kan dungah ralhrang ralkap cun raltlan thuhla ah Mizoram cozah ca an kuatmi online ah a darhsuak ih, cumi thuhla thawn pehpar aw in Mizoram cozah cun ralhrang thawn an biakawk dan thuhla felfai mipi theihternak an nei.
Mizoram Home Minister Pu Lalchamliana cun “Ralhrang ralkap in ralthuam rinsan in Myanmar rampi thuneihnak an lak tikah mi tampi cu hramlak ah an tlan ih, thenkhat cu Mizoram lamah ratlan khal tampi an um. Kan hnenih Myanmar raltlan pawl an rat tikah kan CM Pu Zoramthanga khalin theitawk a buaipi timi khal India cozahpi in an thei.
“A thokte ah India cozahpi in Myanmar raltlan pawl kuat kirsal thluh uh tin thu in pe nan, kan CM Pu Zoramthanga cun kan kuat kirsal thei lo ding, kan unau ka thinsen zompi an si ih, kan theitawk in kan tuamhlawm sawn ding tin India cozahpi a let. Cutikah kannih Mizoram cozah lawng siloin NGO, YMA le kawhhran pawlkom tiangin Myanmar raltlan pawl cu theitawk in kan buaipi ih kan bom. Kannih Mizoram cozah cun raltlan pawl an umsung cu theitawk ih bawm dingin kan man ringring.
“Mizoram cozah lawng siloin Mizoram mipi khalin raltlan pawl tuamhlawm peh vivo ding cu an duhmi a si ve. Kannih cun Myanmar ram a thatsal ding cu kan duhpi bikmi a si. Khatlam ah zirnak le harhdamnak ah an tlaksam tuk lonak dingah cozah cun theitawk ttan kan la ih, tlawnginn tiang dinsak an si tlunah tlawng thatha khalah kai thei an um. Cangthei sehla Myanmar ram buainak a reh tikah an tlun leh ding cu anmai duhmi le an hlimnak bik a si ding khal kan zum. Ziangtik ni ah cuvek a thleng ding ti cu kan thei lo nan, buainak a um nawn lo tikah an ram ih an tlun thei ding cu kan duhsakmi a si ve.
“Tulai ah Myanmar raltlan pawlin an harsat tuk ruangah rittheihsi an phur, an zuar tin thuhla tampi a darh nan, kannih cozahpi dinhmun cun cuvek fiahnak kan hmu hrih lo. Raltlan pawl ruangah rittheihsi zuar le phur an tam timi fiahnak cu tuini tiang kan nei hrih lo. Cuti rualin ziangruangah rittheihsi phur le zuar an tam timi felfai sawn thei dingin zingzoinak kan nei peh rero lai.
“Kannih mizoram cozah le Myanmar ralkap cozah thupten kan dawr aw maw ti asile thupen kan dawr aw lo,ralhrang cozah lam cun in be rori ko. Kan dungah Kolkatta Myanmar Embassy hnenin cakuat kan dong. Cumi ahcun Mizoram ih Myanmar raltlan pawl in dil ih, kannnih khalin ca in kan let zo. kannih khalin Myanmar raltlan pawl an tlung kirsal asile ziangtluk humhimnak nan pe ding? an him tin ziangtin thu in tiamthei ding tin thu kan rak sut? Raltlan parih nan thinlung put dan diktak in sim uh tin kan sutsal ih, tuini tiang cu ca in kuat sal hrih lo.
“July 14 ah ca kan let ih, thupthiar in be aw kan silo. Ram khat le ram khat cozah fehdan vekin in dawr ih, kannih khalin kan hmuhdan kan rak sim a si hrih. Curuangah, tu hrih ahcun Mizoram ih Myanmar raltlan pawl kan dawr tlung thluh ding tivek thu zianghman a um hrih lo timi khal mipi ka simthei duh a si,” tin a sim.
Leave a Reply