Min Aung Hlaing Be Dingin Pawlkom 3 Naypidaw An Thleng

CNO/CNDF In Sizung Thar An Nei – Chin miphun humhimtu CNO/CNDF cun Falam peng khua pakhat ihkhun 50 umnak sizung an din fel zo thu mipi theihternak an nei.

CNO/CNDF cun “Chin National Organization (CNO) ih Health Department hohanak in August 20, 2022 ni ah Ihkhun 50 tlem Suangdawn Sizung cu Falam peng ah tuanvo neitu upa pawl in ribbon tannak thawn onnak an nei.
Onnak Program ah Chin National Defence Force (CNDF) ih Chief of Staff Salai Peter Thang ih hohanak in Chin thantar upatpeknak, Ram le miphun hrang nunnak liamtu Martyr pawl upatpeknak le Chin National Anthem saknak neih a si ih local Pastor ih hramthok thlacamnak in program hmangthok a si.

Cui hnuah Chin National Organization (CNO) ih General Secretary Salai William Chin in hramthoknak thucah simnak a nei ih Assistant General Secretary(2) Salai Joseph in NUG Minisry Of Health le ICNCC ih kuatmi Capi siarnak a nei.

“Suangdawn Sizung thar hrang apnak thlacam neih a si hnuah CNO Assistant General Secretary (1) le CJDC General Secretary a tauntu Salai Timmy in Thusimnak a nei ih Khuanu/Khuapa aiawh in Pu Con Bawi in thucah simnak le Sunloihnak Capi peknak a nei.
Sibawi le PDF-Kalay ih Ralbawi in thucah simnak an nei ih CNO ih Health Department Secretary Salai Lai Lian Hmung in Lungawithu simnak a neih hnu ah Program baannak thlacamnak neih a si.

“A tu ih Onnak neihmi sizung hi kum 2021 CNO/CNDF din thok ihsin damlo zohnak thawn hramthok a rak si ih October 2022 ihsin Sizung ah hmanthokmi a si ih, PDF-Kalay ih Sibawi pawl thawn tuantlang in hlaimhma tuarmi mipi ralkap pawl operation tuahnak, nausarnak le mipi pawl ih hardamnak zohkhennak an nei rero a si,” tin thu an suah.

Ralthuam Famkim Thawn Ralkap 2 An Pe Aw – Karen ramkulh Myawaddy le Wawlay lamzin tluanih doawknak ah ralhrang pahnih cu ralthuam famkim thawn mipi ralkap lamah an pe aw.

Mipi ralkap ih kutih a pekawk hnuah pakhat sawn cun “Ralhrang pawl cangvaih dan kan lungkim lonak a rei tuk zo. Tlunlam ralhrang pawlin hnuailam ralhrang pawl cu duhtawk in an hmang tangkai. Ralhrang in mipi an that ih, mipi inn an urkang tikah ralhrang fawm hruh ding khal kan phur lo. Vei tampi CDm tuah dingin lamzin kan dap nan, lamzin a um lo tlunah sungte ngaihtuah thawn caan a rak um thei lo. Reipi suahnak ding lamzin kan dap hnuah tuitum lawngh kan tlansuak thei a si,” tin a sim.

Ralkap pahnih cu ralthuam famkim thawn mipi ralkap kutih pe aw an si ruangah NUG cozah cun laksawng an pe ih, KNDO hnenah an beuter. Tlansuak pahnih ih simdan vek asile ralhrang lakah CDm tuah duh an tampi nan, sungte ,innsang ruangah tlansuak thei lo an um bangin, lamzin dip rero nan, suahnak lamzin hmu thei lo khal an um tin’ an sim.

Min Aung Hlaing Be Dingin Pawlkom 3 Naypidaw An Thleng – Rakhine party ALP cu ralhrang hotu Min Aung Hlaing tong dingin August 21 ah Naypidaw an thlengsal ih, tuitum cu ralhrang in rampi thuneihnak an lak hnuah vei 2 an tonawknak ding a si.

Tuitum ah Rakhine party ALP lawng ralhrang hotu Min Aung Hlaing tong dingin Naypidaw thleng an silo ih, Pa-uh pawlkom PNLO le Lahu pawlkom LDU khal ralhrang hotu Min Aung Hlaing tong dingin Naypidaw an thleng ve.

Ralhrang hotu Min Aung Hlaing cun August thlasung ah a hlanih thu ka rak relpimi tlangpar ralthuamkai 10 pawl thu ka relpi sal dingih, September thlasung ah remdaihnak hrang thutiam kan ngan thei ka beisei a si,” tin a relsuak zo.

Ralhrang ralkap hotu Min Aung Hlaing cun remdaihnak hrang tlangpar ralthuamkai pawl thu ka relpi duh tin’ thu a rak suah ih, amah be duhtu pawl hminpe dingin a theihter. Cumi ahcun tlangpar ralthuamkai pawlkom 10 cun Min Aung Hlaing tong dingin hmin an rak pe ih, veikhat ciar an rak tong thluh zo. Tuitum ah avei hnihnak tongaw tumsal an si.

Min Aung Hlaing thawn remnak tuah duh tlangpar ralthuamkai pawlkom 10 pawl cu Rakhine Party ALP, Wah ralkap UWSA, Maila NDAA, Mon party NMSP, Shan RCSS, Karen DKBA, Karen KNLA PC, Pa-uh PNLO, Lahu LDU le Shan SSPP pawl an si.

UN Palai Parah NUG An Beidong – UN Myanmar palai Noeleen Heyzer in ralhang hotu Min Aung Hlaing a ton ruangah NUG an thinheng tukih an beidong tuk thu an tarlang.

NUG cun “August 17 ah UN Myanmar palai Noeleen Heyzer cun ralhrang hotu Min Aung Hlaing a ton thu ca a suah ih, cumi ruangah kannih cu kan beidong tuk lawlaw. Kannih cun ralhrang hotu Min Aung Hlaing tong lo dingin kan kham rero nan, a tong thotho.

“Tuitum ih an tonawknak san cu ralthuam hmangih cangvaihnak tawp dingin, mipi covo daan upat dingin, bomnak pek tikah hnaihnok lo ding timi le mipi umnak ah bomb thlak lo ding tivek pawl an si. Hivek cu NUG in kan theithiam hrih lai nan, dil leuhleuh in umzia a nei lo. UN Myanmar palai in ralhrang hnenih a dil hnuah ralhrang pawl cun Makui ramthen ah inn 600 tlun an urkang men.

“Un Myanmar palai in NUG cu mipi cozah an si timi a theih a ttulih, ralhrang pawl thurelpi an theih lo tikhal a theih a cu thlang. Tu ahcun kutkai aw in an tongaw ih, ralhrang bumnak thangsung ah UN Myanmar palai a lut zo. UN Myanmar palai cun Min Aung Hlaing hnenah mipi in Federal Democracy an phu tin a tong ko.

“UN Myanmar palai cun Min Aung Hlaing thawn an tonawknak san cu Myanmar ram buainak ah remnak a um theinak ding a si thu a tarlang. Asinan, tutiang ahcun Un Myanmar palai in ralhrang hnenin zianghman hlawknak telpi a nei hrih lo. Ralhrang ralkap pawl cun UN Myanmar palai Myanmar a thlen caan ah Daw Suh cu kum 6 sung hremnak an pe bet men ih, thawnginn sungah thupten thlaithatmi a nei bet.

“Tuih an tonawknak kan relfiang lawlaw asile UN Myanmar palai in ralhrang pawl an tlon hrih in a lang. Curuangah mipi rinnak le zumnak ngah a duh asile UN Myanmar palai in NUG cozah le tlangpar ralthuamkai hruaitu pawl sawn a ton dingmi an si,” tin NUG cun thu an suah.