Cangsualnak Ah PDF 5 An Thi

Cangsualnak Ah PDF 5 An Thi – Sagaing ramthen Watlet myone Mandalay le Shwebo lamzin ih bomb kam Watlet PDF 5 cu bomb puak ruangah an nunnak a cem tin Watlet PDf cun mipi theihternak an nei.

Watlet PDF cun “Ralhrang ralkap pawl an ra timi thuhla felfai kan theih ruangah kan sungtel 6 in lamzin ah bomb an va kam. Bomb an kammi cu an tham rero laiah a puak ngah ih, mi 5 a hmunah an thi. Pakhat cu hriamhma naa tuk a ngah ih, sizung ah kan tuamhlawm rero lai. PDF 5 pawl cu upatnak kan pek hnuah kan vuiliam zo.

“Theitawk in ralhrang kan donak ah ralthuam kan daih aw lo zetih meithal lawng siloin bomb tiang kanmahten kan tuah. Cutikah cangsualnak kan nei phah theu. Mahte tuah siloin lei thei sehla cangsualnak a dem rori ding. Tu cu duh vekin bomb le meithal kan lei thei lo tikah kanmahten kan thiam dandan in kan tuah ih, cangsualnak a thleng phah theu a si,” tin mipi an simthei.

Sagaing ramthen PDF pawl cun an hman dingmi bomb anmahten an tuah thlangpi ih, ralhrang pawl cu bomb puah in an do. Cutikah ralhrang thih phah an tam thei ngaingai. Hmaiton le meithal thawn doawk ding cun mipum le ralthuam a thlauawk thei tuk ruangah bomb kammin ralrhang an do tlangpi ih, a tul tuk caan ah ralthuam an neihsun in ralhrang an siim caan khal a um ve.

Ralhrang Dawttu Tlawngta Pate An Hrem – Pago ramthen Pyi myone Hmawza khua ih ralhrang dawttu tlawngta pate cu ralhrang pawlin an kaih hnuah hriamhma nei cingin thu an sut ih, an hrem phah rero. Curuangah seherh umtuk a si tin khuami pawl an sim.

Hmawza khua suakthuan tlawngih duty hnatuan ralhrang pakhat cu August 3 ah tlawngta nauhak pakhat kum 14 pate cun nam in a dawt ih, ralhrang pa a rak kham aw man. Ralhrang pa cu a kutah hriamhma a ngah ih, tlawngta pate khal ralhrang pawlin meithal in an kah ngah ruangah a taksa ah meithal ih kahnak hriamhma a tuar ve.

Tlawngta pate cu ralhrang pawlin an kaih ngah hnuin, ralhrang sizung ah an fehpi nan, sizung ahcun duh vekin tuamhlawm a silo ih, an hrem phah, thu an sut phah rero tin thuhla theitu pawl cun an sim.

Khuami pakhat cun “Tlawngta pate cu sizung ah an ret nan, anmah ralhrang sizung a si tikah ralhrang 7 hrawngin an kil ringring. A damlo cingte thawn zoin ralkap dawt dingin a lo fial? zosi thu lopetu tin an sut ringring ih, an hrem phah.

“Tu ah kum 14 fang lawng a si ih , a damfel tikah thubuai tuahsak theih a silo ih, nauhak kilkhawinak hmunah ret ding a si. Cuvek a si ruangah ralhrang pawlin sizung ah an hrem that pang ding kan phang tuk lawlaw. Kannih khuami pawl khalin ziangruangah nam in ralhrang a dawt timi a san kan thei ve lo.

“Fialtu a nei khal sithei, culole ram buainak thuhla a rak theih ve ruangah ralhrang pawl sahuat in a rak hua ve ih, amai thu rori in ralhrang tuamhlawm hrim khal a sithei. Ralhrang a dawhnak san cu felfai in zohman kan thei lo a si,” tin a sim.

Tuamhlawmnak Um Lo Ruangah Raltlan Nute A Thi – Tanintharyi ramthen Yephyo myone Wazuan khua in hramlak ih raltlan lakin raltlan nute pakhat cu caurau in a damlo ih tuamhlawmnak a um lo ruangah a nunnak a cem phah.

Buaipitu pakhat cun “Cuap lam natnak a nei cia ko nan, a hlan ahcu a buai tikah tuamhlawm a si ih, a thasal ringring. Tuitum cu raltlan umnak hmunah tuamhlawmank sii a um lo ih, a nunnak a cem. Ruahlak le thlilak ih raltlan an si ruangah a tuar thei lo ih, caurau in a buai. A buai veten tuamhlawm sehla a tha mai ding nan, tuamhlawmnak ding sii a um lo ruangah a thi. Tu ahcun kan vuiliam zo a si,” tin a sim.

July 30 ah ralhrang ralkap pawl cun Yephyo myone sungin khua hrekkhat an rak luhcilh ih, khua 5 in mipi tamtuk khua ah um ngam loin hramlak ah an rak tlan. Thenkhat cu khuadang phungki tlawngih umnak co an um nan, phungki tlawngih umnak nei lo hramlak ih tlan pawl cu an buai hleice ih, an harsa tuk tin raltlan buaipitu pawl cun an sim.

Raltlan pakhat cun “Raltlan timi hi a rak har tuk lawlaw. Thenkhat in ziangruangah nan tlan, tlan a tul sawm? ummen uhla ziangtinhman an lo tilo ding? nan tihhrut tuk sikha tivekin mi an ti. Asinan, kan theih cio bangin ralhrang pawl khuasung an luh tikah tlan lo a him lo.

‘Ziangahtile, ralhrang pawl cun khua sungih an hmuhmi pohpoh an kai ih, thenkhat cu an that men. Curuangah khua ih ralhrang pawl an rat cun kannih mipi hrang tlan a him bik. Tlan tikah tilva vulhmi nei hrang a buaithlak hleice ,khua ih tanta men tikah ralhrang in duhtawk in an that ih a sa an ei men fawn. Tlanpi vivo ding le a ngah silo.

“Curuangah, raltlan timi a harzia in theihpi hram uh. Kan duh ruangah tlan kan silo,ka himnak hrang tlak kan si. Kan tlan cun kan inn le lo, neihsiat ziangkim tlansan kan si tikah zianghman nei lo kan si cih ve. Kan duhthlan ih tlan siloin kan nunnak hrang tlan kan si,” tin raltlan dinhmun a sim.

Mipi Thilri Rutu Ralhrang 17 An Thi – Sagaing ramthen Minmoe le Ayadaw karlak Minzua khua ih mipi thilri rutu ralhrang ralkap mipum 60 pawl cu August 4, zinglam nazi 10:30 hrawngah Minmoe Zero pawlkom pawlin lamzin ah rak kap fukfi ih, ralhrang 17 an thi tin Zero Army cun thu an suah.

Zero Army cun “Khua sungih mipi thilri rutu ralhrang pawl cu ke in an feh. Ralhrang pawl cu thluak an hmangawter ve zet thlangih, hmailam an fehnak ding lamzin cu Drone in an zoh hmaisa. Kannih khal thluak kan rak hmang ve ih ralhrang thlahmi Drone zoh in kan cangvai. Ralhrang pawl drone cawlhnak hmun kan hminsin ih , cutawk in an suahnak hmailam ah kan rak bawh. Ralhrang pawl an ralrin lo laifang ah kan kap ih, ralhrang 17 an thi a si,” tin mipi an simthei.

Taiwan Lam An Ralring Ve Thlang – China in ni 4 peh in Taiwan ramri ih raldo zirnak an neih ding thu leitlun an theihtermi ah raldo zirnak lawng siloin Taiwan an hnaihnok tukih Taiwan lam khal ralrinnak an rei thok ve thlang.

Taiwan Prime Minister cun “Innhnen sual kan nei tikah kan innhnen sual cun kan inn hmai rori ah an thilri an ra ret. Hivek ruangah leitlun ih hman tam tukmi Taiwan tipar lamzin cu zawh theih loin a um ih, ramdang pawl khal an thinheng tuk thlang. China ih cangvaihnak cu kan zohthup ringring ih, kanmah lam khal ziangkimah ralrinnak kan nei thok thlang a si,” tin a sim.

US House Speaker Nancy in Taiwan a tlawn ruangih thinheng tuk China cun US hnenah na tuah bangin na at ding, meisa in nan lek asile meisa in a lo kang ding tin an rak theihter zo ih, an thinhengnak a dai thei hrih lo. China in raldo zirnak hrang an kahmi bomb zamthei pawl cu Taiwan ramsung tupi le tipi parah a tla rero zo. Cumi ruangah Taiwan lam khal timtuahnak thup an nei ve ih, China lam luarkai tukin an cangvai vivo asile an sup aw thei nawn lo men ding.

Nancy in Taiwan a tlawn ruangah China le Taiwan karlak buainak a sosang deuhdeuh nan, Nancy cun a kualtlawn ding a tthulh cuang lo ih, S.Korea le Japan khalah a ttum zo. S.Korea ih Nancy a feh ttumah S.Korea le N.Korea ramri tiang a feh ih, N.Korea lam an rak lungawi ve lo. Curuangah , Nancy ih khualtlawnnak ruangah leitlun an buai thluh phah ding phangtu an um ih, Singapore cun ziangvek thuhla khalah hmanhlap tukin cangvai lo dingin China le Taiwan sawmnak an nei.