Putin Parah Taiwan An Thinheng

China le Russia cun tui kum thokah ram pahnih tuantlang dan ding thuhla reltlangnak an rak nei ih, cumi ahcun nasa sinsin in ziangkim ah tuantlang an tum thu an rel.

Ram pahnih remawknak an neih zo bangin tui thla sung khalah Russia president Putin le China president Xi Jinping tei pahnih cu online in thureltlangnak an nei. Cumi ahcun Russia president Putin cun Taiwan cu China thuneihnak hnuai ih um , mahte ram nei an si hrih lo tin a sim.

Cucu, Taiwan lamin an rak theih tikah an thinheng tukih, China hnuaiah kan um nawn lo, mahte zalennak nei ram pakhat kan si ve tin thu an suah cih.

Putin ih tongkam cu China lamin uar zetin an rak suah rero ih, Taiwan le Hong Kong cu China thuhnuai ih umlai an si. Curuangah,Hong Kong le Taiwan thuhla ah ramdang an rak buai ve cu kannih Russia cun kan mawhthluk tuk lawlaw ih, China lamah kan ding a si tin China thuthang pawl cun an suah.

Taiwan cun “Taiwan hi mahte zalennak nei kan si ih, Taiwan mipi hriltlin lawngin Taiwan ram an kaihruai. Curuangah, kannih Taiwan cun leitlun Democracy ram pawl kan tuanpi vivo dingih, kan ram zalennak cu kan thupi bik a si,” tin thu an suah ve.