NUG In PDF le Ralhrang Thizat An Phuang – NUG cozah ih lailak president Duwa Lashi La cun rampi huap ralhrang do caan an rak phuanmi kum 1 kim ni ah mipi thusimnak a nei ih, an tumtahmi le cangaihnak pawl mipi a simthei.
NUG lailak president Duwa Lashi La cun “Tuini September 7 cu NUG cozah ni ralhrang do dingin Dday kan phuanmi kum 1 kim caan a si. Mipi lungrualten tangtlang in ralhrang uknak cimit ko do dingah September 7,2021 ah thu kan rak suah. Dothlengnak ih teltu mipi nan zaten, taksa, sumpai,CDM le neihsiah ih teltu mipi nan zaten upatnak kan lo pe ih lungawithu kan lo sim.
“Dothlengnak ih nunnak hlantu nan zaten upatnak kan lo pe ih, miraltha thuanthu ah ngankhum nan si. Rampi huap ralhrang do dingin thu kan suah hnuah PDF le an tuanpi mipum 1500 tlunin ram le miphun hrang an nunnak an hlan zo. Ralhrang ralkap lamin mipum 20150 an thi zo ih, ralhrang hriamhma ngah thawng 7 hrawng an um.
“Tuitum dothlengnak ah PDF le mipi ralkap pawl raldo in zirhsaktu tlangpar ralthuamkai pawl hnen khalah lungawithu kan sim duh. Dothlengnak ih teltu nan zaten lungawithu kan lo sim. Ralhrang ralkap in rampi thuneihnak an lak tikah mipi cun daiziar in lamzawh duhphorhnak an rak nei rero nan, ralhrang pawlin ralthuam hmangin mipi an rak thekdarh ruangah mipi parih ralthuam an hman ruangah mipi khal kan humhimawk a tul timi a fiang.
“Curuangah kannih mipi cozah NUG cun daiten ummen mipi an thih rero men ding cu kan zohmen thei lo ih, kannih NUG cun mipi khal leitlun ralkap daan vekin ralthuamkai ve dingah leitlun theih in thu kan rak suah. Hram kan thok tikah zianghman nei lo kan si ih, ziangkim ah theitawk suah in kan cangvai. Tu ahcun mipi ralkap thatuk kan din zo ih, hmun hnih in kan then. Pakhat sawn cu mipi humhimtu an si ih, a dang pakhat sawn cu myoene humhimtu pah-kah-phah tiah hmin kan pekmi PDG pawl an si.
“Tu ahcun PDF tatyin 300 tlun kan din zo. Ramsung myone 330 lakin myone 250 ah PDF kan nei thluh zo. Tu ah kanmai hnuai ih um lo myone tinkim ih mipi ralkap pawl thawn khalin kan be aw rero ih, tuantlang dan ding ziangkim kan rel. Duh vekin ralthuam kan neitha hrih lo nan, tlangpar ralthuamkai ih bomnak le mipi pawlih bomnak ruangah ralhrang uknak tampi kan siatsuah zo ih, ramsung ah kan cangvaihnak a tha vivo. Kan hmunram myone 24 khalah thuthentu, mipi uktu ,fimzirnak le harhdamnak tivek felfai zetin kan din zo.
“Ram kauh vivo dingin kan thazang a cak deuhdeuh ih, tlangpar ralthuamkai pawl cangvaihnak khal an cak deuhdeuh. Hivek ruangah tuih dinhmun rampi huapin ralhrang pawl cun zatek ah 50 hman ukmi an nei nawn lo. Ralhrang pawl cu kan sung timi an theihawk ruangah mipi parah an sual deuhdeuh.
‘Ral ih an sun ruangah mipi inn thawng 30 tlun an urkang sak zo ih, mipi an kaihmi khal a bur ih thahmi le urkangmi khal an nei. Mipi umnak ah bomb an thlakih, doawknak a um lo khalah duhtawk in ralthuampi an kap ciamco. Doawknak ih PDF an kaihmi pawl cu ahmun rori ah an that men. Biaknak inn pawl khal bomb an thlakih, an siat rero. Hivek cu mipi parih cangvaihnak dankalh a si.
“Kannih PDF pawl cu leitlun ralkap daan an thlunih, leitlun ralkap dan vekin dothlengnak ah ke an kar rero. Kannih cu diknak thawn Federal Democracy hrang theitawk zuam rerotu kan si timi khal kan lo theihter duh. Dothlengnak kan tuahmi ah ralhrang uknak kan cimit hmaisabik dingih, hmailam ukawknak hrang daan hrampi khal kan buaipi rero phah.
“Federal ukawknak tlangpi khal kan ngan rero zo ih, mipi duhdan vek rori’n kan nemhnget leh ding. Cumi hnuah zalen zetin hrilawknak kan tuah ding. Hrilawknak ih nehnak cotu pawl cun Federal Democracy vekin rampi an kaihruai dingih, Federal Democracy uknak a suak ding. Ralhrang ralkap cun an uknak feh tluang vivo dingin hrilawknak tuah an rak tum ve. Asinan, kannih cun ralhrang ih tuahmi hrilawknak cu a dikmi hrilawknak a silo ding tin kan zum.
“Ziangahtile, ziangtik hmanah ralhrang cun mipi zawn an ruat dah lo ih, diknak timi an ngaina lo. Curuangah ralhrang pawlih tuahmi hrimhrim zum ding a um lo ih, an tuahmi pohpoh zum ding a um lo. Curuangah kannih mipi zaten khalin ralhrang ih tuahmi kan theihthiam a tulih, kan fimkhur a tul ngaingai. Dothlengnak ah tulsammi tampi kan nei. Tulsammi pawl cu sumpai harsatnak ruangah a si ih, cumi theithiam zetin dothlengnak ih teltu mipi nan zaten upatnak kan lo pe.
“Harsatnak phunphun karlakah kanmah in tuanpitu tlangpar ralthuamkai pawl khal upatnak kan pe ih,hmailam khalah lungrualten dothlengnak in telpi dingin kan lo sawm. Rampi hruap raldo thu kan suah hnuin tuisun nitiang kan cangvaihnak kan zoh tikah hmailam kan pan zetih hlawhtlinnak hrekkhat kan ngah rero zo.
“Tu ahcun ralhrang pawlih luah ngamlonak hmun, mipi ralkap pawl zalen zetih an um theinak hmun a um tam vivo thlang. Dothlengnak ah hmailam kan pan vivo dingih, hmailam khalah mipi tanpinak thawngin hmunram kan la vivo ding timi khal kan sim duh. Kan luah theimi hmunram pawlah mipi thansohnak hrang harhdamnak le fimzirnak tivek pawl khal theitawkin din vivo kan tum.
“Kannih NUG cozah cun mipi bum ding zawngin cangvaihnak zianghman kan nei lo. Mipi duhmi uknak hrang theitawk zuam rero kan si. A thok ahcun rampi ralkap do theih an silo tin ruattu an um nan, tu ahcun neihsun ralthuam khalin rampi ralkap an buaiter thei zo tin an lung a thleng rero zo. Hivek cu dothlengnak ih thilthleng thar a si ve.
“Ziangtlukin ralthuam le mipum neitha hai hman sehla mipi thinlung an lak thei lo ahcun a san a um lo ih, mipi dinpimi le mipi tanpimi sawn hlawhtlinnak a sisawn. Tlangpar ralthuamkai pawl thawn khalin tuantlangnak kan nei hnget deuhdeuh ih,Politics party pawl khal remnak kan tuahpi vivo ding.
“Dothlengnak ih nehnak kan co tikah rampi suahsantu Rohingya siseh Myanmar raltlan zaten hahdam zetih Myanmar ram an tlunsal theinak dingah ziangkim kan tawlrel sak dingih, hahdam zetin Myanmar ram an umnak ding hmun khal kan ruat ding. Ramleng theihpinak kan la vivo dingih,ramleng thawn tuantlangnak khalah theitawk kan zuam vivo ding. Ralhrang in daan an pahbalmi pawlah hremnak an ton theinak dingah kan zuam peh ding.
“Hmailam ah dothlengnak ih kan cak sinsin theinak dingah theitawk kan suah vivo ding. Ralhrang uknak a cem caan a thleng rori dingih, a rei le reilo men lawng a si ding. Mipi in nehnak kan co caan ah ralhrang pawl hremnak tuar thei dingin ralring cia dingah kan theihter duh. Ramleng khal Myanmar mipi in bawm peh dingin kan lo sawm duh. Hmaikum ah nehnak co rori dingin kan zaten zuamtlang uhsi,” tin a sim.
Min Aung Hlaing le Putin An Tongaw – Ralhrang hotu Min Aung Hlaing cu Russia lamih sawmnak vekin tufang ah Russia ram ah a um hrih ih, ram 4 palai meeting ah Russia president Putin thawn an tonaw ih, an cibaiawk lai zuk mipi lakah a darh.
Min Aung Hlaing hi thuneinak duhtuk ruangah ralthuam rinsan in Myanmar rampi thuneihnak latu a si ih,amai thupek ruangah sualnak nei lo mipi tamtuk an thi zo. Min Aung Hlaing hi Rampi thuneihnak an lak hnuah rampi president tiang si duh vivo a si.
Russia president Putin khal Russia in Ukraine ram an domi ah thupetu bik a si ih, amai thupek ruangah Ukraine mipi tamtuk an thih zo tlunah Ukraine mipi tampi uknak ding nei lo, raltlan tampi an um phah.
Ralhrang hotu Min Aung Hlaing le Russia president Putin tei pahnih in a hranpa tein anmahten an tongaw leh pei maw timi cu theih a silo ih, tuitum cu ram 4 palai meeting ah tongaw le cibai aw an si.
Russia In N.Korea Ralthuam An Lei – American zingzoitu pawl cun Ukraine donak ah Russia in N.Korea tuahmi ralthuam an lai rero tin thu an suah ih, kan fiah rori ko tin an tarlang.
A hlan khalah American zingzoitu pawl cun Ukraine donak ah Russia in Iran tuahmi Drone an lei tin thu an rak suah zo. Tuitum ah American zingzoitu pawl cun Urkaine donak ah Russia in N.Korea ih tuahmi bomb zamthei kahnak tampi an lei tin an tarlang.
Hivekin American zingzoitu pawlih thusuahmi cu Russia lamin an let hrih lo ih, Russia in Ukraine an donak ah Iran le N.Korea in ralthuam hmangin an tanpi taktak sipei maw tivek khal thu a suak ve.
Leave a Reply