ICJ Court In Ralhrang Thuburmi An Hnong Thluh

Kalay Ah Ralhrang 15 An Thi – Kalay PDF cun Kalaymyo thlanglam ih ralhrang an donak thuhla famkim cu July 22 zan ah mipi theihternak an nei ih, sunvuten ralhrang thawn an doawknak ah ralhrang 15 an thi tin thu an suah.

Kalay PDF cun “Ralhrang ralkap mipum 100 hrawng cu July 18 ah Kalay le kalaywah lamzin in Kalaymyo thlanglam an pan ih, July 21, zinglam nazi 8 hrawngah kannih Kalay PDF, CNDF, CDF KKG le RKDF pawl cun sunvuten kan rak do. Bomb kan puah hnuah komkhawm in ralhrang kan kap ih, ralhrang 15 an thih tlunah hriamhma ngah an tam.

“Doawknak ah Kanpale khua ih ralhrang hmunpi cun ralthuampi thawn sunvuten in rak kap ve. Ralhrang ralkap pawl cu zanlam nazi 4 hrawngah Kinmon Chung khua ah an lutih, mipi inn 7 an urkang. Zan nazi 9 hrawngah ralhrang ralkap cun lawng in ralhrang thi le hriamhma ngah pawl an phur.

“July 22, zinglam nazi 9 hrawngah ralhrang ralkap pawl cu Kinmon chung khua in Kalay lamah an feh. Ralhrang pawl an suah hnuah Kinmon chung khua kiangkap ih ralhrang kammi bomb pawl thianfainak kan nei ih,bomb puak ah kalay PDF sungtel pakhat hriamhma a ngah a si,” tin thu an suah.

PTTEP Company Bomb An Puah – Ralhrang ralkap thawn tuantlang PTTEP company innpi cu July 22, zinglam nazi 10:30 hrawngah bomb an puah. Thailand company PTTEP cu ralhrang thawn yinan le gas ah hnatuan tlang an si ih, Myanmar an suahsan duh lo.

Ralhrang in rampi thuneihnak an lak hnuah ralhrang tuanpitu company pawl cu Myanmar mipi lamin nasaten an dokalh ih ,Myanmar ram suahsan dingin an rak phut. Mipi nornak ruangah TOTal Company cun Myanmar an rak suahsan zo ih, PTTEP cun Total ih thilri hmuahmuah lei in ralhrang an tuanpi.

Hivek ruangah Yangon ramthen mayankung myone ih PTTEP company hmunpi cu bomb an puah. Bomb puak ruangah mithi an um lo nan, hnatuan pawl thinphang mangbang in an um. A hnu reilote ah ralhrang ralkap le palik pawl an thleng cupco ih, kiangkap ceknak an nei nan, bomb puahtu pawl cu an rak tlan thluh man zo. Tuitum cu ralrinpeknak hrang bomb an puahmi a si thu an sim ih, neta khalah ralhrang an tuanpi vivo asile an hnaihnok vivo ding tin an sim.

Kaya Ah Ralhrang 23 An Thi – Kaya miphun humhimtu KNDF cun July thla zarh thumnak sungih ralhrang an donak thuhla pawl cu July 22 zan ah mipi theihternak an nei ih, ralhrang 23 an thi tin an tarlang.

KNDF cun “July zarh thumnak sungah Demoso, Pruso le Phekung pawl ah ralhrang ralkap pawl thawn kan do aw. July 14 ih ralhrang kan donak ah ralhrang pali a thi ih, meithal zunkhat kan laksak thei. July 18 ih kan doawknak ah ralhrang 9 an thi ih, ralhrang pawl cun mipi inn le biaknak inn an urkang tlunah mipi kaihmi khal an nei.

“Juy 21 ih kan doawknak ahcun ralhrang 10 an thi. Ralhrang ralkap cun doawknak um lonak khalah duhtawk in ralthuampi an kap ciamco ih, mipi lakin hriamhma ngah an tam a si,” tin thu an suah.

ICJ Court In Ralhrang Thuburmi An Hnong – Gambia ramin ICJ Court ih ralhrang an hekmi thuhla thawn pehparaw in ralhrang lam cun dokalhnak ca an thehlut zo ih, ralhrang thehlutmi dokalhnak ca pawl cu ICJ Court in an hnonsak thluh.

Ralhrang lamih thuburmi thawn pehparaw in ICJ Court cun July 22 ah ralhrang thuburmi an rel ih, thuthentu zaten cun ralhrang ih thuburmi zaten an hnong thluh. Ralhrang aiawh in ICJ Court ah vuanci Ko Ko Hlaing, danthiam Dr.Thida Oo le an dungthlun pawl an feh.

Myanmar ralhrang cun Gambia ram cu Muslim pawlkom OIC aiawh in thubuai in tuah an si ih, cuvek menin kannih Myanmar hek theinak an nei lo tin an dokalhnak cu ICJ in Gambia cu UN sungtel le Denocide sungtel an si ruangah thubuai lo tuahsak thei an siko tin an let.

Ralhrang cun Gambia le Myanmar karlak ah ziang buainak hman kan nei lo ih, thubuai tuah thei an silo an timi cu ICJ in 2019 le 2018 ah UN in Myanmar ram buainak thawn pehparaw in palai kan thlah ih, cumi laiah Gambia le Myanmar karlak ah thu a rak um zo ih, thubuai tuah thei an si tin ralhrang an let.

Ralhrang cun miphun cimit tumnak thubuai thawn pehparaw in hminkhen kan rak ngan laiah thu felfai lo a um ih, cumi ruangah ICJ in Myanmar thuhla a rel thei lo an timi cu ICJ in thu felfai lo a rak um asikhalle sungtel sinak hminkhen nan rak ngan ruangah ICJ ah Myanmar thubuai rel thei kan si tin ralhrang an let.

Tuih an relmi cu ICJ in Myanmar thubuai rel theinak a nei, Miphun cimit tumnak sual ruangah Gambia khalin ICJ Court ah ralhrang hek theinak an nei timi nemhngetnak a si ih, ICJ court ah ralhrang in Rohingya miphun pawl an rak thah reromi thubuai pawl an rel peh vivo ding.

Tu cu ralhrang lamih phatnak , thubuai rel a tul lo, Gambia ramin thubuai in tuahsak theinak a um lo an timi cu ICJ Court lamin ralhrang relmi an hnonnak le ICJ Court ah ralhrang thubuai rel fel dingin thu an nemhngetnak a si.

Min Aung Hlaing In ASEAN Palai Thu A Tiam – ASEAN palai Prak Sokhonn cun neta Myanmar a feh leh tikah Daw Aung San Suh Kyi a ton thei rori a beisei thu media simnak a nei ih, Daw Suh Kyi tong thei dingin Min Aung Hlaing cun thu in tiam tin a relsuak.

ASEAN palai Prak Sokhonn cu Myanmar ah vei 2 a tlawng zo ih, avei hnih in Daw Aung San Suh Kyi ton a tum veve nan, a hlawhsam veve. Ralhrang ralkap cun thubuai nei lai hrimhrim ramdang palai kan tongter thei lo tin ASEAN palai ih dilnak an rak el rero men.

Asinan, tu ahcun ralhrang hotu Min Aung Hlaing ih thutiamnak ruangah Daw Suh tonthei a beisei thu ASEAn palai Prak Sokhonn cun mipi a simthei.

ASEAN palai Prak Sokhonn cun “Daw Aung San Suh Kyi ton thei dan lamzin a um tin Min Aung Hlaing cun thu in tiam. Curuangah, Myanmar ka tlawn leh tik ahcun Daw Suh Kyi ka tonthei rori ka beisei. Daw Suh Kyi cu Myanmar ram buainak ah thuhla falfai relfel theitu pakhat a si rori ding tin zumnak kan nei, Cumi ruangah Daw Suh ton duh ka si,” tin a sim.

Ralhrang ralkap cun ASEAN pawlkompi rori khal thu 5 an rak tiam nan, a takin an tuahter cuang lo ih, Daw Suh tong dingin ASEAN palai thu an tiammi khal an tongter taktak cuang lo ding tin hrekkhat cun an sim.

Japan PM Hlun Thlahnak Ah Min Aung Hlaing An Sawm – Japan cozah cun kan dungih thi Japan PM hlun Abe cu rampi hmin in 2022 September 27 ah thlahnak tuah an tumih, cumi ahcun ramdang palai tampi an sawm bangin ralhrang hotu Min Aung Hlaing khal an sawm ve tin Human Rights Watch cun thu an suah.

Japan in Min Aung Hlaing an sawmnak an thulhsal lo ih, Min Aung Hlaing khal Japan ah a feh tluang asile ralhrang ralkap in rampi thuneihnak an lak hnuah Min Aung HLaing hrang Japan a tlawn avei khatnak a si ding.

Human Rights Watch hotu pakhat Teppei Kasai cun “Ralhrang in duhtawk in Myanmar ram sungah mipi an that ih an hrem rero laiah Japan in an ram sung lut dingin ralhrang hotu Min Aung Hlaing an sawm timi cu Human Rights daan kan neihmi an pahbal rori.

“Curuangah Japan cozah cun Min Aung Hlaing an sawmnak thulh kirsal ding an si. Cuti a si lo ahcun mipi thattu, mipi hremtu, daan pahbaltu Myanmar ralhrang ralkap an dinpi tinak a si ding. Cucu, Japan cozah in ruat thasal dingin kan duh a si,” tin a sim.

Ralhrang ralkap in rampi thuneihnak an lak pekah Japan cun Myanmar mipi an dinpi thu, ralhrang an mawhthluk thu leitlun theih ah an rak aupi nan, a rei vivo tikah ralhrang lam an tuanpi sawn ih, ralhrang in rampi thuneihnak an lak hnuah ralhrang bawi 8 khal Japan ah zirnak nei dingin an rak feh zo.

Ridder In A Taikham A Humhim – One Championship Middleweight Champion taikhap cuhawknak cu July 22 zan ah neih a si ih, Champion taikhap hrang Champion lai Ridder le Bigdash an sual aw.

Round khatnak an thok ih, minute 1 sung an hler aw. Minute hnihnak hrawngah Ridder cun Bigdash a zawn ih buanthluk a tum nan, Bigdash sawn in fuh zetin Ridder hngawng a rak rek ngah ih a tlukpi. Bigdash in nehnak a co cih dingah ruah a sinan, Ridder a duai duh lo ih, amah rektu Bigdash kutin a talsuak thei.

“Minute 3 a thlen cun Bigdash kutin talsuak thei Ridder sawn tlunlam ah a ttangih, Bigdash a thong phah rero. Minute 2 sung dinhmun tha co tumin an ngerh aw rero ih, caan cemnak ding minute 1 lawng a duh thlangah Bigdash talsuak tum cu Ridder in a ke in a hngawng rori ah a cep ngah ih, Bigdash talsuak thei nawn loin a um.

“Caan cemnak ding second 30 hrawng lawng a duh thlang nan, Ridder ih cepnak ah Bigdash thawthaw thei loin a um ih Referee cun caan a cemter hnuah Ridder nehnak a pe. Bigdash a buai zet dingah ruah a sinan, a tha lohli thei ih, Ridder cun a taikhap a humhim sal.

Hitin Ridder cu one Championship ah Light Heavyweight le Middleweight Champion lai a si ih, puai 16 mi a sualmi ah nehnak a co thluh. Rihnak hmun 2 ah Aung La a neh veve hnuin Champion taikhap 2 cawi a si ih, zohman in an cuhsak thei hrih lo.