China Ih Thawngtla Mi 170 Pawl Myanmar Ah An Kuat

China ram Guangdong ramthen sungih thawngtla Myanmar mi 170 pawl cu China thuneitu pawl in may 19 ah Muse Nandaw gate in Myanmar ah an kuat fel zo tin rak buaipitu pawl cun an sim.

China in Myanmar ih a kuatmi mipum 170 lakah mipum 116 pawl cu Rakhine ramkulh sungih um an si ih, culo midang malte cu hmun dangdang in an si. Thupten China ih feh le hnatuan an si ruangah China palik in an rak kai ih, thawngthlakmi an si tin buaipitu cun an sim.

Buaipitu pakhat cun “An zaten thawngtla an si. Hrekkhat cu thla 5 hrawng China ah an um zo. Culo cu kum 1 le kum 2 China ih um zo khal an tel. Passport nei lo ruangah kaihmi an si. A rangthei bikin an khua ih an tlun theinak dingah kan buaipi ding.

“China in Myanmar ih an kuat cin cu hremnak an pek fel hnuah an hrem caan cem zo pawl an si ih,mipum 100 hrawng thleng bet ding an um tin thu kan dong zo. Guangdong ah thawngtla tampi an umlai tin kan thei. Buaithlak zetmi cu China lamin Myanmar thawngtla pawl ziangtikah an zalen ding timi an simcia dah lo.

“Anmah in an suah caan ah Myanmar ramri tiang an thlah ih, cutin Myanmar ah an lutter theu. A caan ahcun ram pahnih theihpinak in Gate ih an thlah caan a um nan, a caan ahcun thupte luhnak in Myanmar ih an tluntermi tivek khal an um phah theu. Kannih cun kan mipi le kan rammi an si ruangah minungpi duhdawt zangfah lainak thawn theitawk in kan rak buaipi ringring.

“A tufang hi thupte tlung siseh China cozah ih kuatmi khal an tam ngaingai. China ah hna a har tukih, Myanmar mipawl an him lo deuhdeuh tin kan thei. Hrekkhat tla cun an sungte siseh an rualpi hmeltheih khal China ih feh ding an duhpi lo lawlaw. China palik in an kaih hnuhnu cun ziangtik an suak ding tivek a um thei nawn lo.

“A kum telih thawng an thlakmi an um bangin, thla hnih khatih an suahmi khal an um. China palik pawl ih kaihmi lakin thawnginn lut lo ih , zalensal thei khal an um theu. Curuangah, zianghman rel a theih lo. Cuti, rualrual in China palik tih, hna nei fawn lo, umnak ding nei lo ih vaktawk Myanmar mi lakin thih phah khal an tam tuk thlang a si,” tin a sim.