Tio Ih Ralhrang Sakhan An Kap – Chin ramkulh Falam peng Rihkhawdar vengthen Tio tlangih ralhrang sakhan cu mipi ralkap lamin drone in zan 4 bomb an thlak ih Tio ih ralhrang hrekkhat cu Rihkhawdar ralhrang hmunah an tthawn phah tin khuami pawl cun an sim.
August 2 in August 4 zan tiang zan 3 peh in Tio ih ralhrang sakhan cu mipi ralkap lamin Drone in bomb an thlak. August 6 zan ahcun zan nazi 12 hrawngin zinglam nazi 5 tiang mipi ralkap lamin Tio ih ralhrang sakhan cu drone in bomb 10 tluk an tlak. Hivek ruangah Tio sakhan ih ralhrang 15 hrawng cu ke in Rihkhawdar lamih an feh lai mipi cun an hmu.
Tio ih um pakhat cun “Zan 3 peh in bomb puak awn kan thei ih, meithal a puak phah. Cumi hnu zarhte zan ah bomb puak awn kan theisal ih, zanvarten a puak. Zing khawvang rual lawngah bomb puak awn kan theihmi khal a reh.
“Mipi ralkap lamin Tio tlangih ralhrang sakhan cu drone in bomb an thlak. Cutikah ralhrang lamin meithal an rak hmet puak ciamco. Zan 4 rori bomb thlak an si tikah ralhrang pawl cu an sakhan ah an um ngam nawn loin a lang. Hrekkhat cu mipi umnak inn ih relh an um bangin ralhrang 15 hrawng cu ke in Rihkhawdar ralhrang hmunpi lamih an feh kan hmu. Ralhrang sakhan ih bomb an thlakmi ruangah ralhrang thi an um maw ti cu kan thei lo a si,” tin a sim.
CDF In Rittheihsi Phur An Kai – Chin ramkulh Thantlang peng le india ram Mizoram ramri ah CDF Thantlang cun rittheihsi phur mi pahnih an kai ih daan vekin hremnak an pek ding thu mipi an theihter.
Rittheihsi phur mi pahnih cun Sagaing ramthen Kalaymyo in Chin ramkulh Thantlang peng sungah rittheihsi an phur ih, Thantlang peng sungin India ram Mizoram State sungah luhpi an tum. Asinan, Mizoram lam an luh hlanah mipi check Gate ah CDF Thantlang pawlin an phurhmi ritheihsi an rak kai ngah.
Rittheihsi an phurhmi bingrang cu 150gram rit a si ih, a tufang rittheihsi man vek asile ting 200 kyat a tling. Kaihmi pahnih cu Chin ramkulh Thantlang peng Fungkah khua in Pa Za Hup le Pa Van Za Ham an si. Kaihmi pahnih cun anmah lawng siloin ritheihsi phur midang khal Thantlang peng sungih an umlai thu CDF hnenah an simthei.
Myanmar ram a buai hnuah Chin ramkulh sungin India ram, Mizoram State sungah rittheihsi a lut tamtuk ih, Mizoram ih um Myanmar raltlan pawl an hmai a bal phah thluh. Hivek ruangah mipi ralkap lam cun Chin raltlan pawl zawn ruatin rittheihsi phur lo dingah mipi an rak theihter rero zo.
Chin mipi ralkap cun Mizoram lamih rittheihsi phur pohpoh an kaih tikah daan vekin hremnak an pek ding thu mipi an theihter ih, Kalaymyo ih Central Chin Pawlpi khalin Chinmi zaten Mizoram lamih rittheihsi phur lo dingin thu an suah tlunah Mizoram cozah khal rittheihsi phur an kaihmi pohpoh cu an phutawk hremnak pe dingin an theihter ve.
Chin Pafa Hnih In Ralhrang Bomb An Palpuak Ngah – Chin ramkulh Falam peng Rikhawdar ah Chin pafa hnih cun ralhrang kammi bomb an palpuak ngah ih, hriamhma a ngah veve.
Falam peng Khawthlir khua in Rikhawdawr ih feh Chin pafa hnihte cun an tlunlam ah Rikhawdar suahsannak hmunah ralhrang bomb kammi an palpuak ngah. Rikhawdar Khua an suahsan ding zawngah lamzin sirah zun thawh an tumih, zin zirih ralhrang bomb kammi an palpuak ngah.
Bomb a puak veten ralhrang sakhan cun meithal an hmet puak cih nan, Chin pafa hnihte cu an kap ngah lo. Asinan, Bomb puak ruangah hriamhma a ngah veve nan, bese tuk cu an silo tin khuami pawl cun an sim.
Mipi Ralkap Komkhawm In Yangon Lak An Tum – Yangon ramthen sungih cangvai mipi ralkap komkhawm pawl cu August 7 ah hmunkhat tein ZOOM meeting an nei ih, cumi ahcun Yangon lak an tum thu mipi an theihter.
Yangon ramthen Mipi ralkap komkhawm cun “Tumtah neih cu a sual lopi, cangvaihnak kan neih tikah tumtah nei tengteng ding kan si. Cuvekin kannih khal Yangon la dingin kan zuam dingih, Yangon lak kan tum ve. Cumi hrang ziangtin kan cangvai ding tivek khal kan ruat thluh zo.
“Yangon ramthen sungih ralhrang pawl cu hmun 3 in do kan tum. Hmaisabik ahcun bomb puah in kan cangvai hrih dingih, cumi hnuah nasa sawn in kan cangvai ding. Pathumnak ahcun bomb puah ih cangaih le nasa sawn ih cangvaihnak komkhawm in Yangon lak kan tum ding. Kan tum dan vek asile kum 1 cu pek a ttul ding,” tin mipi an simthei.
Hmaisabik ih cangvaihnak an timi bomb puah cu Yangon ramthen sung hmun tinkim ah a takin an hmang rero zo. Pahnihnak cangvaihnak an timi cu bomb puah tlunah meithal hman tel a si. Neta bik ahcun Yangon ramthen lak an tummi ah anmah Yangon mipi ralkap lawng siloin tlangpar ralthuamkai pawl thawn kom aw in Yangon khawpi do an tum tin Yangon mipi ralkap cun mipi an simthei.
“Tu ahcun Yangon ramthen sungah hmaisabik cangvaihnak bomb puah lawng ka ti thei hrih. A rei hlanah bomb puah le meithal hmangih cangvaihnak neih peh kan tum. Cumi ih zir in khawpi lak kan tum vivo ding a si,” tin Yangon mipi ralkap komkhawm cun an sim peh.
Yangon ramthen sungih cangvai PDF pawlkom 16 pawl cu 2022, April thla ah an rak kom aw thluh ih, June 27 in bomb puah ih cangaihnak an rak nei thok. Ziangtikah avei thumnak raldopi hram an thok ding, ziangtikin Yangon khawpi lak an tum thok ding tivek cu mipi an simtel lo.
Ralhrang Mawtaw Vak An Kap ih 7 An Thi – Sagaing ramthen Taze ah duty ih vakkual ralhrang palik mawtaw cu August 7, zinglam nazi 5 hrawngah Taze mipi ralkap komkhawm in an kap ih, ralhrang 7 an thi tin thu an suah.
Tase ih um pakhat cun “Zinglam nazi 5 hrawngah a si. Ralhrang palik mawtaw vakkual an kap ih, a sungah ralhrang palik 7 an thi. Curuangah tu ahcun Taze khawpi cu a hnok tukih, hmun tinkim ah ralhrang pawlin mi an cek. Buainak ruangah mipi suakvak an mal ih, dawr khar khal an tam. Ralhrang pawl an check Gate an thlen zik zawngah mipi ralkap lamin an rak bawh cia ih, ralring zetin an rak kap ciamco. Ralhrang palik mawtaw ih to palik 7 zaten an thi thluh ih, ralthuam laksakmi khal an nei a si,” tin a sim.
Israel Le PIJ An Kap Aw – Palestine ram Gaza ramthen sungih um muslim misual pawlkom PIJ cun August 6 zingah rocket in Israel an kap ciamco ih, Israel lam thinheng cun Gaza ramthen sungih PIJ pawl umnak dingih an ruahnak hmun pawl an kap ciamco ve.
PIJ cun kan hotu kah that a si ruangah Israel kap kan si tin thu an suah ih, Israel cun rocket ih kah kan si ruangah ni 3 sung Gaza kan kap ding tin thu an suah ve. PIJ lamih rocket kahsuahmi 400 lenglo cu Israel ralkap pawlin Israel ramsungih a tlak man hlan van boruak a umlai ah an kah thlaksak rero men.
Israel lamih kahsuahmi Rocket cu PiJ lamin van boruak a umlai ah an rak kap tla thei ve lo ih, inn tampi a siat phah tlunah mi 32 an thih phah zo. Mithi lakah nauhak 6 an tel. Israel cun nauhak thi pawl cu ratlan umnak hmunih um an si ih, kannih kahmi rocket ruangah thi an silo, PIJ lamih kahsuahmi rocket cu lamzin pial in raltlan hmunah a tla ngah ih, cumi ruangah nauhak thi an si tin thu suah.
Palestine ram Gaza ramthen ahcun PIJ tapung lawng siloin Gaza ramthen uktu Hamas pawl khal Israel hua tuktu le Israel cimit tumtu an si ve. Asinan, tuitum ahcun Hamas pawl daiten an um hrih. Israel in Gaza a kah ciamco ruangah UN Security Council pawl cu August 8 ah poimawh meeting an nei cih ding.
Khatlam ah China cun Taiwan an naih deuhdeuh ih, Taiwan lam ngaih a tha nawn lo. Russia in Ukraine an do reromi an cawlhsan duh hrih lo ih , Ukraine nisuahnak lam Donbas ramthen sungah nasaten an do aw peh rero hrih. Tu ah Israel le PIJ an buai ve. Cutikah leitlun remdaihnak duhtu UN pawl cu luzing, thinhar le mangbang in an um thlang.
Leave a Reply