China In Ralhrang Hrang Sumpai An Pungter

CNO CNDF Hotu In Mipi Ralkap Pawl Thu A Cah – Lairawn CNDF tatmaha 4 ah Commando raldo zirnak tluangthen thehsuak a si ih, raldo zirhnak thehsuaktu pawl cu CNO CNDF hotu John David in thucahnak a nei.

John David cun “A hmaisabik ah tuitum CNDF Brigade tamaha 4 ih ralkap basic training, a thok in a cem tiang kaisuak ih thehfeltu CNDF ralkap nan zaten upatnak ka lo pe. Nan theih cio vekin kan rampi cu ralthuam le tha-hrum rinsan in ralhrang ralkap pawlin uknak a tu le tu an la leuhleuh. Tui’ tum 2021 February 1 ni ih mipi thuneihnak an lakmi cu tumdang vek siloin ram mipi pawl nasa zetin tangrual zetih a phunphun in kan dokalh ruangah, kum 2 hnu tiang ralhrang pawl mipi uk thei loin an um. Kan Chinram le miphun kan zoh tikah, hi ramdinkhawm rak dinsuaktu lakih telmi miphun si hman sehla rammi sinak hman a nei lomi mikhual le sal men bangin hmuhsuam le nautat kan tuar cuahco rero. Miphun pakhat kan sinak vekih kan covo pawl hmuahhmuah lakhlo sak kan si. 1948 ihsin kan rampi in Zalennak a ngah nan kan miphun cun zalen zetih lairel theinak kan ngah dah lo. Curuangah tui’ tum thalpau Dothlengnak hmangin kan miphun ih kan tul zetmi Ram le Miphun tundinnak nasa zetih kan tuan a tul, a tui’ caan hi kan hrangah caan tha bik a si.

“Kan miphun ralkap pawl, Tuini ah ralrel thiamnak le ramkhel thuhla pawl nan zirsuak hi thinlung takin, miphun ai-awh in lungawithu ka lo sim hai. A thu lawngih thehsuaktu siloin a tak ram khalah hmantlak rori si dingih nan zuam ding khal ka lo forhfial duh. Cui’ hlei ah, CNO/CNDF ih a neihmi daan le dun pawl a thlun thei biktu si tum uh tiah ka lo cah duh hai fawn. Maw miphun ralkap pawl, Tu ihsi cun mipi menmen nan si nawn lo; mipi kilhimtu ding, miphun ralkap kan si zo timi hi nan thinlung sungah cingkeng ringring hram uh. Ralkap pakhat cun rinumnak thawn tlunlam thupek pawl nunnak thap rori’n a tuansuak in a thlun ding. Ziangkim ah Pathian tihzah in ralringten a nung dingih, a tuah dingmi a tuanvo felfaiten a theih ding khal a poimawh zet. Nan liang parih a thum-aw mi tuanvo pawl felfaiten a tuahsuaktu si zuam uh. Kan miphunpi ih ruahsannak pawl nan parah a um timi hi thei ringring uh.

“Upatmi CNDF ralkap pawl, CNO/CNDF hi kan miphunpi ai-awh ih dothlengnak a tuahtu ralthuamkai pawlkompi kan si vekin, mipi hrangah kan tuan a si timi hi ziangtik hmanah hnglih hlah uh. Kan kut sungih ralthuam a um ruangah kan rianmi mipi pawl ih tih dingin kan um lo ding hi a poimawh tuk. Mipi dinpinak tel lomi Dothlengnak a hlawhtling dah lo timi cingkeng ringring uh. Kan kiangkap ih a ummi ralthuamkai dang pawl thawn khalin rualrem zetih um thei zuam uh. Kan dothlengnak kan hlawhtlin lohli theinak dingah kan kiangkap ralthuamkai dang pawl thawn lungrualten ralhrang ralkap kan dotlang thei ding hi a poimawh tuk. Nanmah le nanmah khal bulpak ta si loin, Dothlengnak pawlkom ai-awh ralkap nan si kha thei ringring in ziangkim ah ralring le fimkhur zetin cangvai ringring hram uh.

“A netnak ah, dothlengnak kan tuahmi hi thungaithlak in kan tuan cio pei uh tiah ka lo sawm duh. Nanmah hlanah kan CNDF ralkap 25 lai in ram le miphun hrangah nunnak an rak hlan zoih, hrekkhat in an taksa an rak hlan rero zo timi thei phahin, nehnak kan co hlan tiang dungsip thei kan si nawn lo timi lungput thawn raltha zetih kekar vivo dingah ka lo sawm duh hai. Diknak duhtu, kan miphun in Sersiamtu Pathian cu kan lamah a tan ruangah hi uknak tha lo lak ihsin kan ram le miphun runsuahnak, zalennak kan sualnak ah in umpi ringring ti thei phahin hmai kan nor vivo pei uh. Ramsung, ramleng um kan Chin mipi pawl ih ruahsannak le beiseinak pawl a takin kan tuansuak tlang cio pei uh. Nehnak cu kan ta a si! “Kan domi cu kan neh ding. Kan neh hlanlo kan do ding. Kan neh tengteng ding.”

“Pathian in nan zate’n lo kilhim camcin hram seh! Pathian in kan Chinram le miphun thlawsuah in zalennak in pe hram seh! Ram le Miphun hrang nan tuanpi, John David Commander in Chief tin CNO CNDF hotu cun Chin ralkap pawl sawmnak a neihmi a khar.

Thawngtla Tlansuak 5 An Kai Bet – Mandalay le naypidaw karlak lamzin ih tlansuak thawngtla 9 lakin 5 an kai zo ih pahnih an kap that ti’n ralhrang cun thu an suah.

March 1 ah Mandalay thawnginn ih thawngtla 21 pawl cu thawngtla mawtaw in Court ah fehpi an si ih, thawngtla 9 cun anmah kiltu palik pawlih meithal an lon hnuah an tlansuak. Thawngtla tlan pawl cu ralhrang pawlin an hawl cih ih March 2 ah thawngtla tlansuak 3 an kai ngah. An kaihmi lakah pakhat cu an kap that. March 3 khalah thawngtla tlansuak lakin mi 4 an kai betih an kaihmi lakin pakhat an kap tlan. Ralhrang in tlawngtla tlansuak 9 lakin 5 an kaisal zo ih, pahnih an kap that.

Palik naivai pakhat cun “Thawngtla tlansuak 9 lakin 5 an kai fel zo ih, pahnih an kap that. Palik hnenih an laksakmi meithal cu an hmusal hrih lo. Tu ah a dang kaih hrih lomi pawl khal theitawk an hawl rero lai a si,” tin a sim.

Dalan Ruangah PDF 9 Thi – Tanintharyi ramthen Kawhtuang myone Waidin khua kiangih PDF sakhan umnak cu Dalan pakhat in ralhrang pawl hnenih a simtheih tikah ralhrang pawlin PDF sakhan an luhcilh ih PDF 9 an thi ti’n Kawhtuang pDF cun thu an suah.

Kawhtaung pDF hotu cun ‘Dalan ruangah ralhrang in kan sakhan umnak an thei ih mipum tamzet thawn in luhcilh. Theitawkin kan rak kham aw nan, miraltha 9 kan can a si,” tin a sim.

Kawhtuang pDF cun “March 4, zinglam nazi 5:45 hrawngah ralhrang mipum tamtuk cun kan sakhan in luhcilh. Ralhrang pawl cu hmun 3 an then aw ih kan sakhan in kulh hnuah in kap. Theitawkin ralhrang pawl kan kap ve nan, kan sungtel PDF 9 cun ram le miphun hrang an nunnak an hlan. Mipum le ralthuam kan thlau aw tukih PDF pawlih ruang khal kan la thei lo.

“Doawknak ahcun ralhrang lam khal thi le hriamhma ngah an um nan, a zat kan fiah thei hrih lo. Ralhrang mipum 400 hrang an si. Ralhrawng cun kan sakhan umnak theitu pawl an hruai ih in ra kap. Kan sakhan ahcun pDF 15 an um ih mi 6 pawl cu an tlansuak man. Tu khalah boruak a sosang hrih ih kiangkap mipi pawl cu Thailand lamah an tlan,” tin mipi theihternak an nei.

Ralhrang ralkap khalin thu an rak suah ve ih, PDF 9 kan thianfai tlunah meithal zun 5, cerek 200, kut tuah bomb 38 le cet thilri dang kan laksak thei a si,” tin an tarlang.

China In Ralkap Hrang Sumpai An Pungter – China cun ramleng hnaihnoknak ruangah kan ram thaten kan kilhim a tul ti’n China ralhrang hrang hman dingmi sumpai an than.

Hitin China cun kum 1 sung ralkap hrangih hman dingmi sumpai an thannak vei 8 a si thlang. Tu netabik ahcun China in ralkap hrang dollar 225 billion hmang dingin thu an suah.

China in ralkap hrang sumpai an hman dingmi an than rualin sipuazi khal a let 5 in kan than ding tiah thu an suah tel. China cun sipuazi lam lawng siloin ralkap le ralthuam lam khal nasaten tan an la ih leitlun ah sibik an tum.

Cuti rualin US cun an ralkap le an ralthuam hmang dolllar 816 billion hmang dingin thu an rak suah zo. Leitlun huap dinhmun ah China hi US thluh ah ralkap le ralthuam hrang sumpai hmang tam ram pahnihnak an si.

Be the first to comment

Leave a Reply

Your email address will not be published.


*