Hakha Ih Feh Ralhrang Pawlih Tumtahmi A Fiang – Sagaing ramthen kalaymyo in Chin ramkulh Hakha khawpi ih feh ralhrang ralkap pawl cu Hakha an thlen fel zo bangin ziang an tuah dingmi khal a fel thluh zo tin kiangkap ih um pawl cun an sim.
Ralhrang ralkap mawtaw tamzet cun Kalaymyo in Chin ramkulh Falam khawpi an rak pan ih, Falam in Hakha an feh bet. Falam le Hakha karlak ah Chin ralkap komkhawm thawn nasaten an do aw ih, khatlam khatlam in thi an rak um. Ralhrang pawl cun lamzin tluanin mipi inn tamzet an urkang ih, mipi thilri tampi an fir.
A thok ahcun ralhrang pawl Hakha ah ziang an tuah ding timi thawn pehpar aw in thu 3 a rak suak ih, cumi thu 3 lakin pakhat cu ralhrang pawl Hakha ih an fehsan a rak si taktak. Hakha ih thleng ralhrang ralkap pawl cu Hakha le Thantlang karlak timit lilawn tuah ding an si tin mipi cun an sim.
Thantlang ih um ralhrang pawl eiin le ralthuam phur thei hlah haiseh tin Timit lilawn cu 2021, october 21, sun nazi 2 hrawngah mipi ralkap pawlin bomb in an rak puahsiat. Cumi hnuah Thantlang ih um ralhrang pawl ih tulsammi eiin le ralthuam cu Helicopter lawngin ralhrang dang pawlin an pe theu.
Tu ah ziang duhsan in ralhrang pawlin timit lilawn tuah an tum timi a san ciah felfai in theih a silo ih, a phunphun in rel dan a um. Ralhrang in Thantlang khawpi remthat sal an tummi ah timit lilawn cu poimawh tuk a si ih, cumi ruangah siko ding titu khal an um. Hrekkhat cun Thantlang ih um ralhrang pawl hrang lamzin an tuahsak siko ding titu khal an um ve.
Hakha ih um pakhat cun “Hakha ih thleng ralhrang ralkap pawl cu Thantlang le Hakha karlak Timit lilawn tuah ding an rak si. Tu ah Hakha Taiyin sizung ah zan 3 an riak zo ih, Timit lam an pan thlang ding. Lilawn tuahtu ding pawl cu anmah ralhrang pawl an si tlangpi nan, mipi thuamhnaw vek hruh in hnatuan ding khal an um. Lilawn an tuahsung cu ralhrang palik le ralkap pawlin an kil thluh dingih, ralhrang lamtang hrekkhat khal lilawn tuah ah tel an um men ding,” tin a sim.
KIA In Ralhrang 10 An That – Kachin ramkulh Waimaw myone Wuyan khua ih umhmun khuar ralhrang ralkap pawl cu July 28 zingah Kachin ralkap KIA pawlin an kap ih, a hmunah ralhrang ralkap le ralhrang bawmtu Lisu pituhsit komkhawm mi 10 an thih ih, ralthuam hrekkhat kan laksak thei tin KIA lamin an sim.
Wuyan khua ahcun ralhrang ralkap le Lisu pituhsit pawl an tangtlang ih umhmun khuarnak an nei. Cucu, Kachin ralkap KIA pawlin an kap ih, nazi 2 sung tluk an kap aw. Doawknak ih ralhrang thi an tam ruangah hmundang ih ralhrang pawl an thleng betih ralhrang thi le hriamhma ngah pawl an buaipi.
Khuami pakhat cun “kannih lam khalah ralhrang lamtang pituhsit an rak um vivo ih, anmah cu Lisu miphun humhimtu tin hmin an pe aw. Ralhrang thawn lungkimnak nei le ralhrang thawn tuantlang an si. Curuangah KIA pawl hrang ahcun lisu an si khalle ralhrang lamtang an si ruangah an do a tul thotho a si,” tin a sim.
Doawknak Ah PDF 4 An Thi – Sagaing ramthen Khin Oo myone Letpan Hlah khua kiangah Khin Oo PDF le ralhrang ralkap pawl July 27 ah nasaten an do aw ih, doawknak ah PDF lam 4 an thi tin Khin Oo PDF hotu cun mipi a simthei.
Khin Oo PDF hotu cun “Zinglam nazi 11 hrawngah a si ih, ralhrang ralkap cun mipum tamzet le ralthuam phunphun thawn kan sakhan in ra pan ih, kan do aw. Doawknak ah ralthuam le mipum kan thlau aw tukih, ralhrang ralkap cun kan sakhan pakhat an lak tlunah kan lakin miraltha 4 khal ralhrang do in an nunnak an hlan.
“Ralhrang pawlin Dalan hmangin kan umnak an thei in a langih, rinloparal ah kan sakhan la tumin in ra do. Cutikah kannih lam kan vavai deuh ih, ralthuam le mipum kan thau aw tuk vivo thawn kan himnak hrang kan tlan. Ralhrang pawl cun kan sakhan in M-22 meithal zunkhat, kuttuah meithal zun 17, kuttuah bomb 50 , kutden bomb kan tuahmi 40 le thildang hrekkhat in laksak thluh.
“Doawknak ahcun ralhrang ralkap lamin thi an um ve rori ding nan, a zat kan fiah thei lo. Kannih a nungdamlai pawl cun in liamsan zotu kan miraltha pawl hrang theitawk in ralhrang ralkap kan do vivo ding a si,” tin a sim.
Ralhrang In Kum 6 Nute An Kap That – makui ramthen Pauk myone Kiapit kan khua cu July 27 ah ralhrang ralkap pawlin an luhcilh ih, ralthuampi an kahsuakmi cun nauhak kum 6 nute a tlak that ngah.
Doawknak umriai loin ralhrang ralkap cun Kyatit kan khua an luhcilhmi a si ih, rathuampi an kahsuakmi cun kum 6 nute Theik Theik Phyu an tlak that ngah. Ralhrang ralkap cun July 27 thotho ah Kyauksauh khua ih kum kim pahnih Min Maung Maung ( kum 16 ) le Moe Yan Htet ( kum 16 ) khal an kahsungah meithal an thunlut ih, an kap that.
Khuami pakhat cun “Kum 6 nute cu ralhrang in ralthuampi in an kap that ih, inn hrekkhat khal an urkang. Ralhrang ih kahsuakmi ralthuampi ruangah midang khal hriamhma ngah an um hnuaihni. Ralhrang cun Kyauksauh khua khal an luhcilh ih, khua ih relh mino an kaih hnuah an kaa sungah meithal an thunlut ih, an kap that. Ralhrang pawl khua ih an luh hnuhnu cun tlan lo hrang a him lo lawlaw,” tin a sim.
UN Security Council In Ralhrang An Mawhthluk – Ram 15 telnak UN Securiy Council cun an zaten lungrual in ralhrang ralkap an mawhthluk ih, dankalh cangvaihnak bansan dingin an simthei.
UN Security Council ahcun China, France, Russia, UK, US, UAE, Norway, Mexico, Kenya, Ireland, India, Ghana, Gabon, Brazil le Albania pawl an um. Ralhrang in dothlengnak ruangih an kaihmi lakin mi 4 an thlaithatmi ah UN Security Council cun ralhrang an mawthluk.
Tuitum ahcun Member zaten lugnrual in ralhrang an mawhtluk ih, China le Russia khal ralhrang mawhtluktu ah an taang ve tin an sim. UN Security Council cun ralhrang cangvaih dan an mawthluk tlunah ralhrang pawl cu dakalh ih cangvai lo dingin, minung covo dan pahbal lo dingin le thlun dingin an theihter.
UN Security Council cun “Myanmar mipi in Democracy an dilnak cu kan dinpi ringring dingih, ralhrang pawl cangvaihnak khal kan hminsin thluh. Kannih cun Myanmar ram buainak ah remnak a um ih, buainak a reh ding cu kan duhbikmi a si,” tin an sim.
Myanmar Politic thiam pakhat cun “Hivek mawthluknak ahcun Russia le China in an el dah lemlo. Mawhthluk men cu a har lo ih, an mawhthluk hnuah an tuanpi thotho. China le Russia in ralhrang an țuanpi ruangah ralhrang pawl hrosuang phah an si,” tin a sim.
Israel Ralkap Thattu Ih Inn Bomb An Puah – Israel ralkap cun an ralkap rak that zotu mi pahnih ih inn cu July 26 zan ah bomb in an puah siat tin mipi theihternak an nei.
2022, April thla ah West bank kiltu Israel ralkap pakhat cu Palestine mi pahnih in an rak kap that. Israel ralkap kap thattu Palestine mi pahnih cu israel ralkap pawlin an kai ngah ih, an umnak inn felfai an theih hnuah an umnak inn khal an puah siatsak.
Israel cun ‘Hivek in kan tuahnak san cu kan karlak ah buainak le thahawknak um nawn hlahseh timi kan duh ruangah a si. A hlan khalah Israel ralkap thattu pawl cu a phunphun in hremnak kan rak pe rero zo ih, an umnak inn khal kan rak puahsiat rero zo. Curuangah Israel ralkap ummen siatsuah tum hram hlah uh.Israel ralkap nan thah cun nan him cuang lo ding a si,” tin Palestine lam an simthei.
Leave a Reply