Phukpi In Chin Nupinu A Tlak That – Chin ramkulh Hakha peng Hakha khawpi naivai ah mipi ralkap cun August 10 zingah ralhrang an kap ih, ralhrang lam cun duhtawk in phukpi an kap ciamco.
Ralhrang ralkap ih kahsuakmi phukpi cun Hakha in peng 6 hrawng hla ih um Hniarlawn khuami pakhat a ngah ih, a thi. Pi Cia Hnem cu Hniarlawn an inn sung an umlai ah ralhrang kahmi phukpi cun a tlak ngah. Ralhrang ih kahsuakmi ralthuampi ruangah Hniarlawn khua sungin inn tamzet a siat phah tin khuami pawl cun an sim.
Kan dung khalah ralhrang ralkap cun Hniarlawn khua in mi pakhat an rak kap that zo ih, khuasung thilri duhduh an rak laksak. Doawknak a um tinten mipi an thih khalle a poi lo tivek deuh in ralhrang ralkap cun duhduh in Phukpi an kap ciamco theu.
Kalay Ah Nupate Ih Bike An Long – Sagaing ramthen Kalaymyo Buda kiang Tat oo Tida vengah ralthuamkai hrekkhat cun bike ih phur aw nupa an dinter hnuah meithal in an tin ih, an bike an lonsak.
August 9, zanlam nazi 4 hrawngah nupate cu Myohla ih an hmuan zoh dingin an feh ih, lamzin ah ralthuamkai thenkhat in an rak dingter. An pa sawn cu Pistol in a lu an vei 4 sawh ih, an nu sawn khal meithal in an tin. Cutin an bike an laksak ih an tlan.
An sungte pakhat cun “Myohla ih an hmuan thianfai dingin feh tum an si. Upukchuang Lilawn kiangah fawm hruh lo ralthuam keng pawlin an rak dingter ih an bike an laksak. Bike an laksak hnuah ralthuamkai pawl cu an tlan cih ih, an nupa cu ke in an tlungter men. Bike laksak lo dingin zangfah an dil rero nan,kut an thlak hnuah bike an laksak thotho” tin a sim.
Bike an lonsakmi cu Kenbo 125 a si ih, bike an lonnak kiangah ralhrang zung a um. Bike lonsak an si hnu reilo ah kiangkap um pawl cun fawm hrih lo ralhrang pawlin Kenbo 125 bike thar pathum an mawnlai an hmu. Ralhrang pawl mawnmi Kenbo bike 3 lakin pakhat cu nupatei ta an lonmi siko ding tin kiangkap um pawl cun an sim bet.
Ralhrang In Tlawngta Nauhak Pawl Bomb An Thlak – Kaya ramthen Loilinlay myone Dawpapa’ khua cu ralhrang ralkap in August 9 ah raldonak vanzam in bomb an thlak ih, zirhtu pawl le tlawngta nauhak pawl cu aihram in tlawnginn sungah an relh.
August 9, zinglam nazi 10 le 11 karlak ah ralhrang ralkap cun Dawpapa’ khua cu raldonak vanzam in vei 3 bomb an thlak ih ,khua sungin putar pakhat a thih tlunah hriamhma ngah 2 khal an um.
Khuami pakhat cun “Doawknak a um lo nan, ralhrang ralkap cun raldonak vanzam an hmangih, khuasung bomb an thlak. Nauhak pawl cu cazir dingin tlawnginn ah an um zo ih, ralhrang in vanzam in bomb an thlak tikah tlawnginn sungah tap phah in an relh. Mipi kaihruainak in tlawngkai an si tikah ralhrang pawlin bomb an thlakhrim a si ko ding,” tin a sim.
Ralhrang Innpi Bomb An Puah – Kachin ramkulh Bamaw khawpi ih ralhrang pawl umhmun khuarnak innpi cu August 10, zinglam nazi 11 hrawngah Bamaw PDF in bomb an puah ih, a kang.
A kiangih um pakhat cun “Bomb puak a ring tukih, innpi a kang cih. Innpi sungih um lakin mithi le hriamhma ngahzat cazin felfai kan thei hrih lo. Innpi kang cu a hnu reilo ah an mit thei nan, thilri siat phah cu a um rori a si,” tin a sim.
Bamaw PDF cun “Mipi hnenih kan lo sawm duhmi cu ralhrang ralkap pawl do vivo ding kan si ruangah zokhal ralhrang ralkap naivai le kiangkap ah rak um lo dingin kan lo theihter duh a si,” tin thu an suah.
NUG in Malaysia ca an kuat – Malaysia lahwahkah pawlin Malaysia Selangor peng Kajang ih ramdangmi pawl an kaih ciamcomi ah Myanmar rammi 115 an tel ve ih, cumi thuhla thawn pehpar aw in NUG ramdang vuanci cun Malaysia ramdang palai hnenah ca an kuat zo tin’ mipi an theihter.
NUG ramdang vuanci cun “Kannih NUG cozah cun Malaysia lahwahkah pawlih kaihmi Myanmar rammi thuhla thawn pehpar aw in Malaysia ramdang palai hnenah ca kan kuat zo. A rangthei bikin remawknak tuah thei kan tum ding a si,” tin thu an suah.
Malaysia lawahkah cun an ram sungih um ramdangmi passport nei lo cu a runin an kai theu ih, thubuai tuahsak an si hnuah thawngtlakmi khal an um. August 9 zan khalah Malaysia lawahkah cun ramdangmi pawl umnak innpi an luhcilh ih, Myanmar rammi 115, Indonesia rammi 33, Bangladesh rammi 13, Nepal rammi 9, Sri Lanka rammi 4 le India rammi 1 pawl khal an kai.
Kaihmi zaten Malaysia um theinak Passport nei lo hlir an si ih, thupten Malaysia ih um an si ruangah kaih an si. Kaihmi lakah sungkua ih kaihmi tivek khal an um ih, nauhak tete khal an tel.
Bangladesh In China Bawmnak An Dil – Bangladesh cun ramsung ih Rohingya raltlan pawl Myanmar ih kuat tlung an si theinak dingah China hnenah bawmnak an dil.
2017 kum ih, Rohingya le Myanmar ralkap buainak ruangah Rohingya mipum ting 7 hrawng cu Myanmar ramri Bangladesh ram ah an rak tlan ih, Myanmar cozah cun Myanmar ih tlungsal dingin an pom lo. Myanmar rammi sinak an nei lo ih, Myanmar ram ah tlun theinak an nei lo tin an sim.
Bangladesh khalin an ram sungah Rohingya raltlan pawl an um ringring ding cu rem an ti ve lo ih, Rohingya raltlan thu China bomnak an dil. China cun ralhrang pawl remnak an tuahpi thei dingih, Rohingya pawl khal Myanmar ah an kirsal thei ko ding tin Bangladesh lam cun beiseinak an nei.
Rohingya pawl cu leitlun ram dangdang ah thek aw an si ih, ram felfai an neih lo tikah leitlun in an iai thluh.Thenkhat Rohingya cu India rammi sinak nei an um ih, thenkhat cu Myanmar rammi sinak ,Malaysia rammri sinak nei le Bangladesh rammri sinak nei tivek an si.
Leave a Reply