N.Korea In Missile An Kap Suaksal – N.Korea cun October 4 ah bomb zamthei an zohsinmi cu Japan timpi parah an kap tla ih,Japan, US le S.Korea pawl an lungawi lo. Cumi ruangah US le S.Korea tangtlang cun October 5 ni ah bomb zamthei Missile an kapsuak ve ih, ramri kiangkap an hal.
Hivek menah N.Korea lam an rak thinphang lo nasa ih, October 6 zing ahcun N.Korea in bomb zamthei Missile pahnih an kap suaksal. Hivein zarh hnih sungah N.Korea cun bomb zamthei Missile vei 6 an kapsuak thlang. N.Korea cun US le S.Korea in kanmah tihrim in bomb zamthei an kah ruangah cumi ralrinpeknak hrang bomb zamthei kapsuak sal kan si tin thu an suah men.
Hivekin N.Korea zalen zetih an cangvaih tikah US cun UN meeting ah N.Korea hrembet dingin thu an thehlut nan, China le Russia in N.Korea an rak hum tiin US lam cun an sim. China lam cun hremnak pekawk rero hi remnak a silo ih ,cu hnakin hmaiton ih thurelpi sawn hi remnak a si tin an sim. Russia le China hi UN vito power nei an si ih, UN in an duhduh in thu a relcat thei ve lo.
N.Korea khal China le Russia ruangah hro an suang deuhdeuh in a langih,US tihnak sihte tiatte khal an nei nawn lo. N.Korea cun US tiang kap thei ralthuam kan nei zo ih, Nuclear bomb khal ka ram humhimnak ding ahcun kan hmang mai ding tin thu an rak suah ve. Hivek a si tikah N.Korea hi leitlun buainak suakter theitu an si thei in a lang.
Ziangahtile, N.Korea in US an tih lo tukih US in N.korea a kap asile China le Russia in N.Korea an humhim hngal dingin a lang. Cutin ,lamtang nei ram pawl an kap aw ciamco thei. US an cangvaih taktak lo asile N.Korea in hngal zetin bomb zamthei an kapsuak rero men ih, tuikum sungah N.Korea in bomb zamthei vei 15 tlun an kapsuak thlang.
Tedim Ih Bomb Puak Ah Mi Pakhat A Thi – Chin ramkulh Tedim khawpi ralhrang umhmun khuarnak yhnuailam ah bomb a puak ih, mi pakhat a thih tlunah naunau pakhat khal hriamhma a ngah.
Tedim ih um pakhat cun “Zan nazi 9 hrawngah bomb a puak ih a hmun mipa pakhat a thi. Nunau pakhat hriamhma a ngah ih, anmah ralhrang pawlin Kalay ralhrang sizung ah an kuat zo. Bomb puak ruangih thi cu October 5 ah kan vuiliam zo.
Ralhrang pawl cun an umnak hmun kiangkap ah bomb a kam thluh. Ralhrang hmun kiangkap ah ziang an tuah ti cu kan thei lo. Tu khalah ralhrang in an sakhan humhimnak hrangih bomb an kammi an va palpuak ngah siko. Mithi cu Tedim ih rawldawr neitu ih pasal a si ih, hriamhma ngah rawl dawr neitunu Daw San’ Cho ih naunu a si” tin a sim.
Ralhrang In Phungki Tlawng Bomb An Thlak – Karen ramkulh KNU hmunram 6 nak ,Winyi’ myone ih phungki tlawng cu October 6 zingah ralhrang ralhrnag ralkap raldonak vanzam 4 cun bomb an thlak ih phungki pakhat hriamhma ngah a um tlunah Phungki tlawng khal a siat phah.
Khuami pakhat cun “Ralhrang pawl ziang an duhsan kan thei lo, zingpit ah phungki tlawng bomb an thlak ih a kang. Bomb puak ruangah Phungki tlang a siat phah ih, phungki pakhat khal hriamhma a ngah. Phungki tlawngah mipi ralkap an um ti zawngin ralhrang hnenah thusimtu dalan an um khal a si thei.
“Asinan, mipi ralkap lam cu mipi tuar ding zawngih an cangvai dah lo ih,phungki tlawng khalah an um lo. Ralhrang pawlin zokhal kan zah nawn lo, ziang biaknak inn khal siatsuah poi kan ti nawn lo timi a langter sawn khal a si thei. Tu cun ralhrang pawl rapthlakzia cu rampi huap mipi theihfeng tukmi a si,” tin a sim.
Ralhrang in phungki tlawng bomb an thlak ruangah a kiangkap ih um mipi pawl cu phungki tlawng naivai ah an um ngam lo ih, hmunhim pan in an tlan thluh hrih.
Ralhrang In Japan Tlangval Hremnak An Pe – Ralhrang ralkap cun Yangon ih an kaihmi Japan tlangval cu kum 7 sung thawngtla dingin October 5 ni ah hremnak an pe ih, October 6 zingah mipi an theihter.
Ralhrang ralkap cun Japan tlangval cu rampi thangsiat timi le pehtlaihnak daan a pahbal timi hmangin kum 7 sung thawngtla dingin hremnak an pe ih, Myanmar um theinak lah-wah-kah daan thawn thubuai an tuahsakmi cu Court ah an rel peh rero hrih. Curuangah ralhrang pawlin Japan tlangval an hremnak hi a tam bet vivo thei in a lang.
Yangon Dagon myotit ih lamzawh duhphorhnak nei mino pawl rak zuk rerotu Japan tlangval July 30 ah ralhrang pawlin an kai ih, thubuai 3 an tuahsak hnuah Insein thawnginn sungah an khum. Ralhrang in Japan tlangval an kaih thuhla ah Japan palai cun ralhrang pawl a be zo nan,ralhrang pawl cun Japan palai khal hmaisong loin hrmenak an pe thotho.
Leave a Reply