Dubai Ih Myanmar Nunau Pawl An Ttap – Kan ram Myanmar harsatnak ruangah leitlun ram dangdang ah hlawh aw in feh an tam ih, Dubai le Iraq lam tiang hnenum hnatuan dingin feh an um. Thenkhat tluang an um nan, a tamsawn tluang lo an tam ih, thawngtla tiang an um. Tu khalah Dubai ih harsa tuar Myanmar nunau pawl cun an dinhmun rel in mipi bomnak an dil.
Dubai ih harsa tuar Mah Khai Mala cun “Kannih cu Yangon in Dumai ah inn hnatuan dingih feh kan si. Yangon Agent Mi Mi ih tawlrelnak in Dubai kan thleng. Dubai ih Mah Htet Htet hnenah ziangkim kan pe ih Dubai Airport kan thlen hnuah mawtaw pakhat thawn in phur. An rel dan ahcun dubai zung an ti ih, cutawk ahcun tawk in kalh cih. Nikhat ah rawl veikhat in pe ih, cukhal kan khop in pe lo. Dai ti lawng thawn rawl in pe ih, in zoh dah lo. Puaisa cun in ngaihsak nawn lo, asinan kan phone nasat tuk ruangah a ra ih, hmundang ah in ret.
“Kala nu hnenah in retih, cukhal tawh in kalh thotho. Cumi hnuah in pehtlaih nawn lo ih, Dubai kan um caan ni 30 khal a luan. Cutikah Iraq ram ah ka lo kuat men ding in ti ih, kan el rero nan, nan feh lo asile ting 100 nan kuat ding in ti. Sumpai kan neih lo ruangah ramdang ah inn hnatuan dingin feh kan si ih, tu ahcun iraq nan feh lo asile ting 100 nan kuan ding in ti.
“Cuvek a si tikah kan tuar thei nawn lo ih, sangka kan vuak kiak hnuah kan tlansuak. Palik sakhan ah kan feh ih, bomnak kan dil nan, zianghman in bawm thei lo. Tu ahcun Myanmar khalah kan tlung thei lo, tlung thei lo dingin puaisa cun a rak tuah. Myanmar ih minung zuar palik pawl thawn an tuantlang ih, thubuai in tuahsak tin kan thei. Nan duhduh tuah uh, zianghman kan poi lo in ti men.
“Yangon ih puaisa khal Yangon umlai ahcun thutha tuk a rel rero nan, Dubai kan thlen hnuih harsatnak kan ton tikah an lo ret dandan in um men uh in rak ti ve men. Mah Mimi khalin nan duhduh tuah uh, zianghman ka poi lo a ti ve. Tu ahcun umnak ding kan nei lo ih, kan phone pahnih kan zuar hnuah ni 15 um theinak room kan sang. Ni 15 lawng caan kan nei thlang. Ni 15 a kim tikah khawiah kan feh ding, ziang kan tuah ding tikhal kan thei lo.
“Tu ah in bawm theitu nan um ding asile in bawm hram uh, kan kutah zianghman a um lo ih, kan cabu pawl khal in laksak thluh. Embassy pawl khal kan tuanpi thluh, palik pawl khal kan tuanpi thluh tin puaisa pawl cun in hro. Ni 15 lawng caan kan nei ih, in bawm theitu ding nan um asile in bawm hram uh.
“Dubai ram ah zokhal ra lo dingin kan lo sawm duh. Dumai ah Myanmar nunau tampi thawngtla an um. Puaisa pawlin ziangkhal an tuah sak thei lo. Iraq ih thleng pawl khal nasaten an buai. Rawl an khop lo, umnak ding an hmu lo. Ei ding nei lo an um ih, vansang an laam. Inn kan tlung duh tuk, kan nulepa khal an khawruah a har tuk zo. In bawm hram uh,” tin mipi dilnak an nei.
Tamu Ah CDM Sayamah A Awk That Aw – Sagaing ramthen Tamu khawpi bazar vengih um CDM sayamah Daw San Moh moh cu August 26, zanlam nazi 4 hrawngah an inn sungah hridai in a awk that aw.
Daw San Moh Moh cun a awk thatawk hlanah Court ah a feh ih, a pasal thawn an thenawknak ca ah lungkimnak hminkhen a va ngan. Cumi hnu inn a thlen veten inn sungah a awk that aw.
A thahawknak san ca nganmi a nei lo ih, a pasal in thenawk lungkim dingin a fial ruangah sipei maw titu an tam. Asinan, amah bikin a thahawknak san a sim lo tikah a thawknak san cu felfai in theih a silo.
Sayamah Dawa San Moh Moh cu mipi dinpi Federal Education ah zirhtu a ttuan ih, hivekin a thahawk thu ah Federal Education khalin uknak ca an rak suah ve.
Federal Education School cun “Kan hnenih hnatuan Sayamah San Mohmoh a that timi kan thei ih, kan riahse tuk lawlaw. Sayamah San Mohmoh cu ralhrang kuthnuai ah kun duh lo ih, mipi lamtang a si. Harsatnak phunphun lakah mipi hrang zirhtu hnatuan in theitawk a rak zuam ih, tlawngta pawl duhsak zettu a si.
“Ralhran in rampi thuneihnak an lak tikah cozah hnatuan pawl cun ralhrang uknak dokalh in CDm an tuah ih, CDM an tuah hnuah kan theihngilh men theu. CDM tuah pawl cu theihhngilh men ding an silo ih, an harsatnak an ton caan ah mipi in theitawk bawm ding kan si.
“Sayamah ih pekawknak cu ziangtik hmanah kan theihhngilh dah lo dingih, dothlengnak a tawp tiang kan keng vivo ding. Sayamah ih pekawknak cu dothlengnak thuanthu ah ngankhum a si ding. Tu ihsin thokin kan tlawng le sayamah pehparawknak zianghman an nei nawn lo timi thu kan suah ih, hmunuam thleng hram aw tin duhsaknak kan lo hlan,” tin thu an suah.
Leave a Reply