Myanmar Mi 16 Zuar An Tong

Myanmar Mi 16 Zuar An Tong – Shan ramkulh le Kachin ramkulh sungin China ih feh Myanmar mi 16 pawl cu China an thlen hnuah zuar an si tin buaipitu pawl cun an sim. Myanmar mi 16 pawl cu CHina ram Yunan ramthen an thlen hnuah puaisa le company tuantlang cun mi pakhat ah China Yuan thawng 5 in an zuar hai.

Buaipitu pakhat cun “Kan nau a telih, puaisa kan biak tikah nanmai rem tinak le siannak in zuar kan si tin in hro men. A thok ahcun ramsung ih hnatuan dingin an koih, neta ah China lamah an zuar. Tu ahcun anmai thuten an tlung thei nawn lo ih, hrem le velh an tuar rero. Myanmar mi 11 pawl cu Jinhong khua ah zuar an si ih, a dang 5 pawl cu hmundang ah an zuar. A leitu pawl cun Myanmar mi pawl cu online ah mibum ding hawl an fial ih, sumpai an hmuh that lole an vel , an hrem.

“Tu ahcun an phone pawl khal company hotu pawlin an lak sak thluh ih, leng suah khal an kham. Innpi pakhat ah an khum ih, hlawh thitha pe loin an sor. Duhduh in an sor ih, Online ah mibum le lawngkasa in hna an tuanter. An suah theinak dingah theitawk kan suah rero a si,” tin a sim.

Ralhrang In Timit An Kap Bet – Chin ramkulh Hakha peng Timit hmunram ah ralhrang ralkap le mipi ralkap pawl an do aw peh ih, ralhrang pawl cun November 22 zing khalah tlunzuang raldonak an hmang.

November 21 khalah ralhrang ralkap cun Timit hmunram sung doknak ah tlunzuang raldonak an rak hmang zo. Asinan, mipi ralkap lam an him ih, November 21 doawknak ahcun Chin ralkap pawlin ralhrang ralthuam thenkhat an laksak thei.

November 22 zingih an doawknak thuhla cu mipi ralkap lamin thu an suah hrih lo. Ralhrang ralkap cun November 22 khalah tlunzuang in timit hmunram sung bomb an thlaksal. Ralhrang pawl cu Timit hmunram ihsin Thantlang lam feh vivo tum an si ih, Chin ralkap pawlin an rak kham tikah hmailam an pan thei lo. Ralhrang pawl hmailam an pan thei lo tikah tlunzuang raldonak an hmang ciamco nan, mipi ralkap pawl cun theitawk in ralrhang pawl an kham peh rero ih, boruak a sosang.

Hakha ih um pakhat cun “A tufang cu nitin deuh thaw vanzam awn kan thei. A caan ah ralhrang raldonak Helicopter awn kan thei ih, a caan khal ralhrang raldonak vanzam awn kan thei. Timi lamah doawknak a sosang ngaingai a si,” tin a sim.

Tamu Ah Ralhrang 10 Thi – Sagaing ramthen Tamu le Kalay karlak ASIA lamzinpi ah Tamu PDF cun ralhrang pawl bomb an puah ih, ralhrang 10 an thi tin mipi an theihter.

Tamu pDF tuanvo neitu cun “Mani ah Paditar bomb in ralhrang pawl bomb kan puah ih, a malbik ralhrang 10 an thi. Ralhrang thi pawl cu anmah ralhrang pawlin an mawtaw ah an san ih an phurh hnuah kalay lam an fehpi. Thuhla kan theih dan vek asile ralhrang cun Russia hnenih ralthuam an leimi pawl cu India in Tamu lamah phurh luh an tum. Cumi ralthuam pawl phur dingah ralhrang pawl cun mipi mawtaw vek 14 an hman phah. Paditar bomb 11 in ralhrang mawtaw bomb puah kan si.

“Ralhrang in ralthuam phurhnak ih an hmanmi mawtaw 14 pawl cu Tamu le Kalay karlak ah an umlai ih, cucu kannih lamin kan bawh. Cumi ruangah Tamu le Kalay karlak lamzin cu mipi zawh hrih lo dingin thu kan suahnak san a si,” tin a sim.

India Palai In Ralhrang A Tong – India ramdang palai cun November 21 ah ralhrang ramdang palai Wana Maung Lwin a tongih, ramri thuhla relnak an nei.

Ram pahnih palai tonawk thu ah ralhrang cun “India ramdang palai pawlin November 21 ah kan ramdang palai an kawm. Ram pahnih tonawknak ahcun ram pahnih pehtlaihawknak , thilri leiawk dan , sumpai tuah dan le tuantlang dan ding tlunah ramri thuhla phunphun khal kan rel. Kan biakawknak cu ram pahnih hrang tangkai dingin tawlrel a si ih, cumi ruatin thu kan rel a si,” tin thu an suah.

Ralhrang ralkap in rampi thuneihnak an lak hnuah India cun ralhrang a tuanpi peh rero ih,neta ahcun langpang zetin India palai le ralhrang palai khal an tongaw rero thlang.

Minister of Defense Meeting Ah Ralhrang An Sawm Lo – ASEAN Minister of Defense meeting cu tui zarh sungah tuah ding a si ih, ASEAN Minister of Defense cun ralhrang palai an sawm ve lo.

ASEAN Minister of Defense meeting ahcun ASEAN sungtel ram pawl tlunah American, China, Japan le ramdang pawl khal an tel. ASEAN Minister of Defense meeting cu November 23 in Cambodia ram ah an tuah thok dingih Meeting ahcun American le China palai khal an tel ding.

ASEAN ramdang palai meeting le ASEAN ram hruaitu meeting ahcun ralhrang tel an siang lo hrimhrim ih, Defence meeting ahcun ralhrang an rak sawm theu. Asinan, tuitum ahcun Defence meeting khalah ralhrang an sawm duh lo ih, ramleng ah ralhrang pawl hmuar an nei lo deuhdeuh in a lang.

Myanmar ram buainak ah ASEAN cu remnak tuah dingin leitlun cun an beisei zet nan, tuini tiang ASEAN pawlkompi cun Myanmar ram buainak an tifel thei lo ih, ralhrang thawn be aw tha mumal thei loin an um. A thok ahcun ASEAN in ralhrang pawl remnak 5 an tuahpi nan,tuini tiang ralhrang pawl cun ASEAN thawn remnak 5 an tuahmi an pitlin duh lo. Cutikah ASEAN sungtel lak khalah ralhrang be duh nawn lo tiang an um thlang.