Putin Bang Dingih Cakuattu Pawl An Hrem Thok

Putin Bang Dingih Cakuattu Pawl An Hrem Thok – Russia ram sungih myone uktu daanthiam hlutdaw 19 pawl cun Russia president Putin cu a hna ihsin bang dingin an rak phutih, ca an kuat.

Tu ahcun Putin cakuattu Russia hlutdaw 19 lakin an hotu bik cu Russia ralkap in Court ih an hruai hnuah Russia tangka thawng 47 kuan dingin a tlun thu an relcat sak. A dang mi 4 pawl khal Court ah feh dingin theihter zo an si.

Russia hlutdaw 19 pawl cun Russia president Putin cu dik lo zetin nehnak na co ih, president tuantlak na silo, Ukraine na reromi khal Russia mipi hrang siatnak thlentu a si ih, president na sinak in bang aw tin ca an rak kuat. Cakuattu 19 lakin midang pawl khal Russia ralkap pawlin an hawl rero zo tin Russia thuthang pawl cun an tarlang.

Mizoram Cozah Palai In India Ramdang Palai A Tong – Mizoram cozah palai Pu H.Rammawi cun September 13 ah India ramdang palai zungih sungtuan SMita Pant a tongih, Chin raltlan pawl thuhla a relpi.

Cumi ahcun Pu H.Rammawi cun India ramdang palai hnenah “Kannih Mizoram cozah cun tuhrih tiang ahcun kan ramsungih um Myanmar raltlan pawl cu Myanmar ah kuattlung kan tum hrih lo. Myanmar ralkap lamin raltlan pawl an him, an umnak ding ziangkim tawlrel fel thluh zo a si ih, Myanmar an tlun tikah ziangtinhman kan tilo timi fiahnak an neih lo ahcun Mizoram ih Myanmar raltlan pawl cu Myanmar ah kuat kan tum lo a si,” tin a simfiang.

Ralhrang palai cun India ramdang palai hnenah India ih Myanmar raltlan pawl Myanmar kuattlung thluh dingin an rak dil ve ih, ralhrang cozah cun Mizoram cozah khal Mizoram sungih Myanmar raltlan pawl Myanmar ah kuat dingin ca an kuat. Ralhrang pawlin Myanmar raltlan thu ah Mizoram cozah tiang ca an kuat nan, Mizoram cozah cun an ramsung ih um Myanmar raltlan pawl cu Myanmar ah kuattlung an tum hrih lo.

Ralhrang Senthum A Pe Aw – Sagaing ramthen Yinmarpin myone sungih ralhrang senthum pakhat cu ralthuam famkim thawn mipi ralkap kutah a pe aw ih, mipi ralkap lam khalin lungawi thusimnak ah tin ting 80 an rak hlan ve.

Yinmarpin PDF cun “Ralkap senthum Min Thu cu ralhrang pawl kuthnuai ah an um paih nawn lo ih, mipi raklap kutah ralthuam famkim thawn a pe aw. Meithal a tlanpi cu kan kutah in ap ih,kannih khalin laksawng ah ting 80 kan pe a si,” tin mipi an theihter.

Mipi ralkap pawl cun ralthuam famkim thawn mipi ralkap kut ih pe aw cu laksawng ah sumpai an pek ding thu an tiam cia. Sumfai an pekzat lawngah mipi ralkap khat le khat an bangaw lo.

KNLA PC Le DKBA In Naypidaw An Pan – Ralhrang ralkap hotu Min Aung Hlaing be dingin karen ralthuamkai pahnih KNLA PC le DKBA cun Nyipidaw khawpi an pan ih, Min Aung Hlaing thu an relpi ding. Tuitum cu KNLA PC le DKBA in avei hnih Min Aung Hlaing thu an relpi ding caan a si.

KNLA PC le DKBA cu ralhrang pawl kap aw lo dingin NCA hminkhen ngan an si ih, tuitum dothlegnak ah ralhrang an do ciamco ve lo. Kan dungah veikhat veve ralhrang dotu Min Aung Hlaing an rak be zo.

Ralhrang ralkap hotu Min Aung Hlaing cun tlangpar ralthuamkai hotu pawl amah thurelpi dingin a rak sawm ih, tlangpar ralthuamkai pawlkom 10 cun veikhat ciar Min Aung Hlaing an rak be zo. Cupawl cu Shan ralkap SSPP, Shan ralkap RCSS, Wah UWSA, Maila NDAA, Rakhine ALP, Karen DKBA, Mon MNSP, Karen KNLA PC, Palawng PNLO le Lahu LDU pawl an si.

Ralhrang hotu Min Aung Hlaing cun veikhat ciar a rak tong zo nan, tuitum avei hnihnak hrang kan lo be duhsal ih, cipicar deuh in kan duhdan veve kan rel ding tin a ko nonsal hai. Vei hnihnak hrang Min Aung Hlaing tong zotu pawl cu RCSS, PNLO, LDU le ALP pawl an si ih, tu ah KNLA PC le DKBA khal avei hnihnak hrang Min Aung HLaing be dingin Nyipidaw thleng an si.

Ralhrang ralkap hotu Min Aung HLaing cun amah be duh hrih lo tlangpar ralthuamkai dang pawl khal amah be dingin a sawm rero nan, tlangpar ralthuamkai hminthang KNU, KIA, AA, MNDAA, KNPP le CNA pawl cun ralhrang biak an tum hrih lo.