tul tuk rori, damlonak ruangah vahsuak tengteng a tul tivek lo ahcun khualtlawng sukso in vak hram hlah uh. A tul tuk rori ih, suahvah tengteng a tul asikhalle kan phone, computer le tablet pawl thianfai thluh in keng uhsi. Ralhrang ih kaih theinak cabu le hminsin tivek khal suahvahnak ah keng lo dingin kan lo forh duh a si,” tin thu an suah.
Ralbawi Saw Ne Dar Mya A Phuang Aw – KNU in an dawisuak hnuah Kaw Thoo Lei Army dintu ralbawi Saw Ne Dar Mya cun ziangruangah Kaw Thoo Lei Army a din timi cu mipi simfiangnak a nei ih, ralhrang do cimitnak hrang lawng a si tin a tarlang.
Ralbawi Saw Ne Dar Mya cun “Kaw Thoo Lei Army ih tumtahmi cu ralhrang ralkap cimit ko do ding a si. KNLA cu KNU hnuai ih um an si tikah KNU daan vekin NCA hminkhen ruangah duh vekin ralhrang an do thei lo ih, ralhrang donak hrang harsatnak tampi an nei in ka hmu. A tu caan cu ralhrang ralkap uknak do cimit dingin caan thabik a si.
“Kannih Kaw Thoo Lei Army cu NCA hminkhen hnuai ah kan um lo ih, NCA ih ukmi le NCA hnuai ah cangvai khal kan silo. Kannih Kaw Thuoo Lei cu ralhrang ralkap uknak dotu karen ralthuamkai fang lawng kan silo ih, hmun tinkim in ralhrang uknak dotu PDF le tlangpar ralthuamkai dang pawl thawn kutkai aw in ralhrang uknak a rangthei bikih cemral dingin dotu ding kan si,” tin Ralbawi Saw Ne Dar Mya cun thu a suah.
KNU ralkap lakin Karen ramkulh sungih nasaten ralhrang dotu Venon Commando khalin Kaw Thoo Lei Army an dinpi thu le an tuanpi ding thu mipi theihternak an rak nei ve zo.
kareni Ralkap Komkhawm In Ralhrang 9 An That – Shan ramkulh Phekung le Moebe myone ih umhmun khuar ralhrang ralkap pawl cu Kareni ralkap komkhawm in July 21, zanlam nazi 3:20 hrawngah an do ih, doawknak ah ralhrang 9 an thi tin Phekung PDF cun thu an suah.
Phekung PDF cun “Phekung le Moebe karlak ih umhmun khuar ralhrang ralkap pawl cu kannih Phekung PDF le KNDF komkhawm in kan kap ih, doawknak ah ralhrang 9 an thi. Phekung ih ralhrang hmunpi cun ralthuampi thawn in kap ciamco ih,kannih mipi ralkap komkhawm lam cu himdamten dung kan sip.
“Ralhrang ralkap pawl cu mipi zawn ruat loin mipi tuar ding zawngin an cangvai ih, khawsung khalah ralthuampi an kap ciamco. Cumi ruangah khua mipi pawl cu khua ah um ngam loin an himnak dingih an ruahnak hmunah an tlan cio a si,” tin mipi theihternak an nei.
Biden In Covid 19 Natnak A Nei – US president Biden in covid 19 natnak a nei tin White House cun thu felfai an suah ih,mipi theihternak an nei.
Kum 79 kim zo Biden cun covid 19 natnak a rak nei dah lo ih, tuitum cu covid 19 natnak a kai veikhatnak a si tin White House cun an sim. Biden cu July 21 zingah covid 19 natnak a nei timi an hmusuak ih a taksa ih a lang cih ruangah thaten tuamhlawm a tul tin an sim.
President Biden cun Covid 19 nat khamnak sii vei hnih a dawh zo tlunah Booster khal vei hnih a dawt zo nan, cuvek hnuah covid 19 natnak kai thotho a si. A taksa ih a lang dan cu a khua a zik, a hritlang. Hivek ruangah president Biden cu a malbik ni 5 tal amahten ret ding a si ih, sibawi pawl cun theitawk in an tuamhlawm rero zo.
Biden cun “Ka nuamsam lo ruangah Covid 19 natnak ka neih le neih lo ka cek ih, covid 19 natnak ka rak nei. Ka taksa ah a lang cih nan, vei hnih nathrik khamnak ka dawt zo ih, Booster khal veihnih kan dawt zo. Nan thapeknak le dinpinak ka tul zetih keimah khal ka tha tuk. Theitawk suah in ka zuam dingih ka dam rori ding timi zumnak hnget ka nei a si,” tin mipi simtheihnak a nei.
A tufang leitlun hmun tinkim ah covid 19 thuah linak a darh ciamco sal ih, ram tamzet ahcun fimkhur dingin mipi theihternak an nei rero zo. Myanmar khalah covid 19 nat nei an hmu thar ih, Myanmar ramri Thailand, India, Singapore le China pawl khalah covid 19 nat nei thar an hmu ih, mipi ralrinnak pek an si.
Leave a Reply