China Mipi In President Bangin An Phut – Leitlun in covid 19 natnak a suahnak hmun ti ih an ruahmi China ah covid 19 daan le kun khoh zetih an fehpinak hmun a tampi lai ih, cumi ruangah China mipi nasaten an buai.
Covid 19 natnak thawn pehparaw in China ram Urumqi khawpi ih an khummi mi 10 pawl cu innkang ah a thi. Cumi ruangah China mipi cun tuini tiang covid 19 daan le dun khoh zetih fehpi an silai cu an duh lo ih, China president Xi Jinping cu a hna in bang dingah an phut.
Urumqi khawpi lawngah siloin Shanghai khawpi le khawpi dang khalah duhphorhnak nei an um ih,duhphorhnak tuahtu pawl cun tuini tiang covid 19 daan le dun khoh zetih fehpi a simi an duh lo thu an aupi ih, covid 19 daan le dun khoh zetih fehpi hrih dingin thusuahtu China president Xi Jinping an duh lo thu khal an ausuahpi.
Hivek in buainak a suah tikah China cozah cun an ramsung buainak thuthang hrimhrim leitlun langsuak lo dingin an kham ih, online ah darh lo dingin an fehpi. China ahcun media le thuthanglatu pawl an zalen lo ih cozah hnuaiah um, cozah ih sianmi cin pawl tarlang ngam an si. Tu ahcun duhphorhnak tuahtu pawl cu China palik le ralkap pawlin an hrem , an vuak an kai ih, khoh zetin thu an fehpi. Cozah in khoh zetih thu an fehpi ruangah mipi lam an daimen pei maw timi cu caan in lai a rel vivo ding.
Amahten Khummi Daw Suh – Ralhrang in rampi thuneihnak an lak veten an kaihmi Daw Aung San Suh Kyi cu Naypidaw thawnginn hmun pakhatah amahten an ret ih ralhrang pawlin an kil thepthep tin thawnginn suak a hmutu pawl cun an sim.
Daw Suh ih umnak thawn pehparaw in thu a suak tam zet thlangih an thurelmi pawl khal a bangaw tlangpi. Daw Suh cu thawnginn sung hmun pakhat ,innte pakhat ah amahten ret a si ih, a umnak inn cu sangkate khal a nei lo,inn kulh fate takte ah tin an sim. Cucu ralhrang pawlin an kil thepthep ih, Daw suh umnak inn zuk khal darhsuak lo dingin an kulh thluh tin a hmutu pawl cun an sim.
Ralhrang in an thlah zalen zomi, Daw Suh Kyi thuronpetu Australia miphun Sean Turnell khalin “Yangon Insein thawnginn in Naypidaw thawnginn ah in kuat. Daw Suh cu Naypidaw thawnginn ih innpi sungah siloin thawnginn hmunram sung inn pakhatte ah amah lawng an ret. A kiangah tower 12 an retih a umnak zuk khal darh lo dingin ralhrang pawl cun an kulh thluh.
“Amah Daw Suh Kyi cu ralhrang in an kaih ruangah thanau , beidong le riahsia in a um lo. A suaksal thei rori a zum. Asinan, Putin ih cangvaih dan cu a mangbang zetih ramleng thil umdan pawl mak a ti tuk. Keimah hmangin ralhrang cun Daw Suh le ramleng pawl pehtlaihawk dan theihfeng an tum. Cucu, thu in suh dan hmangin ka theithiam.
“Court ih thusuh ka si hlan tinten Daw Suh thawn biakawk theinak caan in pe ih, Daw Suh sihni pawl thawn khalin thurelnak caan in pe. Asinan, tonglettu pawl cu anmah ralhrang hrilmi an si ih, kan rin hai lo. Naypidaw thawnginn sungih kan eimi rawl lakah lungto tete a tam ngaingai ih, ha a siat thei. Myanmar in mifim, rintlak le hruaitu tha an nei nan, cucu an kuthnuai ah retih, an kai. Daw Suh vek hi Myanmar in an phu lo a si, ” tin Dean Trunell cun Australia thuthang a simthei.
Ralhrang 21 An Thi – November 28 , Myanmar rampi huap hmun tinkim ih doawknak thusuahmi ah ralhrang 21 an thi tin hminsin tuahtu pawl cun an tarlang.
Tanintharyi ramthen Tanihtaryi myone, Tayetchuang le Dawei lamah ralhrang ralkap le mipi ralkap pawl an do aw peh ih, ralhrang 8 an thi tin PDF cun thu an suah. Karen ramkulh Bawlakhe khalah KNLA cun ralhrang pakhat an thianfai thu an tarlang. Sagaing ramthen Minkin le wetlet lam khalah doawknak a um peh ih, ralhrang 5 an thi tin PDF cun thu an suah. Makui ramthen Pauk myone ralhrang pakhat, Dagon myotit ah ralhrang 2 le Kalaymyo ah ralhrang 3 an thi tin PDF lam cun thu an suah.
Kalaymyo ih ralhrang thi timi cu Zayagyo lamzin pialnak ih umhmun khuar ralhrang ralkap pawl cu PDF komkhawm in an kap ih, ralhrang 3 an thi tin Ranger Kalay le an tuanpi pawl cun thu an suah. Tanintharyi Dawei ih ralhrang thi lakah ralhrang bawi pakhat a tel, PDF lamin an kai ih, meithal cuh in tlan a tum ruangah an kap that lawlaw. Ralhrang thi pawl cu anmah PDF pawl ih thusuahmi an si.
Min Aung Hlaing A Tawivak – Ralhrang hotu Min Aung HLaing cu November 28 ah Naypidaw in Makui ramthen lamah a tlawng ih, milian pawl a kawm vivo tin an sim.
Makui vuanci zungih hnatuan pakhat cun “Makui khawpi luhnak ih gate onpuai ah Min Aung HLaing a ra. Cumi hnuah Makui ih milian pawl a kawm. Milian pawl cun Min Aung HLaing an tong duh lo nan, ralhrang lamin thupek ih an fial ruangah an el ngam lo.
“Min Aung Hlaing Makui a thlen rualah Tada Oo vanzam sakhan le Hmawbi vanzam sakhan sungih ralhrang raldonak vanzam pawl an zamsuak rero. A then cun khawpi tlun an hel ih , a then cu hmundang ah an feh. Vanzam sakhan kiang cu ralhrang mawtaw 3 in an kil. Vanzam an zamsuak tikah Chin, Kachin le Karen lam ralring haiseh a tha ding,” tin a sim.
Brazil Le Portugal In Nehnak An Co – World Cup group hrang November 28 zan ah Brazil le Switzerland a nlek ih, Brazil cun 1-0 in Switzerland an neh ih, sungsuak an lut fel.
Brazil mithiam Neymar cu ke naa ruangah a tel thei lo ih, duh vekin Brazil hmaitlan lam hmuar a naa thei lo. Caan hrek hmaisa sawn ah goal a lut. Caan hrek neta sawn khalah goal a lut lohli cuang lo ih an duhtawk aw dingah ruah a siman. Asinan, minute 83 ah Brazil hrang Casemiro cun mawi zetin a sit goal. Brazil sawn in sit goal bet theinak caantha an nei nan, an hmang tangkai thei nawn lo ih, 1-0 in caan a cem.
Brazil in group puai veikhat lek ding an nei lai dingin puai 2 peh ih nehnak an co zo ruangah sungsuak an lut fel zo. Group G khal veihnih ciar an lek zo ih Brazil hmat 6, Switzerland hmat 3, Cameroon hmat 1 le Serbia hmat 1 tin an um. Switzerland , Cameroon le Serbia pawlin group G hrang sungsuak hmun pakhat an cuh aw bet ding.
Group H puai hnihnak hrang November 29 zingah Portugal le Uruguay an lek ih, 2-0 in Portugal in nehnak an co ruangah group puai khat lek ding umlai ah Portugal khal sungsuak an lut fel zo. Caan hrek hmaisa sawn ah goal a lut lo ih, caan hrek neta sawn minute 54 ah Portugal lamin a sit goal. Fernandes ih bawhlung tuahmi cu goal sungah a lut. Captain C.Ronaldo in amai sawh goal ah a ruat nan, zohfel a si tikah C.Ronaldo in bawhlung a rak sawh ngah lo ih FIFA cun Fernandes ih sit goal tin an ngankhum. Caan pekbet hnuah Fernandes cun Portugal hrang penalty in a sit goal bet.
Group H puai dangah Ghana in 3-2 in S.Korea an neh ih hmat 3 an nei ve. Group H ah Portugal hmat 6, Ghana hmat 3, S.Korea hmat 1 le Uruguay hmat 1 tin an um. Puai netabik ah Uruguay le Ghana an lek dingih Uruguay in an neh asile sungsuak an lut thei ding. Ghana in an neh lole an duhtawk asile Ghana in sungsuak a lut sawn ding. S.Korea hrang sungsuak beisei a mal ih, result dang zoh a tul tlunah goal tampi ih Portugal an neh a tul ding. cuvek cu a thlen zum a si lemlo.
November 29, tuizan in gruap puai netabik an lek thok thlang dingih a caan bangaw ah puai 2 ciar an lek thlang ding. Myanmar caan nazi 9:30 ah Group A puai netabiknak hrang Ecuardor le Senegal, Netherlands le Qatar an lek ding. Group A dinhmun cu Netherlands hmat 4, Ecuador hmat 4, Senegal hmat 3 le Qatar hmat nei lo an si. Qatar in sungsuak an beisei thei nawn lo ih,Netherlands hrang sungsuak lut dingin hmat 1 an duhtawk. Ecuador le Senegal puai a zohnuam dingih an puai result ih zir in sungsuak lut thei veve an si.
Tuizan lole zinglam nazi 1:30 ah Group B in Iran le USA, Wales le England an lek ding. Group B dinhmun cu England hmat 4, Iran hmat 3, USA hmat 2 le Wales hmat 1 pawl an si. Wales hrang sungsuak beisei a mal ih, goal tampi in England a neh a tul,cuvek cu a thleng zum a si lemlo. England, Iran le USA lakin team 2 in sungsuak luh theinak caantha an nei thluh.
Kanye West In US President A Cuh Tum – US rapper Kanye West cun 2024 ih US president hrilawknak ah US president a cuh ve ding thu mipi theihternak a nei.
Kanye West cun 2020 khalah US president a rak cuh ve ih, vote thawng 70 hrawng a rak ngah ve. Kum 45 mi cun 2024 ahcun nasaten ka ausuak ve dingih felfai zetin President ka cuh ve ding tin an sim. “2020 kha cu ka cangvaih a tlai tukih duh vekin mipi ka sawm man lo. 2024 ahcun mipi sawmnak khal nasaten kan nei ding tin a sim.
US president hlun Donald Trump khalin 2024 US president hrilawknak ah a cuhsal ding thu a sim zo ih, hmin khal ka pe zo tin a mipi pawl a simthei. Donald Trump sawn hi a mipi pawlin US president sisal dingah an beisei zetih, Kanye West sawn cu beiseitu a neih lemlo tlunah US president a cuh asikhalle a tlun an zum lo. Ziangahtile hminsiat a nei tamtuk ih a tongkam vekin tuahsuak lomi a nei tam. Curuangah mipi zum a hlawh lo.
Leave a Reply