China Ah Sinthir Nat Nei Minung 35 An Hmu

China Ah Sinthir Nat Nei 35 An Hmu – China nisuahnak lamah ramsa sinthir nat nei 35 an hmu zo ih, mithiam pawl cun ziangtin a si thei tin’ an zingzoi rero lai.

China nisuahnak lam Shandong le Henan ramthen sungah nat nei an hmuhmi a si ih, natnak hmin cu layV ( Novel Langya Henipavirus ) tiah hmin an pe. Nat nei pawl cu khawsik luna, awmna le caurau in an um. Hivek natnak cu ramsa Sinthir natnak a si ih, sinthir in an kai sipei maw timi zingzoinak felfai sawn an nei rero lai. Tuhrih ahcun nat nei pawlin ramsa hnenin natnak an kai timi fiahnak an hmu fel hrih lo. Asinan, nathrik an hmuhmi cu ramsa sinthir natnak a si thung.

China sibawi Wang Linfa cun “Tu ah zingzoinak kan nei rero lai ih ,fiahnak kan nei thei hrih lo. Curuangah thinphang le tih tukin um ciamco hlah uh. Mi 35 hnenih nathrik kan hmuhmi cu Sinthir natnak vek a siko nan, ramsa in minung ah a kai timi fiahnak kan hmu thei hrih lo. Asinan, natnak tamzet cu ramsa in kai theih an um rori a si,” tin Global Times a simthei.

LayV natnak cu zinghnam rimsia sinthir pawlin an nei tam bik ih,Uico le Me khalin an nei phah theu tin Mithiam pawl cun an sim.