Oman Feh Tum Chin Fala An Kai

Oman Feh Tum Chin Fala An Kai – Oman ah inn hnatuan dingin poksuak Chin fala cu Thailand a thlen zawngah a passport scan a theih lo tin Thailand palik pawlin an rak kai ih, thawnginn sungah an khum cih.

Chin fala cu covid 19 daan le dun vekin thawnginn sungah a hranten ni 21 sung an khum hmaisa dingih, cumi hnu lawngah a thuhla daan vekin rel a theih ding tin Thailand ih buaipitu pawl cun an sim. Chin fala cu August 31 ah Yangon suahsan in Thailand khawpi bangkok rak pan a si ih, Bangkok Airport ah an rak kai. Ni 21 sung thawnginn sungih a hranten an khum hmaisa ding ruangah a thubuai cu September 21 hnu lawngah buaipi a theih dingin a lang.

Buaipitu pakhat cun “Tu ahcun thawnginn sungah an khum zo ih, ni 21 sungah covid 19 daan a thlun tul ruangah kan hmu thei hrih lo. Phone khalin kan be thei lo. Ni 21 sung a hranten ih an khum thluh hnu lawngah a thuhla daan vekin kan rel thei ding. Chin ramkulh sung ihsin ramdang feh tumih ramleng suak lakah buainak tong tampi an um zo ih, kan fimkhur sinsin a tul. Ramdang kan feh ding tikah buainak kan tong pang asile tivek hrang ziangkim timtuahnak nei cia ding kan si,” tin a sim.

Thailand palik pawl ih kaihmi Chin fala kum 20 hrawng cu Chin rakulh Mindat khuami a si ih, a nulepa in an thihsan zo. Thenkhat cun Mindat ihsin ramdang feh tum a si ruangah ralhrang pawlin Mindat an hua tukih a passport scan theih lo dingin Myanmar Passport zung lamin an rak tuah cia siko ding titu an um.

Ramsung ih nasaten ralhrang dotu Sagaing ramthen le Makui ramthen sungih um hmatpungtin nei khal ralhrang pawlin an hua tukih, Yangon ahcun Sagaing ramthen le Makui ramthen sungih um an si ruangah company ihsin dawisuakmi tiang an um.

Ralhrang In Mipi An Ngiar – Myanmar ram buainak khal kum 1 hrek a kul fel zo ih,doawknak sosang ah ralhrang cun mipi lam an ngiar thlang tin NUG humhimnak vuanci zung cun thu an suah.

NUG humhimnak vuanci zung cun mipi lamtang ralkap pawl an hmuahnak ah ralhrang pawl cangvaih dan thar an tarlangmi a si ih, ralhrang pawl doawknak ih an dinhmun a that nawn lo ruangah mipi an ngiar thlang tin an tarlang.

NUG humhimnak vuanci zung cun “Mipi lamtangtu ralkap le palik nan zaten kannih NUG cozah cun lungawi soparten kan lo hmuak ih, mipi hrang rinum sinak kan lo pe. Nan pitlinnak le pekawknak cu kannih NUG cun sunglawi ka ti tuk lawlaw. Mipi lamtang ralkap le palik lakah PDF thawn ralhrang do rerotu tampi an um timi khal mipi kan lo simthei duh.

“Bochuk Aung San ih rak dinmi Myanmar ralkap cu mai bulpak hlawknak le thuneihnak duhtu Min Aung Hlaing ruangah an harsa tuk zo ih, an tlase thluh zo tikhal tlansuak ralkap pawl ih theifangmi a si. Kannih NUG humhimnak vuanci cun minung thar, ruahnak thar, ruahnak thar thawn ralkap thar kan din rero ih , kan dinmi ralkap thar pawl cu Federal Democracy uknak hrang mipi ralkap a si ding.

“kan rampi ih remdaihnak , mipi himnak hrang tuanvo neitu kan si ih, mipi humhim vivotu ding khal kan si. Tui caan ah ralthuam rinsan ih mipi dekcok rerotu ralhrang pawl do ding cu kan hnapi bik a si hrih. Ralhrang pawl cu an thinlung ruahnak le an umdan pawl an tlase thluh zo ih, raldo theinak thazang khal an nei nawn lo. Curuangah ralhrang pawl cun mipi an ngiar ih,mipi inn an urkang, duhtawk in sualnak nei lo mipi an that ih, mithat pawlkom burpi an si zo. Hivek pawl cu ralhrang pawl an cimit ding caan a nai tuk zo timi langtertu an si. Kan zaten kan tuar hrih ding, kan fehsan hrih dingih, mipi ralkap zaten kan tlang vivo hrih ding. Cutin, ralhrang cu kan neh mai ding a si,” tin NUG humhimnak vuanci zung cun thu an suah.

Min Aung Hlaing In An Tisualmi 4 A Relsuak – Ralhrang ralkap meeting ah Min Aung Hlaing cun tuitum dothlengnak ah ralhrang thi an tam zo ih, cucu tisual 4 kan neih ruagah a si tin meeting kaitu pawl a simtheihmi cu mipi lakah a darh.

Min Aung Hlaing cun “Tuitum ram buainak ah kan lakin mithi an tam tuk thlangih, thi kan tamnak san zoh tikah kanmah in dotu an tam deuhdeuh, kanmah lam tlaksamnak ruangah khal a si. Kan tlaksamnak le tisualmi 4 pawl cu pakhatnak ah hmunram kan lakdan a dik lo, pahnihnak ah hmainor ih hmunram thianfainak kan neihmi a dik lo, pathumnak ah kan sungah dik lo an um ih, palinak ahcun zirmi pawl nan hmang tangkai lo.

“Ralkap nan luh tikah raldo dan phunphun nan zir thluh zo. Hmainor ih do caan, dungsip caan, tlangpar ih do dan le hmunrawn ih raldo dan tivek tiang kan lo zirh thluh zo. Curuangah ralthuamkai pawl kan do dan ah kan zohawk fel a tulih, tawngpa do ih do men ding kan silo.

“Tuini tiang kan ral pawl umnak kan kahlonak san pakhat cu NCA hminkhen kan ngampi ruangah a si. Asinan, NCA hminkhen ngan khal kan sakhan an do ahcun kap ve ding kan si ih, ramri lan pohpoh cu kan do a tul. Timtuahnak felfai kan neih lo ruangah mithi kan tam zo. Ralkap lak khalah tihrut, tlunlam thusuak thlun lo nan tam. Curuangah, thupten do thupti cangvaih dan khal hmang ding kan si,” tin meeting kaitu pawl a simtheihmi cu mipi lakah a darh.

Ralhrang ralkap le palik lak khalah CDM tuah duh tuk nan,a phunphun ruangah CDM tuah thei lo pawlin, mipi hnenah thuhla simthei ringringtu an um ve. Cupawl ruangah ralhrang meeting thusuak tampi mipi lakah an rak darh zo ih,thudik tampi theihsuakmi tampi a um zo.