Leitlun ram 60 ih darh zo Monkeypox natnak cu India ram khalah an hmu zo ih, India cozah cun an ramsung State tin fimkhur dingin theihternak an nei.
India ram ih Monkeypox nat nei an hmuhmi cu UAE ram in India ram Kerala khawpi ah ttum a si ih Monkeypox natnak a nei timi an hmuh veten amah siseh amah thawn vanzam totlang midang 11 pawl khal sizung ah a dangten ret le tuamhlawm an si.
Monkeypox natnak cu taksa ah bol a suak ih, a thak tlunah khawsik le taksa naa khal a kengtel. Nat nei in olsamten midang a kaisawng thei ih, minung le minung tlunah ramsa khalin a kai theih tin harhdamnak zung lam cun an sim.
Leitlun ih Monkeypox natnak a darh peh rero laiah Covid 19 natnak khal a darh thoksal ih, Myanmar ramri Thailand le Singapore pawlah covid 19 natnak a luar ciamco sal. Thailand ah covid 19 natnak in mithi 28 an umthar ih, singapore khalah covid 19 natnak in mi 3 an thi ve. Myanmar khalah covid 19 natnak thar hmuhsuah a si tin harhdamnak zung lam cun thu an rak suah ve.
N.Korea In Ukraine Ram In Suak An Pom – Russia in Ukraine an do rero laiah N.Korea cun Russia an dinpinak langter in Russia in Ukraine ram sungih zalennak an pekmi Donetsk le Luhansk cu zalen ram nan si tin N.Korea in an rak phuang ve.
Russia in Ukraine an do hlanah Putin cun Ukraine ram sungin Donetsk le Luhansk cu Ukraine ram sungih um nan si nawn lo, ram zalen mahte ukawknak nei nan si tin thu an rak suah hmaisa. Cucu, Ukraine lamin an cohlang ve lo ih, Luhansk le Donetsk cu Ukraine in zalennak an pe duh lo. Luhansk le Donetsk ahcun Ukraine ram in suak duh mipi tampi an um ih, ralkap tiang an nei zo. Cucu, Russia lamin an theihsak ih, Ukraine rem tinak tel loin zalennak an rak pe.
N.Korea cun Luhansk le Donetsk ramthen hruaitu pahnih hnenah ca an kuat ih, nan zalennak kan lo pomsak ih, ram pakhat dinhmun ah kan lo pom zo. Curuangah nan ram sungah palai ret khal kan duh a si tin an theihter.
Hivek ruangah Ukraine lam an rak thinheng tukih, N.Korea thawn an pehtlaihawknak ziangkim an tawpter thluh ve. N.Korea cun Ukraine le Russia buainak ah US an mawhthluk ih, US ruangah Russia in Ukraine kap lawlaw an si tin an thusuah ahcun an tarlang tel.
Donetsk le Luhansk lam cun N.Korea ih cakuatmi ruangah an lungawi tuk thu an sim ve. Luhansk le Donetsk cu Ukraine ram sung Donbas ramthen sungih um an si ih, Luhansk le Donetsk ahcun Ukraine tong hnakin Russia tong hmang an tamsawn. Cumi ruangah 2014 kum lamin zalennak an rak sual ih, anmah te ralkap nei cin an si ve.
Russia in Ukraine a do hlan ihsin Donetsk le Luhansk ahcun Ukraine ralkap le zalennak duhtu pawl an rak do aw rero zo. Tu ah Russia cun zalennak an pekmi Luhansk le Donetsk cu a takin zalennak neihter an tumih, Donbas ramthen sungih um Ukraine ralkap pawl cu nasaten an domi a si.
Leave a Reply