Ram khat le ram khat buainak tlunah ramsung buainak ruangah leitlun ah raltlan mipi 100 Million an um zo tin raltlan hminsin tuahtu pawl cun may 23 ah thu an suah.
Hivek cu leitlun santhuanthu ah um dah lo a si ih, raltlan buaipitu pawlin an hminsin dan vek asile leitlun ah raltlan 100 Million an kim cu hminsin thar a si tin an tarlang. Raltlan tamsawn cu khat le khat ram buainak le ramsung buainak ruangah a sinan, cuvek silo ih raltlan khal an um.
Hrekkhat raltlan cu hmuhsuam an ton ruangah, minung zohdan vekin an zoh lo ruangah, thahrumthawh cangvaihnak ruangah tivek pawl an si ve. Myanmar ram telin Afganistan , Burkina, Congco, Ethiopia le Nigeria pawlah raltlan an tam. 2021 kumcem zawngih hminsin tuah dan vek asile Myanmar , Afganistan, Burkina, Congco, Ethiopia le Nigeria ram pawlah raltlan 90 Million an rak um zo.
2022 ahcun Ukraine ram ah raltlan an tam bikih, Russia in Ukraine a do ruangah Ukraine mipi 14 Million tlukin an ram an suahsan zo. Myanmar khalah ralhrang in rampi thuneinak an lak ruangah raltlan ting 5 tlun an umthar ih , a hlanih raltlan cia thawn Myanmar ah raltlan ting 10 zik an um thlang.
A hlanih raltlan cia timi cu Myanmar ram a buai hlanah tlangpar ralthuamkai hrekkhat le ralhrang an rak do aw theu ih, cumi ruangah Myanmar ram a buai hlanah raltlan ting 4 hrawng an rak um cia zo. Cupawl khal Myanmar ram a buai hnu khalah khua ah tlung thei hrih lo, tlung ngam hrih lo an si. Ziangahtile, doawknak a um peh lai tlunah khua kiangkap ah bomb kammi a tamih, bomb kammi pawl thianfai a si hlan sung cu an tlung ngam lo.
Leave a Reply