Kum reipi rak buai zo Taiwan le China thuhla ah US cun ziangtik hmanah Taiwan an thlauthlak lo ding thu an sim nonsal ih, a tawp tiangin kan lo dinpi ding tin Taiwan an tiam.
Tu ah US House Speaker Nancy Pelosi cu Taiwan khawpi Taipei ah a um ih, Taiwan president thawn khalin an kawm aw zo. Taiwan ih US House Speaker Nancy Pelosi a feh ruangah China cu an thinheng zet nan, tutiang cu a takin cangvaihnak an nei hrih lo.
Nancy Pelosi cun “Ziangtik hmanah Taiwan kan thlauthla lo ding ti ih kan tong rero zomi cu tuini ah a takin kan langter. Keimah siseh ka tuanpi pawl thawn Taiwan kan fehnak pakhat ih lang cu kan tongkam vekin Taiwan kan dinpi timi a si. Taiwan thawn pehtlaihawknak thatuk kan neih ruangah kan lungawi ngaingai. Tuvek caan ah US le Taiwan hmunkhat teih kan um ding cu thupi tuk a si,” tin Taiwan mipi pawl a simthei.
Taiwan lam khalin US parih an lungawi thu an sim ve ih, Nancy Pelosi hnen khalah lungawinak le sunloihnak laksawng an rak hlan ve. Taiwan mipi siseh Taiwan ram hruaitu zaten cun Nancy Pelosi cu hlunghlai zetin an rak hmuak. US le Taiwan pehtlaihawknak ahcun Taiwan ram sungih party politics hruaitu pawl khal an lung a rual thluh thei.
US president umnak White House cun “China le US remawknak kan neih dan vek asile Nancy in Taiwan a tlawnnak ah buainak ding zianghman a um loin a lang. Taiwan mipi pawl anmahten an humhimawk thei ding cu kan duhmi a si ih, zalennak an sualmi kan forh tinak a silo. Curuangah, Nancy in Taiwan a tlawn ruangah buainak ding a um lo ih, doawknak tham khal a silo. Hivek ruangah China lam an thinheng zet ding timi khal kan thei cia ko, asinan China ih hronak le ngiarnak let rero kan tum lo a si,” tin a sim.
China cu an thinheng tukih ca an suah rero nan, tutiang cu ralthuam thawn an cangvai hrih lo. Asinan, Taiwan ramri hmun tinkim ah ralkap an ret, raldonak lawng an ret, raldonak vanzam in Taiwan an hel rero. Culawng siloin US in an tuhrah cu an khawmsal hrimhrim ding, Ziangtikah si maw US in an tuar hrimhrim ding tin thu an suah rero.
China cun “China in kan kham rero nan, US House Speaker Nancy cu Taiwan ah a feh thotho ih, china uknak daan a pahbal. Hivek ruangah kannih China cu kan thinheng tuk. US ram hruaitu hrekkhat cu China tibuai rori an tumih, Taiwan remdaihnak siatsak lawnglawng an tum.
“US cun China thansoh ding an duh lo ih China thansohnak ding kham rori an tum. Taiwan thuhla khalah China ram pakhat timi remnak kan nei ih, cumi khal US ttawmpi a si. Taiwan lam khal kan simtheih duhmi cu US rinsan in suah an tum asile an hrang suahnak ding lamzin a um lo timi kan theihter duh. Taiwan cu China thuneihnak hnuai ih um ,China ramsung ih um a si,” tin thu an suah.
Leitlun Politics thlirthiam pakhat cun “Ram khat le ram khat buainak hi thuthup tampi a um ruangah fiang zetin theih thluh a har. Russia le Ukraine buainak tla zoh uhla, US an tong por zet nan, a takin an tel duh riai lo ih, Ukraine cu ralthuam thawn an bawm men. Cum ih umzia cu a phen ah thil tampi a um. Ral ruangah Russia an tlase dingih, cumi sungah US thuamthatawk an tum khal a si thei.
“China le Taiwan thuhla khalah US an tong por zet nan, China in Taiwan kap taktak sehla a takin US an tel lo thei ih, ralthuam men in an bawm khal a si thei. Cumi ih rah suah cu doawknak ruangah China Sipuazi tampi a tlaksiat phah ding. Cucu, US hrang sipuazi pakhat a si ve. Curuangah China khalin ral an hrial rero in a langih, nasaten tongkam an hmang. China in Taiwan a kap pei maw tikhal rel theih lo a si,” tin a sim.
Russia Palai Myanmar A Thleng – Russia in thu an suah zo bangin Russi ramdang vuanci Sergei Lavrov cu August 3 zingah vanzam in Myanmar khawpi Naypidaw a thleng fel zo.
Ralhrang in rampi thuneihnak an lak hnuah Russia ralbawi pawl Myanmar ah an tlawng rero zo nan, Russia ramdang vuanci rori Myanmar ih a feh cu 2013 hnuah avei khatnak a si. Russia ramdang vuanci cun Myanmar ralhrang ramdang vuanci Wana Maung Lwin a tong dingih, hnatuan tlang dan ding a phunphun an rel ding tin Russia lam cun thu an suah zo.
2013 ih Russia ramdang vuanci Myanmar a feh caan ahcun cumi lai ih Myanmar president Thein Sein thawn an tongaw. NLD cozah san ahcun Russia ramdang vuanci cu Myanmar ah a tlawng lo ih, ralhrang in rampi thuneihnak an lak hnuah Myanmar ah a feh.
Russia cozah le Myanmar cozah cu pethlaihawknak tha tuk nei ciamco an silo nan, Russia ralkap le Myanmar ralkap sawn kum tampi sung tuantlang zo an si ih, ralhrang in rampi thuneihnak an lak hlan ihsin ralthuam thuhla ah nasaten an rak dawr aw zo.
Ralhrang in rampi thuneihnak an lak hnu ahcun Russia in Myanmar ralkap lawng si nawn loin ralhrang cozah khal ziangkimah tuanpi dingin an bia. Ralhrang khal leitlun ram tampi in an hrem ruangah anmah be duhtu le tuanpi duhtu Russia cu an rak tlon rero ve ih, an thu a rual aw zet hrih in a lang.
Leave a Reply