Iran Le Israel Boruak A Sosang – Iran in Israel cimitnak hrang an buaipi reromi thupten Nuclear an tuahmi cu thehlam an pan rero thlang ti’n thu an suah ih , an theh man hlanah Israel in cangvaihnak an nei thutthi thei ti’n Israel lam thu a suak ve.
Iran in thupten Nuclear an tuahmi cu zatek sungin 84% tluk an theh zo ih tuah theh fel dingin thiltam a tul nawn lo. Hivek cu Israel hrang thutha lo zet a si ih, Arab ram in Nuclear an nei pang asile an hman hmaisabik tumnak cu Israel ram thianfai ding a si.
Iran in thupten Nuclear an buaipi rero ruangah Israel cun kan dung zarh ah Drone in Iran ralthuam tuahnak cetzung an rak kap zo. Asinan, Iran cun Nuclear an buaipimi an fehpi rero thotho. Israel cun Iran kah rori an duh thlangih American hnen khalah theithiampinak an dil zo. kan dungah US president Biden cun “An humhimawknak hrang a si ahcun Israel in an duhmi an tuah thei ko,” tiah a rak tongsuak zo ve.
Tu ah Israel cun ralthuam lam nasaten an buaipi ih Israel Prime Minister le Israel ralbawi bik khal February 22 ah tongaw in thureltlangnak an nei. Israel Prime minister cun Israel ralbawibik hnenah ralpi hrang timtuahnak nei dingin a simthei ih,Israel in Iran an kap thutthi thei ti’n The Times Of Israel cun a tarlang.
Russia in Ukraine an kap men ding ti’n thu a rak suah tikah mi tampi in an zum lo nan, Russia cun Ukraine an rak kap taktak. Tu ah Israel in Iran a kap men thei ti’n thu a suak ih, Isreal lam an cangvai taktak pei maw timi cu theih a si hrih lo. Leitlun ah buainak picang dang a suak leh thei ti’n thuhla theitu pawl cun an sim.
Ralhrang In Online Passport An Ong – Ralhrang ralkap cun February 24 ihsin online ah Passport dil a theihsal ding thu mipi theihternak an nei.
Ralhrang cun “Ramdang feh theinak Passport cu February 24 ihsin www.passport.gov.mm Website ah online in daan thar thawn booking a theih thlang ding. Online booking-nak hmunpi hi Yangon ah a si ih, ramthen le ramkulh ahcun a hlanih dil dan bangin fehpi a si ding. Online ih booking tuah tikah caan bikhiah a um lo ih cemzat ding bikhiah tuahciami bangin olsamten dil a theih ding.
“Passport hrang Online booking kan tuah tikah harsatnak kan nei asile umnak palik zungah suhlam theih a si ding. Zokhal olsamten dil theih dingin tawlrelmi a si ih, karlak tangka pek cop tul puaisa tivek hmang lo digin mipi kanlo theihter a si,” ti’n thu an suah.
Cobra miraltha pawl cun February 22 ah ralhrang an kap ih ralhrang pahnih an thi ti’n thu an suah ve.
Cobra Army cun “February 22, sun nazi 2:10 hrawngah kan lam panih ra ralhrang mawtaw 3 cu lamlak ah kan rak kap. Mawtaw ih um ralhrang pawlin in rak kap ve ih minute 15 sung hrawng kan kap aw. Ralhrang lamin Bomoe pakhat le ralhrang dang pakhat an thi ih ralhrang hriamhma ngah 4 an um. Ralhrang thi an um tikah ralhrang cun duhduh in meithal an kap ciamco ih mipi lakin pakhat an kap ngah. Kannih Cobra army lam khalin hriamhma ngah pakhat a um nan, a bese lo a si,” ti’n thu an suah.
Ralhrang In Myone 3 Martial Law An Phuang Bet – Ralhrang ralkap cun February 22 ah Sagaing ramthen sungin Swebo, Ayadaw le Wetlet myone pawl khal Martial Law an phuang bet. Ralhrang cun February 2 ah Sagaing ramthen sungin Indaw, Bamuah, Kawlin, Pinlebu, Hmiong, Salinkyi, Pale, Yinmarpin, Khin Oo, Taze le Yi Oo myone pawlah Martial law an rak phuang zo.
Ralhrang cun Sagaing ramthen sungin myone 14 tlunah Makui ramthen, Chin ramkulh, Tanintharyi ramthen, Mon ramkulh, Karen ramkuklh , Kachin rakulh le Kaya ramkulh pawlin myone 26 ah Martial law an phuangih ralhrang in February thla sungah ramsung myone 40 ah martial law an rak phuang zo. Ralhrang cun a hlanah Yangon ramthen sungin myone 4 le Chin ramkulh sungin Mindat pawlah Martial law an rak phuang zo. Martial Law an phuanmi pawl cu a caan bikhiah a um lo ih, buainak a um nawn lo hnu lawngah phelhsal si dingin an sim.
Sagaing ramthen sung ahhin mipi ralkap le ralhrang doawknak a sosang tuk ih a kumtel in an do aw thlang. Sagaing ramthen sungih ralhrang thi an tam tuk tikah ralhrang cun Sagaing ramthen sungin mipi inn tamtuk an urkang zo. Asinan, Sagaing mipi cun theitawkin PDF pawl an dinpi, an somdawl ih Sagaing ramthen sung myone 14 rori ah doawknak a sosang.
Leave a Reply