England Le Wales Ah Christian An Tlaniam Deuhdeuh

UK Ah Khristian An Tlaniam – Biaknak lam hminsin tuahtu pawl cun UK ih Christian pawl dinhmun pholangnak an nei ih, England le Wales ah Christian an tambik nan, UK ah Christian an tlaniam deuhdeuh ih, zatek sungin 50% hman an kim nawn lo tin thu an suah.

England le Wales ah zatek in mi 59% cun Christian ka si tin an rak rel aw nan, tuitum ih fiahnak an neih tum ahcun zatek sungin mi 46% lawngin Christian ka si tin an ti aw. UK ahcun Muslim an pungcak thungih a hlanah zatek in 4.9% fang an um nan, tu ahcun UK ah Muslim zatek sungah 6.5% an kim. UK ahcun Hindu khal 1.5% in 1.7% ah an pung ih Sikh biaknak ting 5, Buddhist thawng 27 le Judah biaknak thawng 27 tin an um.

England le Wales ih um zatek sungin mi 37% pawl cun biaknak kan nei lo tin an rel aw ih, UK ahcun Christian thluh ah biaknak nei lo an tam. A hlanah UK ih biaknak nei lo pawl cu zatek sungin 25% lawng an sinan, tu ahcu 37% an kim. England le Wales ahhin zatek sungin mirang 86% an um ih Asia 9%, midum 4% tin miphun an umkhawm. Australia ram khalah Christian an tlaniam deuhdeuh ih, biaknak nei lo an pungcak deuhdeuh tin thu an rak suah zo.

Kalay Ah Solar An Khong Cak Tuk – Sagaing ramthen kalaymyo ih um mipi pawl cun November 28 in meisa an ngah nawn lo ih, December 2 tiang meisa an ngah hrih lo ruangah Kalaymyo sungih solar le Battary zuar pawl an khong cak tuk tin an sim.

Kalay ih um pakhat cun “Tamu le Kalay lamzin an on ni ihsin Kalay ih um mipi pawl cun meisa kan ngah nawn lo. Gangaw myone ih meisa hmunpi a siat tin kan thei. Meisa hmunpi siat cu December 1 in an tuah thok ih, an theh mai ding tin thuhla cu a um. Asinan, thenkhat cun meisa hmunpi ih hnatuan thah a si ruangah meisa siat caan a rei men thei titu khal an um.

“Tu ahcun felfai in rel a theih hrih lo ih thuhla felfai sawn kan zingzoi rero lai. A hlan ahcun Kalay ah thlaithlak in meisa kan ngah nan, tu ahcun meisa a ra lo lawlaw. Curuangah Kalaymyo ih Solar le Battary zuar pawl an khong cak tuk. Thathun theih miti pawl khal an khong lawlaw. Ziangtikah meisa kan ngah ding tihi kan rel thei hrih lo,” tin a sim.