KNU Ih Dawisuakmi Saw Ne Dar Mya In Ralkap Bur Thar A Din

Tamu Ah Dawr Nei Fapa An Kap That – Sagaing ramthen Tamu khua ih zudawr pakhat cu July 20 zanlam nazi 5 hrawngah ralthuamkai pakhat in a luhcilh ih , dawr nei fapa a kah that hnuah tangka hrekkhat an laksak.

Tamu ih um pakhat cun “Meithal keng pakhatin dawr a luhcilh ih, tangka a lak hnuah dawr neitu ih fapa kum 50 mi hrawng a kap that. Dawr ahcun Pyu Saw Htee pawl an lutsuak tam zet. Dawr neitu fapa kap thattu cu tangka a laksak hnuah a tlansuak hngal ih, zo a si felfai in theih a si hrih lo,” tin a sim.

Mithi ih ruang cu Tamu mibawmtu pawlkom pawl in an phur ih, Tamu pituh sizung ah an cek hmaisater. Ziangkim tifel a si hnuah vuiliam cih ding tin khuami pawl cun an sim.

Doawknak Ah Ralhrang 25 An Thi – Karen ramkulh Tanduang myone sungih ni 4 sung doawknak ah ralhrang 25 an thi tin Tandaung PDF cun July 21 zingah mipi theihternak an nei.

Tandaung PDF cun “July 15 in 18 tiang ni 4 sung ralhrang ralkap pawl than kan do aw. July 15 ah nazi 2 sung kan do aw ih, July 16 ah nikhat pum kan do aw. July 17 ah zinglam in sun nazi 2 tiang, zanlam nazi 4 in zan nazi 7 tiang kan do aw. July 18 ahcun nazi 1 sung hrawng kan do aw.

“Ni 4 sung kan doawknak ah ralhrang bawi pawl telin ralhrang 25 hnakin mal lo an thi ih, hriamhma ngah an tam. Doawknak ruangah ralhrang pawl cun kiangkap khua in inn 8 an urkang ih, caw 2, naa 2 le vok 5 pawl an that. Kiangkap khua pawl cu ralhrang pawl ruangah an tlan thluh a si,” tin mipi an simthei.

KNU Ih Dawisuakmi Saw Ne Dar Mya In Ralkap Bur Thar A Din – KNU ralkap KNDO ralbawi sinak in an dawisuakmi Saw Ne Dar Mya cun Kaw Thoo Lay Amry a dinfel thu mipi theihternak a nei ih, KNU khalin Saw Ne Dar Mya an dawifel thu ca an rak suah cih ve.

KNU in ralkap burpi pahnih an nei ih, KNLA le KNDO an si. Cumi hnuai ah ralkap bur tampi an um bet. Saw Ne Dar Mya cu KNU ralkap bur KNDO ah hotu rak tuan ringring a sinan , mi 25 thah thubuai ruangah KNU cun Saw Ne Dar Mya cu KNDO ralbawi sinak in an rak dawi.

Mi 25 pawl cu KNU ralkap KNDO pawlin an kaih hnuah thlingthlatu nan si, kan umnak kiangah nan ra ih, kan sakhan zohthupnak nan nei. Cuvek cu kan hrangah a him lo a si tin an that. Cucu, ralhrang pawlin mi 25 pawl cu thlingthlatu an silo, mipi menmen an si ih, lamzin le lilawn tuah ding an si tin KNU hruaitu pawl hnenah zual an ko. KNDO ralbawi Saw Ne Dar Mya cu mi 25 thihnak ih mawhphurtu bik a si ruangah hremnak pe ding nan si tin ralhrang pawl cun KNU dilnak an nei.

KNU tlunlam thuneitu pawl cun reizet thilthleng zingzoinak an nei ih, ralbawi Sa Ne Dar Mya cu KNDO ralbawi a sinak in an bangter. Ban a si hnuah ralbawi Saw Ne Dar Mya cun ralhrang pawl thuphan puhnak menih hremnak cu ka cohlang lo a ti ih, KNDO ah umpeh in ralhrang a do peh.

Asinan, July 18 ahcun ralbawi Saw Ne Dar Mya cun KNU siseh, KNDO hotu pawl khal NCA lawnglawng buaipi, ralhrang do ngam taktak lo an si ih, KNDO ah ka um a rem nawn lo, ralhrang do cimit dingin Kaw Thoo Lay Army kan din fel a si tin mipi a simthei ih, ca an suah cih.

Ralbawi Saw ne Dar Mya in Kaw Thoo Lay Army an din thu an suah hnuah KNU le KNLA khalin July 20 ah thu an suah cih ve ih, Saw Ne Dar Mya cu KNU in an dawlfel thu , Kaw Thoo Lay Army cu KNU le KNLA in an theihpi lo thu mipi theihternak an nei cih ve.

A tufang cu Karen mipi an buai zetih lamtang nei in an um. Dothlengnak mipi pawl cun a takin ralhrang pawl do rerotu Saw Ne Dar Mya an dinpi thu an sim ih, Karen le karen lakah doawknak picang a suak pang ding cu phan um zet a si.

Ralhrang Mawtaw Bomb An Puah – Sagaing ramthen Mungzua Distick Chuang Oo myone sung lamzin tluanih feh ralhrang ralkap mawtaw pawl cu Chuang Oo PDF in bomb an rak puah ih, bomb puak ah ralhrang 14 tlun an thi tin Chuang Oo PDF cun July 21 ah thu an suah.

Chuang Oo PDF cun “July 19 ah Mungzua in Chuang Oo lamih feh ralhrang rakap mipum 20 hrawng cu lamlak ah bomb kan rak puah ih, ralhrang thi 4 an um tlunah hriamhma ngah an tam. Ralhrang mipum 20 hrawng cu ke in feh an si ih, an dungih thluntu ralhrang mawtaw cu a siat ih, ralhrang hriamhma ngah pawl cu mawtaw 2 in an phur.

“July 19, zanlam ah Aung Chan Thar vengih um ralhrang mipum 6 pawl bomb kan puah ih an zaten a thi thluh. Ralhrang thi ruang 6 cu ralhrang mipum 10 hrawngin an phur ih, bomb kan rak puah bet tikah ralhrang mipum 4 an thi bet.

“July 19 thotho ah Sagaing in Mungzua lamih feh ralhrang mawtaw 14 cu lamlak ah bomb kan rak puah ih, ralhrang thizat kan fiah thei hrih lo. Ralhrang mawtaw bomb kan puahnak hmun ahcun thisen le ralhrang mawtaw siat thamte pawl a um tin thuhla kan thei zo a si,” tin thu an suah.

Tlawngkai Lo Hmin Cazin An La – Ayeyarwaddy ramthen Zaluan myone ah ralhrang phuanmi tlawngih tlawngkai lo nauhak pawl cu July thla zarh hnihnak in ralhrang lamin hmin cazin an la thokih, fate tlawngkai lo nulepa pawl cu thinhar in an um.

Zaluan khua ih um pakhat cun “Khawlal in a kaihruai ih, tlawngkai lo nauhak pawl hmin cazin an la rero zo. Hmundang ahteh an tuah maw ti cu kan thei lo. Kan khua ahcun kan mithmuh rori a si tikah nulepa pawl kan um a nuam lo. Ziangahtile, thil pakhat khat an tuah ding kan phang.

“Khawlal lamih rel dan vek asile tlunlam in fial ruangah tin an sim ih, hremnak ciamco cu an pek phah hmel lo nan, ziangruangah tlawng an kailo timi kan thei duh tin mipi in simthei vivo. Kan ram boruak cu umnak khal a tha nawn lo. Ziangahtile, tlawngkai pawl an thinphang ih, kai lo pawl khal kan thinphang. khatlam khatlam in tih an nungih lailak ah mipi cu tuartu men kan si,” tin a sim.

US In A Ram Mipi Pawl Myanmar Tlawn A Kham – US ramdang vuanci zung cun July 21 zingah a ram mipi pawl hrang ramdang thuhla theihternak an nei ih, ram 6 pawl ah tlawng hrih lo dingin, tlawn a tihnung thu an tarlang. US in a ram mipi pawl tlawng hrih lo dingih a timi ram pawl cu Myanmar, Hongkong, Iran, N.Korea, Russia le venezuela ram pawl an si.

Myanmar ram cu a tufang ralhrang ralkap in rampi thuneihnak an lak ruangah Myanmar mipi hrang hman a him lo laiah ramdang hrang cun a him lo deuhdeuh, ahleice in ralhrang le US cozah pehtlaihawknak a tha lo. Hivek ruangah US cun a ram mipi hrang kuantlawng ding tihnung ram 6 ah Myanmar cu hmaisabik ah an ret.

Hongkong khal China cozah thawn an buai hnuah US mipi hrang a him lo ih, Iran hrimhrim cu US cozah thawn ngaih aw lole khat le khat tlawng aw lo dingin hremnak pe aw an si. N.Korea cu leitlun ramdang hrangah tlawn a him lo hrimhrim ih, Russia cu Ukraine an do hnuah US cozah thawn ral aw le buainak nei an si. Venezuela ram khal an ramsung ukawknak a that lo tikah US cozah in hremnak a rak pe ih, a ram mipi pawl venezuela ram ah tlawng lo dingin a theihter.

US cun ram 6 pawl cu tihnung Level 4 ah a ret hai ih, tihnung level 3 pawl ahcun China, Comlobia, Ivoire Cote, Salvador, Mauritania, Sir Lanka le Uganda ram pawl an um. Level 3 ih China a um cu mipi an mangbang zetih Level 5 lamah um tlak an si tin thusuhnak nei an um. Asinan, China le US cu cozah dinhmun ah el aw, do aw an si ih, ram pahnih mipi pawl cu an tlawng aw rero hrih ko in a lang.

Covid 19 Thuah Linak A Hrang Thoksal – Leitlun ram tamsawn Covid 19 natnak in zalen zetih an um hnuah Covid 19 thuah linak tuar thok an um rero zo ih, nat nei an kaisawng aw ciamco.

China ah rampi huapin nazi 24 sungah covid 19 nat nei thar 1000 tlun an hmu ih, July 20 hnuah nazi 24 sungin covid 19 nat nei thar an hmuh tambik ttum a si tin China harhdanak zung cun thu an suah ih, mipi cu covid 19 natnak lamlkin fimkhurten um dingin an theihter. China ih covid 19 nat nei thar an hmuhmi lakah a tamsawn cu taksa ih lang lo an si ih, thenthum ih thenkhat pawl cu taksa ah lang cih an si.

Thailand khalah nazi 24 sungin covid 19 nat nei thar mipum 2000 tlun an hmu ih, nazi 24 sungah covid 19 natnak in thi mipum 25 an um tin Thailand Harhdamnak zung cun thu an suah.

Kan dung zarh lamah Thailand ram sungih nazi 24 hrang covid 19 nat nei thar an hmuhmi tlangpi cu mipum 1000 hrawng a si ih, tu ahcun nazi 24 sungah covid 19 nat nei thar mipum 2000 tlun an hmu thlang. Covid 19 natnak darhsal ah mipum thawng 24 tlun cu sizung ah theitawk in tuamhlawm rero lai an si tin mipi an theihter.

Japan le Singapore khalah covid 19 nat nei thar an hmu rero ve ih, mipi cu covid 19 natnak darh tharsal ruangah fimkhurten um dingin theihter an si.