China Ah Mithi Ruang Retkhawmmi A Darh

China Ah Mithi Ruang Retkhawmmi A Darh – China ram Beijing khawpi ih inn pakhat sungah mithi ruang an retkhawm hnenhnen ih, hnatuantu pawl cun mithi ruang retkhawmmi pawl cu nazi 24 sungah kan tifel thluh ringring tin an sim.

China ram ah nasaten Covid 19 natnak a darh ciamco sal ih, China cozah khalin covid 19 daan le dun khoh zetin an fehpi sal. China ramih covid 19 natnak a darh ciamco sal ruangah WHO khalin China ram hrang an khawruah a har thu an rak suah zo.

China hi Covid 19 nathrik suahnak hmunpi ah puh an si ih,amah China lam cu tuisun nitiang an phah rero lai. Tuitum ih covid 19 natnak a darhsal ciamco thu khalah China cozah cun ziang thu hman an suah duh nawn lo , an ram sungih buainak cu ramdang pawl theihter an tum lo. Asinan, ram sungih um mipi hmangin thuhla a darh ringringthotho.

Beijing khawpi inn pakhat sungih mithi ruang an retkhawm thu ah buaipitu cun “Kanmah khal covid 19 nat kan kai thluh zo ruangah mithi ruang pawl hi tuam aw loin kan thianfai ringring. Ruang ziangzat an ret khalle nazi 24 sungah kan thianfai thluh ringring a si,” tin a sim.

Kalay Ah Ralhrang Meithal An Long – Sagaing ramthen Kalaymyo Tahan vengah CDF KKG pawl cun ralhrang pawlih meithal zunkhat kan long thei tin mipi theihternak an nei.

CDF KKG cun “December 24, zinglam nazi 10:30 hrawngah Kalaymyo Tahan traffic meisa kiangih um ralhrang pawl cu kannih CDF KKG pawlin kan luhcilh ih, ralhrang pawl hnenin MA2 meithal zunkhat le cerek kan laksak thei. Ralhrang pawl umnak luhcilh dingin kan feh rero lai cu anmah ralhrang zuri pawlin in rak hmu ih in tih tukah an tlan. Cumi ahcun ralhrang pawlin meithal zunkhat le cerek an tanta ih kan la.

“A hnu reilo ah ralhrang pawl an sawm aw khawmih ralhrang mipum 30 hrawng cun in ra hawlsal. Asinan, kannih CDF KKG lam cu himdamten dung kan rak sip zo. Kan um nawn lo hnu khalah ralhrang pawl cun duhtawkin kiangkap an kap ciamco ih mipi lakin hriamhma ngah an um tlunah ralhrang pawlin mi pakhat an kap that. Mipi thih phah an um ruangah kan riahse ngaingai a si,” tin CDF KKG cun thu an suah.

Ralhrang pawlin duhtawkih meithal an kah ciamco ruangah an kah that ngahmi cu Kalay peng Pinkhungkyi khawmi Pa Thian Zei Thang a si ih, fate 4 ih pa a si. An sungkhat sawmnak in Tahan fehduak an si ih, lamzin ih bike an mawng men ralhrang pawlin an rak kap. Bike mawngtu cun a taksa ah cerek hriamhma um cingin a tlan ngah ih, dunglam ih to sawntu Pa Thian Zei Thang sawn a thi.

PDF In Palik Bawi An Kai – Taninthari ramthen Palaw myone Myeik le Dawei karlak lamzin ah Palaw PDF pawl cun palik bawi pakhat an kai ngah. PDF pawlih kaihmi palik bawi cu Kawhtuang myone Komai thawnginn kiltu palik bawi a rak si.

Palaw PDF thuphuangtu cun “Mipi tamzet fehnak ah mipi vekin a feh ve. Kannih in kan rak cek tikah palik a sinak kan hmu ngah ih kan kai. Mipi pawl cu kan thlah zalen thluh. Palik bawi kan kaihmi cu kan kol hrih. Ziangtik kan tuah vivo ding timi cu tlunlam pawl thawn kan ron aw rero lai.

“A kutah tangka ting 17 le phone pakhat a kengih cukhal kan kol sak hrih. Tuitum ah kanmah lawng siloin PRDF, PSGF le tualsung PDF pawl thawn tangtlang in palik bawi kai ngah kan si,” tin a sim.

Ralhrang Bia PDF 5 An Kap That – Mankui ramthen Gangaw myone ih doawknak a sosan ciamco laiah PDF pawlin ralthuam an daih aw lo ih,ziangtin ke kan kar ding tin Singapore ih um Irene an ron. Irene cu Singapore ih um dothlengnak hrang theitawkin sumpai khong rerotu a si ih, neta ahcun sumpai a khonmi a eithup tin a hminsia.

Cumen siloin Irene cun amah bomnak rak diltu PDF pawl cu sumpai kuat loin ralhrang thawn be aw men dingin thu a rak pe. PDF pawl khalin Irene ih thuron pekmi cu an rak lung huaiho ih ralhrang pawl be dingin an pan tikah ralhrang pawlin PDF hotu 5 an kap that hngal ih, PDF 30 lenglo an kaih hnuah kum tampi sung thawngtla dingin hremnak an pe. Cucu, amah Irene in a tongsuak salmi a si.

Irene cun “Gangaw lamih nasaten an buai laiah ziangtin thu kan rak rel ti asile fungreu le meithal hmang doawk cu a ngah lo,curuangah nan naivai ih um ralhrang pawl cu be uhla remnak tuahpi men uh tin PDF pawl cu thuron ka rak pe. Cutikah hramlak ih ei ding nei nawn lo, ralthuam nei nawn lo PDF pawl cu ralhrang thawn remnak tuah dingin an poksuak.

“A thok ahcun ralhrang pawl khalin ‘Awle nan duhdan bangin remawknak kan tuah ding tin PDF pawl cu an rak lungkimpi ve. Thilthleng taktak a si ruangah NUG pawl khal thaten ngai uh. PDF pawl ei ding an ei nawn lo, ralthuam an neih lo ruangah ralhrang thawn berem aw ding cun an feh. Ralhrang pawl cun PDF hotu pawl cu an rak kap that hngalih, pDF khal 30 lenglo khal an vuak cioamco hnuah an kai thluh. Kaihmi PDF pawl cu kum 30 , kum 20 tivek hremnak an pe thluh men asi,” tin Irene a phuang aw.

Hivekin Irene a phuanawk hnuah Myanmar mipi tam tuk thinheng sosang in an um. Sumpai nan khon reromi cu khawiah na heih? ziangah sumpai in na rak bawm lo, ziangah ralhrang pawl hnenah pe dingin thuron na rak pe tin an salsuah rero.

Ralhrang 20 An Thianfai Ih Ralthuam An Laksak – Pago tlangtlun ih doawknak ah ralhrang 20 tlun an thi ih,ralthuam laksakmi kan nei tin Bago PDF cun mipi theihternak an nei.

Bago PDF cun “Kannih Bago ramthen Tuang Ngu hmunram Bago Zumah tlang tluanah ralhrang ralkap thawn December 15 in kan do aw thok. Doawknak vei 11 ah ralhrang Bawi Nandah Aung le ralhrang bawi dang pakhat telin ralhrang 20 hnakin mal lo an thi ih ralhrang tampi hriamhma an ngah.

“Doawknak ahcun kannih PDF lamin miraltha 3 cun ram le miphun hrang an nunnak an hlanih PDF pakhat hriamhma a ngah. Ralhrang pawl hnenin meithal zun 5, bomb, cerek le ralthuam dang phunphun kan laksak thei. Tu khalah ralhrang ralkap thawn kan do aw peh rero lai ih, doawknak ruangah raltlan tampi an um zo a si,” tin Bago PDF cun thu an suah.

Ralhrang Le Tlangpar Ralthuamkai Thu A Hrulh – Tlangpar ralthuamkai lakin NCA hminkhen ngan tlangpar ralthuamkai pawlkom 7 pawl cun ralhrang thawn an biakawk ding thu an rak sim zo nan, tu ahcun ralhrang thawn an biakawk tumi an thulhsal thu an sim.

Tlangpar ralthuamkai pawlkom 7 le ralhrang pawl cu December 27 in December 29 tiang tin ni 3 sung be aw tum an sinan, tlangpar ralthuamkai pawlkom 7 pawlin 2008 daan hrampi rem ding a si ruangah a caan a bicilh tukih an ngamsal lo thu an sim.

Tlangpar ralthuamkai pawlkom 7 lamin palai Saw Kyaw Nyut cun “Ralhrang pawl cun December 19 ah ca in kuat ih December 27 ah kan tongaw ding, cumi ahcun 2008 daan hrampi kan rel ding in ti. Rampi daan hrampi rem ding cu menmen sawling men a silo. Curuangah kannih lamin rem kan tisal lo. Reltlangnak le remawknak um hmaisa sehla kan duh a si,” tin a sim.

Ralhrang thawn be aw sal lo dingih um tlangpar ralthuamkai pawlkom 7 pawl cu NCA hminkhen ngan ALP, DKBA, KNLA PC, LDU, NMSP, PNLO le RCSS pawl an si.

Min Aung Hlaing In Jesuh Thu A Rel – Ralhrang ralkap hotu Min Aung Hlaing cun Christian Biakinn ah Jesuh thuhla a rel ih, Bible sungih remnak thu a um bangin Myanmar mipi kan zate par khalah remnak leng hramseh tin a sim.

Min Aung Hlaing cu Yangon Panbedan myone ih Holy Cathedral Church cun an kawhhran Christmas hmuahnak khawm ah thusim dingin ralhrang hotu Min Aung HLaing le biaknak lamih hotu tampi an sawm.

Min Aung Hlaing cun “Leitlun ah biaknak picang 4 an um,cupawl cu Buddish, Christian, Muslim le Hindu pawl an si. Ziangvek biaknak khalin remdaihnak, duhdawtnak thatnak le zangfahnak pawl kan aupi thluh. Biaknak lamih thu kan thlun asile a nuam le buainak um lo ram ah kan um thei ding.

“Kum 2000 hlanih Jesuh a suah zanah Tuu khal pawl hnenah Vancungmi an langih “Leitlun ah remnak lang hramseh” tin thucah an rak sim. Cucu,Luke 2:14 ah kan hmu thei ding. Curuangah tuini Christmas hmuahnak khawm ih a teltu nan zaten parah remdaihnak, lungawinak , harhdamnak le daihnak co hram uh,” tin Min Aung Hlaing cun a thusim a khar.