Kalay Khawpi Sungah Ralhrang Mawtaw Bomb An Puah – Sagaing ramthen Kalaymyo khawpi sungah PDF kalay pawlin ralhrang mawtaw bomb an puah ih ,ralhrang thi an um tin thu an suah.
Kalay PDF cun “September 8, zinglam nazi 10 hrawngah Kalaymyo Chanmay Aungsi veng lamzinpi ih feh ralhrang ralkap mawtaw pahnih cu kannih Kalay PDF in ralring zetin bomb 3 thawn kan rak puah. Bomb puak ah ralhrang bawi telin ralhrang thi le hriamhma ngah an um tin kan thei. Bomb puah an si hnuah ralhrang pawl cun duhduh in kiangkap mipi an kai ciamco ih, an hruai hai,” tin thu an suah.
Kalay ih um pakhat cun “A tufang hi kalaymyo ah ralhrang pawl cangvaih dan thar an nei. Phungki tlawng ah rawl an pe ciamco ih, biaknak hmangin mipi thinlung lak peng an tum. Tuitum ralhrang mawtaw pahnih khal phungki tlawngih rawl pe, an tlunglam a si.
“Kalay PDF in bomb an rak puah tikah ralhrang pawl cun duhduh in kiangkap mipi an kai ciamco ih, an kaihmi lakah hrekkhat wire hridai keng an um ruangah kan thinphanpi tuk a si,” tin a sim.
September 8, zanlam nazi 5 hrawng khalah kalaymyo thlanglam Kyantar khua ih um ralhrang ralkap pawl cun duhtawk in Tintar khua lamah ralthuampi an kap ciamco ih, mi 3 hriamhma ngah an um phah. Hriamhma ngah pathum lakah pakhat a bese deuh ih, a dang pahnih cu ngaihtuah um an silo tin an sim.
CDF Ih Dalan Kolmi A Thi – Chin ramkulh Paletwa peng sungah CDF Paletwa cun ralhrang ralkap hnenih CDF cangvaih dan pawl simthei ringringtu Dalan pakhat an kai ih , damlonak in a thih ruangah a sungte pawl thawn thurel tlang an duh thu an theihter.
CDF Paletwa cun “Paletwa myone Wadeing khuami Aa Khaing cu CDF paletwa cangvaih dan pawl ralhrang hnenin a simtheih ringring ruangah vei 2 ralrinnak kan pe. Vei hnih ralrinnak kan pe cingin a rim cuang lo ih, ralhrang hnenah CDF Paletwa cangvaih dan pawl a sim peh thotho.
“Curuangah 2022, July 13 ah kan rak kai ih, thaten kan ret. Thaten kan ret nan, zan ah a tlansuak ih, kan kai ngahsal. July 19, zinglam nazi 5:30 hrawng ahcun bang nat a neihciami ruangah a unnak a cem. Curuangah, a sungte pawl thawn thurel tlang kan duh a si,” tin thu an suah.
British Lalnu Queen Elizabeth A Thi – British santhuanthu ih siangpahrang tuan reibik Queen Elizabeth cu September 8 zan ah tar natnak in a nunnak a cem. September thla thokin buai thok lalnu Queen Elizabeth cu sibawi pawlin theitawk in an tuamhlawm rero nan, a dinhmun a that lo ruangah a fate le a sungte pawl an kokhawm aw cia thluh ih, a hnu reilo ah a nunnak a cem.
Kum 96 mi Queen Elizabeth cun kum 70 sung British a uk ih, Siangaphrang lalnu a si sungah buainak tampi a rak tifel thei. A pa in 1952 kum ah a rak thihsan ih culai ah Queen Elizabeth cu kum 25 fangte lawng a si. Asinan, British siangpahrang lalnu sinak an rak pe.
Tu ahcun kum 96 in a nunnak a cemfel zo ih, a fapa Charles in British siangpahrang a tuan ding tin Siangpahrang innsang cun thu an suah zo. Leitlun siangpahrang lakah mipi thinlung neh tuktu Queen Elizabeth a thih tikah leitlun in an ui thu an tarlang celcel. Thuanthu mawizet nei, mipi kaihruai thiam, remdaihnak tuahthiam, mibawm duh tuktu le Pathian tihzah zettu a si.
Leave a Reply