Tamu le Mohre ramri buainak cun hngong a nei vivo in a langih, manipur ahcun ramdangmi dawisuak dingin lamzawh duhphorhnak tiang an nei.
Pawlkom 19 in India ram prime Minister Modi hnenah ca an kuat ih, rampi mipum siarnak nei dingin le rammi silo ramdangmi pohpoh cu an ram ciar ah kuat tlung dingin an dil. Pawlkom 19 pawl cu manipur peng sungin miphun ci tinkim in an si ih, Modi hnenih ca an kuat hnuah Minipur CM hnen khalah ca an pe tel.
Lamzawh duhphorhnak nei mino pawl cun “manipur leiram ah India rammi sinak nei lawng umter ding a si ih, ramdang an tam tuk zo cu dawisuak a ttul. Northeast ah ramdangmi an pung deuhdeuh timi cu india cozahpi in a ngaihsak a ttulih, ramdang mipi lakin a ram mipi pawl humhim ding cu India tuanvo a si.
‘Hivekin dilnak kan neihnak san cu a rammi, hmunram neitu pawlin rammi sinak vekin kan covo kan hloh lonak dingah a si ih, ramdangmi pawl kaih an si tikah thubuai tuahsak le hremnak pek siloin an ramih kuat tlung ding cu kan duhmi a si,” tin an sim.
Myanmar ram a buai hnuah Myanmar mipi tamzet cu India le Myanmar ramri Mizoram le Manipur ah an tlan tlangpi. Mizoram cun India cozah rem tinak tel loin anmai thuten Myanmar raltlan pawl an ngaihsak, an buaipi ih, Manipur cun Myanmar raltlan an cohlan lo ruangah an rak kai rero zo.
Tu ah Manipur mino pawlkom 19 pawl cun an state sungih ramdangmi pawl an duh nawn lo ih, India cozah hnenah kai dingin le an ram ciar ah kuat dingin dilnak ca an thehlut. Hivek cu Tamu ih India rammi pahnih thah an si hnuin nasaten an buaipi salmi a si tin thuhla theitu hrekkhat cun an sim ve.
Mizoram Ah Chinmi 5 An Kai – Tui zarh sungah Mizoram palik le Assam palik pawl cun Myanmar in Mizoram sungih rittheihsi phur luttu Myanmar mi 4 le rukru Myanmar mi pakhat an kai.
July 11 ah Aizawl khawpi kiang Sihhmui raltlan umnak hmunih um Muana ( kum 25 ) cun Sihhmui ih mipi inn bauh dingih tawh a vuak siat laiah an kai ngah.
July 12 ah Champhai, dungtlang Check gate ah bingrang phur Hrang Kap Thang ( kum 22 ),Cung Lian Mang ( kum 36 ) le Mizoram ih um mi pahnih pawl kaih an si. An phurhmi bingrang cu 447 gram ih rit a si ih, a tufang India tangka in ting 224 man tluk a si. Hrang Kap Thang le Cung Lian Mang cun Chin ramkulh Falam pengih um in an rel aw.
July 14 ah Khawzawl check gate ah sichauh phur Lal Ngai Chin kaih a si ih, a phurhmi sichuah cu a tufang India tangka in thawng 27 man hrawng a si ih, amah cu Chin ramkulh Tedim peng sungih um in a rel aw.
July 15 ah Chaiphai Dungtlang Check Gate ah bingrang phur Nu Duh Lawng Thluai kaih a si ih, a bingrang phurhmi cu a tufang India tangka in ting 87 man, 93 gram tlukih rit a si. Nu Duh Lawng Thluai ( kum 36 ) cun Chin ramkulh Falam peng sungih um in a rel aw.
Ralhrang ralkap in rampi thuneihnak an lak hnuah Chin ramkulh sungin Mizoram lakih rittheihsi phur an tam deuhdeuh ih, Chin ralkap pawl humhimnak ah Chin ralkap pawl cun zokhal rittheihsi phur lo dingin Chin mipi theihternak an rak nei rero zo.
Myanmar ram a buai ruangah Mizoram ah Chinmi raltlan tampi kan um ih, India cozah sian lo cingin Mizoram cozah cun Chin raltlan pawl cu ralthat suah in thatukin an tuamhlawm rero. Hivek dinhmun ah Chinmi tamzet in Chin ramkulh in Mizoram ah rittheihsi an phur rero timi cu Chin raltlan pawl hrang theihnuam lo ngaingai a si ih, hrekkhat cu raltlan ih rel aw khal an um bet.
Falam Penguk Bawi Sangtu A Hlo – Chin ramkulh Falam ih um Falam penguk bawi sangtu Pau Deih Dong cu Falam in hmundang ah tthawn ding a si ih, lamzin tlunah a sungkua pawl thawn an hlo.
July 11 ah Pau Deih Dong cun a nupi le fate hruai in mawtaw pakhat thawn Falam khawpi an rak suahsan ih, Rihkhawdar lamah an feh. July 12 ahcun a sungte le rualpi pawlin Pau Deih Dong an be thei nawn lo.
Pau Deih Dong cu Falam in Shan ramkulh Caidung khua ih tthawn ding a si ih, ralhrang in rampi thuneinak an lak hnuah Falam ih umfang a si tin a rel. Falam ah buainak ciamco a nei lo nan, ralhrang hnuaiah hnatuan a si ih, a eithup nasa tin an sim bet.
Kalay Ah PDF In Mipi 50 An Runsuak – Sagaing ramthen Kalay peng Kyuakka khua ah ralhrang ralkap le Pyu Saw Htee pawlih kaihmi mipi 50 hrawng cu kalay PDF in an runsuak thei tin NUG cozah cun thu an suah.
NUG cun “Mipi 50 hrawng kaitu ralhrang ralkap le Pyu Saw Htee pawl cu July 14 ah Kalay PDF in an kap ih, Pyu Saw Htee 6 an thih tlunah Pyu Saw Htee 19 pawl an tlansuak thluh. Kannih NUG cun ralkap cu dankalh pawlkom ralhrang an si tin thu kan suah zo ih, ralhrang dinpi pawlkom neuhneuh ah tello dingin mipi khal kan lo theither zo.
“Kannih cun ralhrang ralkap ih dinpi pawlkom neuhneuh pawl cu ralhrang pawlkom an si ve ruangah kan do vivo ding tikhal kan lo theihter bet duh. Curuangah, ralhrang pawlkom ih tel nan um pang asile zamrangten mipi ralkap hnenah pe aw dingin le ralthuam thlah in mipi lamtang dingah kan lo sawm a si,” tin thu an suah.
Kalay Le Falam Ah An Kap Aw – Sagaing ramthen Kalaymyo Tahan veng ah mipi cun July 15 zan ah meithal puak awn an thei peh. Zan nazi 7 hrawngin mipi cun Tahan veng sungah puak awn an thei ih, veng tamsawn cun tawkfang nawn puak awn an thei.
Tahan ahcun July 14 zan in mipi in puak awn phunphun an rak thei zo ih, July 15 sun le zan tiang mipi in Tahan veng sungah puak awn an thei bet.
Tahan ih um pakhat cun “Pawlkom pakhat lawng mahte meithal hmet puak an silo ih, khat le khat an kap aw ti cu puak awn umdan in a theihtheih. Asinan, kannih mipi cun kahawknak thuhla cipciar kan thei hrih lo a si,” tin a sim.
July 15 , zan nazi 7 hrawng thotho ah Chin ramkulh Falam khawpi sungah mipi cun puak awn an thei ih, ralhrang hmunpi lamin a si tin an sim. Falam ih puak awn cu ralhrang pawl anmahte kahpuakmi maw, mipi ralkap pawl an kap aw ti cu felfai in theih a silo.
Ralkap In PDF 2 A Bawm – Magway ramthen, Myaing myone ralhrang sakhan sungih an khummi PDF pahnih cu sakhan sungih um ralkap ih bomnak zarin an tlansuak thei tiah anmah PDF tlansuak mi pahnih cun an tlansuah hnuah an relsuak.
Ralhrang sakhan sungah mipi lamtang ralkap/palik hrekkhat an um ih Watermelon Pawlkom tin an ko. Ralhrang sakhan sungih thilthleng cu video in an rak zuk thup ih midang fehtlang in online parah an tarlang ṭheu.
Kan dung June 12 ah ralhrang pawlin khuasung mipi 20 le PDF 2 an kai. Khuasung mipi pawl cu an suahsal nan PDF 2 cu sakhan sungah an khum. July 14 zan nazi 8:00 hrawngah mipi lamtang ralkap in an kaihmi PDF pahnih an khihnak pawl a phelhsak ih hmunhimnak lamah a tlansuahter hai.
Tuanvo neitu pakhat cun , “July 14 zan ah sakhan sungih um ralkap pakhat Watermelon sungtel cun PDF pahnih a tlansuahter hai. Watermelon ti lawngin kan ko ding, ziangahtile an himnak hrang an hmin tarlang an duh lo. Tlansuak PDF 2 cu hmunhim ah an um zo a si,” tin a sim.
Zirhtu Ruangah Tlawngtanu A Awk That Aw – Yangon ramthen, Mingaladon myone, Aung San Thurah Hla Taung School ih tlawngta nute cu an sayama le Sayakyi ruangah July 1, 2022 zanlam nazi 5:00 ah a awk that aw ih, An sayama le tlawnginn lamin a thuhla an thup tum rero nan a darhsuak thotho.
Zirnak thar an fehpimi ah phun 11 kai rero lai Ma Moe Myat Tun cu an sayama Daw Khine Khine hnenih tuition a kai lo ruangah an sayama cun a kawk ṭheu ih buainak phunphun a tuahsak tin a tlawngkaipi pawl cun an rel.
An sayama in Ma Moe Myat Tun cu ritheihsii a tham tin an Sayakyi ralbawi ṭuanlai Ye Myint Aung hnenah a hek. Cumi ruangah tlawngta nute cu hro a si ih, a thilton ruangah a awk that tin khuami pawl cun an sim.
Khuami pakhat cun, “An sayama in ritheihsii a tham tin sayakyi hnenah a hek ih,a phuang awkter bet. Cutikah, sayakyi cun rittheihsi na tham asile tlawnginn dawisuak na si ding tin a rak hro. Tlawng in dawisuak asile kum 5 sung khuitawk tlawnginn khalah tlawngkai an siang lo ding tin an hro.
“Cuvek a theih hnuah tlawngta nute cu inn lamah a tlung ih a ningzak tuk ruangah a awk that aw. A thih hnuah sibawi pawlin a taksa an cek ih, rittheihsi thamnak zianghman an hmu lo. Sayamah le tlawng sayakyi tongkam ruangah beidong ih that aw a si,” tin a sim.
A nu cun, “Ka fanu hi diklo zetin an hek ih, a thih hnuah zianghman thleng lo vekin thuthang an thup tum. Tlawnginn ihsin an dawisuak ding tin nulepa in ko, a thih hnu ahcun tlawnginn ah zianghman thleng lo vekin an um. Ka fanu, tlawng diklo ah ka rak lo ret sual. Ka fanu ee, na vanduai tuk aw,” tin media a simthei.
Leave a Reply