Putin In NATO Pawlkom Ralrinnak A Pe

Russia le Ukraine ram buainak ah Russia ramri Sweden le Finland cu an um a rak nuam lo ih, Ukraine vekin Russia in an ramri nor ih a do ve ding an phang. Curuangah, buainak an ton taktak hlanah tin Sweden le Finland cun may 18 ah Official in NATO pawlkom sungih tel dingin dilnak ca an thehlut.

NATO pawlkom ah Europre ram 28 , US le Canada ram pawl an um ih, ral buainak ah khat le khat ralthuam hmangin bawm aw dingin le raldo tlang dingin remnak nei an si. Ral thuhla thawn pehpar aw ahcun leitlun ah pawlkom picang zet an si ih, ralkap kokhawm tiang an nei.

Ukraine khal a hlan tein NATO pawlkom ah rak lut bangta sehla Russia in a do caan ah NATO sungtel pawl in daan vekin ralthuam thawn Russia an dopi thei dingih,Nato cun Ukraine an humhim thei ding. Asinan, NATO pawlkom ih Ukraine an luh fel hlanah Russia cun Ukraine a kap ih, daan vekin NATO lam cangvaih theinak an nei lo. Curuangah, ralthuam le sumpai lawngin an bawm.

Tu ah Finland le Sweden cun NATO pawlkom ah in telter uh tin an dil ih, NATO sungtel ram 30 pawl in felfai zetin an relcat lai ding. Tutiang ahcun NATO sungtel Turkey ram cun NATO pawlkom ah Finland le Sweden an tel ding cu an duh lo ih, buainak suakter theitu an si tin an sim zo. Ziangasikhalle , NATO pawlkom sungtel tamsawn duhdan le pawlkom ih thurel cat dan vekin Finland le Sweden an cohlang pei maw timi a fiang leh ding.

Russia president Putin cun “NATO pawlkom ah Finland le Sweden an luh men in kan buai phah lo ih, tihnak le thinphannak khal kan nei lo. Asinan, NATO pawlkom in kan ramri in nor si maw, kan ramri kiangah ralthuam tuahnak an retih, raldo zirnak an nei, asilole in naih a si pang ahcun daiten kan um men lo dingih, kan kap hngal ding a si,” tin NATO pawlkom sawn ralrinnak a pe cia.

Tutiangah Russia le Ukraine cu an buai hrih ih, thupipa ciamco dang a um thei hrih lo. Russia cun Ukraine khawpi sungin Mariupol an la fel zo ih, tu ahcun Ukraine nisuahnak lam Dobas la bet dingin an do aw rero. Ramdang in ralthuam le sumpai thawn Ukraine an bom rero tikah Ukraine khal an nisuahnak lam humhim in theitawk Russia ralkap pawl an do rero ve.