Dubai Ih Hrantang Myanmar Nunau Pawl Myanmar An Kuat Ding

Dubai Ih Hrantang Myanmar Nunau Pawl Myanmar An Kuat Ding – Inn hnatuan dingin Dubai ih thleng Myanmar nunau 8 cun Dubai ih harsatnak an tuarmi cu Facebook ah an thlah ih, Myanmar mipi bomnak an rak dil. Dubai ah Myanmar Embassy a um hrih lo ih, Myanmar nunau pawl bomnak dilmi cu Saudi Arabia ih Myanmar Embassy in an rak theih tikah ziangkim an buaipi zo thu mipi theihternak an nei.

Saudi Arabia ih Myanmar Embassy cun “Khaing Lay timi facebook account cun Dubai ih Myanmar harsa tuar Myanmar nunau 8 pawl ih dinhmun cu August 25 ah a thlah. Thuhla kan rak theih tikah zamrang zetin Dubai ih Myanmar nunau 8 pawl cu kan bia ih, an puaisa pawl khal kan bia. Cuti kan tawlrel sak hnu ahcun Myanmar nunau 8 pawl cun an passport an ngah thluhsal ih, Myanmar ah an tlung thei ding.

“Hivekin ziangkim kan tawlrel rero laiah buainak dang suak bet lo dingin puaisa tuantu siseh Myanmar nunau 8 khal Dubai ih CID pawl cun anmai umnak hmunah an ret hrih. An zaten UAE ram an luh caan ah daan pahbalmi an nei maw timi cek hmaisa a si dingih, cumi ah daan pahbalmi nei lo pawl cu Myanmar ah kuat tlung an si ding.

“Kannih Saudi Arabia ih Myanmar Embassy cun UAE ram hruaitu pawl kan be ringring ih, Myanmar mipawl an luat theinak dingah le Myanmar ih an tlun lohli theinak dingah UAE ram, Dubai khawpi ih Myanmar pawlkom thawn ziangkim kan tuantlang a si,” tin thu an suah.

Dubai ih thleng Myanmar nunau pawl cu puaisa in room pakhat ah a kalhkhum ih, an hrang umnak ding a hmuhsak thei lo ruangah Iraq lamah kuat a tum. Room ih a kalhkhum lai khalah rawl khop pek an silo ih, Iraq ih feh ding cu an duh lo ruangah sangka an vuak siat ih, an tlansuak. Cumi hnuah Myanmar mipi bomnak dil an si.

Bomnak an dil laiah thu phunphun a um nan, harsat an tuar rori, puaisa in an khum rori timi cu felfai zetin fiah zo a si ih, karlak ah Politics pawl rak hrolh aw vivo in , an thu phunphun a suak. Asinan, harsa tuar taktak an si timi cu an fiah zo.

Myanmar nunau 8 pawl cu Sagaing ramthen Khin Oo myone, Kareni ramkulh Phekung myone, Pago ramthen , Taungkyi le Yangon ih um pawl an si. Thilthleng thawn pehpar aw in thuhla felfai theitu pawl cun “Puaisa in an passport pawl a laksak thluh hnuah room pakhat ah a kalhkhum rori a si,” tin an sim.

Thilthleng thawn pehpar aw in Dubai ih thleng inn hnatuan pakhat cun “Kan ram harsatnak ruangah lo theih loin ramdang kan feh a ttul ih, cumi ah tluang le tluang lo cu umdan. Asinan, thupi bik cu kan puaisa kan theihfeng ding le kan puaisa pawl an fel ding cu a si. Yangon kan umlai ihsin kan puaisa pawl ih sinak le umnak tiang kan sungte pawl kan sim ding a si ih,ramleng ah buainak kan tong pang asile in buaipi theitu ding puaisa hnen lawngah feh ding a si. Thupibik cu ziangvek buainak kan ton khalah kanmah siseh kan sungte pawl khalin kan puaisa zalen zetin thu an relpi thei ding cu a si,” tin a sim.

Pakistan Tilian Ah Mi 1000 Tlun An Thi Zo – Pakistan ram ih ruahcen ruangah ramsung hmun tinkim ah ti a lik ih, leimin ruangah mi 1000 tlun an thi zo tin Pakistan cozah cun thu an suah.

June thla ihsin Pakistan ram ah ruah a cen thokih, ruahcen ruangah mithi 1033 an um zo. Netabik nazi 24 sungah mithi 119 an um bet. Ruahcen ruangah tivapi pahnih cu tihnung dinhmun ah a um zo ih, ruah a cen vivo asile buainak rapthlak tong thei an si.

Tuhrih tiang ahcun hmun tamsawn ah ruahsur a han thei hrih lo ih, mipi in an tuar tuk zo. Sindh ramthen ah mi 347 an thi zo ih, Balochistan ah mi 238 le KP ah mi 226 an thi zo. Tilian le leimin ruangah mi 33 million in harsatnak an tong zo ih, tilian le leimin ruangah leiram eka ting 8 lenglo a siat zo.

Tilian le leimin cun zin KM 3451 tluk a siat zo ih, lilawn 149 a tisiat zo. Hitlukin tilian le leimin an ton ruangah Pakistan ram cun mipi hrang tihnung a si zo thu an phuangih leitlun ramdang pawl cu anmah bawm dingin an sawm.

Taiwan Ah US Raldonak Lawng An Feh – China in US ralrinnak an pek rero laiah US lam an hna a thak lo zetih, August 27 khalah US raldonak lawng pahnih cu Taiwan tipi ah an feh.

Taiwan tipi ih US raldonak lawng pahnih an feh thu ah a daan le kelte bangin China lam an lungawi lo tuk nan, a takih cangvaihnak an nei hrih lo. US cun kan raldonak lawngpi pahnih Taiwan tipi ah an fehduak tin thu an rak suah men.

US cun “Taiwan tipi ih kan feh ruangah buainak ding ciamco zianghman a um lo. Hivek cu ram pahnih tuantlangnak langtertu le ram khat le ram khat zalen zetin kan tlawng aw thei timi langtertu men an si,” tin an sim.

Taiwan cun anmah te ram dinfel dingin theitawk an zuam ih, cumi ah US cun nasaten Taiwan an dinpi. China lam cun an rampi sungah Taiwan thun kirsal an rak tum ve ih, cumi ruangah ram 3 pawl nasaten buai an si. Tuini tiang cu ralthuam hmangin cangvai an um hrih lo.