Pyu Saw Htee 5 An That – Makui ramthen Pauk myone thlanglam Pintuang khua ih, Pyu Saw Htee pawl cu bazar kai dingin an suak ih,lamlakah Pauk PDF in an rak kap that.
Pauk PDF hotu cun “September 13 sun nazi 1:30 hrawngah Pntaung khua ih Pyu Saw Htee pawl cu ei ding an neih nawn lo ruangah bazar kai dingin an suak. Lamlak ah an ralthuam thlah dingin kan ti ih, an duh lo tlunah in kap.
“Curuangah, kannih khalin kan kap ve ih, Pyu Saw Htee 5 an thi. Daiten kaih kan tum nan, an duh lo ih in rak kap. Curuangah kannih khalin kan kap that lawlaw. An kutin pistol zunkhat le cerek kan ngah. Hmailam khalah lamzin kan kil tha vivo ding a si,” tin a sim.
Facebook In Ralhrang Sualnak Tuahnak Hminsin Pawl UN An Pe – Ralhrang ralkap in duhtawk in Rohingya miphun an thah lai pawl cu Facebook lamin an haisuak sal hnuah UN zingzoitu pawlkom hnenah an ap zo tin UN zingzoitu pawlkom Nicholas cun a sim.
Nicholas cun “Tu cun facebook lamin ralhrang cangvaihnak phunphun in pe zo. A thok ahcun Facebook in an rak hlonsak thluh zomi a si ih, an phorhsuak sal thluh hnuah in ap. Kan donmi ralhrang cangvaihnak tamsawn cu anmah ralhrang pawl ih hmanmi facebook account an si,” tin a sim.
UN zingzoitu pawlkom IIMM cun ralhrang ralkap ih sualnak pawl ,miphun cimit tumih an cangvaihnak pawl an lakhawm rero ih ramleng Court in ralhrang an hrem theinak dingah theitawk suah rerotu an si.
UN zingzoitu pawlkom pawl donmi ralhrang sualnak pawl cu rampi thuneih an lak hnuih mi an thahnak pawl khal a tel. Ralhrang in rapthlak tukih mipi an thahnak 200 tlun an ngah zo. Ralhrang cangvaihnak ralkap hminsin an ngahmi pawl cu ICC court le ICJ Court ah thlen an tum.
Tu ah Gambia ram cun ICJ Court ah ralhrang pawl thubuai an tuahsakmi rel rero lai caan a si ih, ICJ Court cun ralhrang pawlih thiamthu relnak an rak hnonsak zo. Gambia ram cun ICJ Court ah Myanmar ralkap cu miphun pakhat cimt thluhtu sualnak tuahtu an si tin an hek.
Thubuai relfel a si tikah Gambia ram ih puh bangin ralhrang pawl an sungih, Gambia ram in ICJ Court ah nehnak an co asile ralhrang pawl hremnak pek ding an si. Asinan, tu ahcun ICJ Court in thufel an suah thei hrih lo ih, Court ah ralhrang thubuai an rel peh rero lai.
Danthiam Hlutdaw 9 In Putin Bang Dingin An Dil – Russia khawpi Moscow ih danthiam hlutdaw 19 pawl cun Russia president tuan rero lai Putin cu a hna ihsin bang dingin ca an kuat. Cumi ahcun hrilawknak ah dik lo zetin nehnak na la, Ukraine kan do reromi hi a san a um lo ih, Russia mipi hrang siatnak thlentu a si tin an theihter. Cucu, anmah Russia thuthang Moscow Times in mipi an thlah.
Russia in Ukraine an do reronak ah ramdang bomnak thawngin Ukraine lam an tang thei zetih Russia ralkap pawl ih luahmi hmunram an la kirsal rero zo. Hivek dinhmun ah danthiam hlutdaw palai 19 in Putin bang dingin an rak theihter tikah an hrang a him lo zet tin mithiam pawl cun an sim.
Danthiam hlutdaw palai 19 lakih tel pakhat Ksenia cun “A hna ihsin bang dingin Putin ca kan kuat. A hnuah kanmah lam dinpitu mipum 84 an um bet. Cumi pawl khal kan zohfel rero lai a si,” tin thu an suah.
Hivek ih cakuat cu mipi in ram hruaitu an duh lo tikah an tuah theumi a si ih, hivek cakuat ruangah Putin a bang cih ding tivek a um cuang lo thung. Putin sawn a thinheng sosang dingih, amah cakuattu pawl an him lo phah men ding tin thenkhat cun an sim.
Thu umdan cu Myanmar danthiam hlutdaw palai 19 in Min Aung Hlaing bang dingin cakuat vek a si ih, cuvek men ah thuneihnak atcilhtu Min Aung Hlaing a bang phah lemlo ding. Asinan, hludawt palai 19 rori in Putin an duh lo zia ca an kuat tikah Russia mipi in Putin an duh nawn lo timi langtertu a si ve.
Leave a Reply