China Lam Raldo An Man

China Lam Raldo An Man – US House Speaker Nancy in Taiwan a tlawn ruangah China an thinheng tukih Taiwan ramri ah nasaten raldo zirnak an nei phah. Asinan, China lam a takin cangvaihnak an nei lo ih, an thinheng a dai tum thlangin a lang.

Cuvek caanah US Congrees member pahnih tlunah tlangsuak upa hrekkhat cun thupten Taiwan an rak tlawngsal ih, Taiwan president an tong. Hivek ruangah China lam an thinheng tharsal ciamco ih, raldo kan man tin thu an suah.

China humhimnak vuanci zung cun “Chinese ralkap pawl cu raldo cingin timtuahnak an nei rero zo. A takih cangvaih hlanah raldo zirnak khirhkhan zetin kan nei. Ziangtik hmanah Taiwan lam anmahten an dingsuak lo dingih, US khal an thiltum an hlawhsam rori ding a si,” tin thu an suah.

China lam raldo an man thepthep nan, Taiwan in zalennak an phuan ding an hngak in a langih, a takih cangvaih taktak cu an nei hrih lo. Asinan, ziangkim ah an ralring thluh zo tin China lam cun thu an suah.

Taiwan ramdang palai cun “Kan ramri le innhnen sualtuk kan neih ruangah kan rualpitha pawl in ra tlawn khalle thaten kan rak kawm thei lo. Thuneihnak atcilhtu China in zalennak duh Taiwan parah thu an then ding a silo ih, rualpi kan tuah dingmi khal thunei thei an silo,” tin a sim ve.

Hivek ruangah China, Taiwan le US karlak boruak a sosang deuhdeuh ih, China lam ralthuam hmangin cangvaih țeuțeu an tum thlang. Asinan, tuini tiang Taiwan kap in an cangvai hrih lo ih, hngahmi an nei in a lang.