Min Aung Hlaing Russia A Thleng

Min Aung Hlaing Russia A Thleng – Ralhrang lamin thu an rak suah zo bangin ralhrang Hotu Min Aung Hlaing khal a takin Russia ram a thleng fel zo ih, tuitum cu Russia lamin an rak hmuak thazet tin Russia media lam cun an tarlang.

Ralhrang ralkap in rampi thuneihnak an lak halnpi ihsin Russia ralkap le Myanmar ralkap cu rualpitha an rak si zoih, ralthuam thuhla ah an tuantlang rero zo. Ralhang in rampi thuneihnak an lak hnuah Russia le ralhrang pawl nasa sinsin in an tuantlang ih, Min Aung Hlaing khal rampi thuneihnak a lak hnuah vei 3 Russia a tlawng thlang.

Tuitum ahcun ralhrang hotu Min Aung Hlaing lawng siloin Chinese People’s Congress Standing Committee hotu bik,Armenia Prime minister le Mongolia Prime Minister pawl khal Russia an thleng ve. Ram 4 palai pawl cu September 7 ah Russia president Putin thawn tongaw ding an si tin Russia lam cun thu an suah. Cumi ah ralhrang hotu Min Aung Hlaing le Russia president Putin teh a hranten an tongaw pei maw timi cu theih a silo.

Russia le ralhrang an tuanpi tha aw zet nan, Min Aung Hlaing cun Russia president Putin a tong thei dah lo ih, Russia ralbawi pawl thawn lawngin an tongaw tlangpi theu. Tuitum ah ralhrang hotu, Russia president, China party hotu, Armenia PM le Mongolia PM pawl hmunkhat ah thurel ding an si ih, ralhrang le Russia an naih aw deuhdeuh in a lang.

Russia Embassy A Puak – Afghanistan khawpi kabul ih Russia Embassy cu September 5 ah misual pawlin bomb an puah ih, mi 6 an thi.

Mithi lakah Embassy ih hnatuan 2 an telih, culo cu duty hnatuan le a kiangkap ih um pawl an si. Mit hmutu pawl ih sim dan vek asile misual pahnih cun lenglam in Russia Embassy ah bomb an denglut ih Russia Embassy kulhsung ah a puak. Russia Embassy ih duty pawl cun misual pawl an rak kap nan, misual cun thicilh bomb a puak man thotho.

Thilthleng ruangah Russia lam an thinheng tukih, sual tuahtu an mawhthluk tlunah sual tuahtu pawl hremnak an pek rori ding thu an suah.

A hnu reilo ah Afghanistan ih ISIS pawl cun amai tuahmi a si thu an rak tarlang ve ih, Taliban uknak an duh lo ruangah bomb puah in an cangvaih vivo ding thu an tarlang.