Putin Thah An Tum

Ukraine thlithlangtu bawi Budanov cun Russia in Ukraine an do hnuah vei tampi Putin thah an tum nan,tutiang cu an hlawhtlin thei hrih lo thu a sim.

Ram pahnih buainak ah president veve cu thupi bikah ret an si ih, an him lo veve. Ukraine president Zelensky khalin Russia thawn an buai hnuah amah that tumih cangvai mi tampi an um zo thu a sim. Tu ah Ukraine thlingthlatu bawi cun Russia president Putin thah an tum thu a sim ve.

Budanov cun “Russia in Ukraine in do hnuah kannih thlingthlatu pawlkom ih tumbikmi pakhat cu thupten Putin thah thei dan a si. Asinan, tutiang cu kan hlawhtling thei hrih lo. Russia in Ukraine an do hnuah Putin cu a dangten a um cih. Ziangahtile, a hnatuanpi le a ralkap lakin amah phatsantu an um tikah a him theinak ding a ruat.

“A kuthnuai lole a ralkap pakhat khatin amah an thah ding a phangih hmundang ah a um. Hmundang ih a um hnuah a eiin zohfeltu ding pawlkom tiang a din ih,tidai a bual ding khalah a tidai bual dingmi tiang an zohfel hmaisa. A fehnak kipah thiam hleice sniper pawlin an kil ringring ih, humhimtu ralkap tha hleice khalin an thlun ringring. Putin thluntu Sniper kapthiam pawl cu hlaral tiang thianfai thei an si,” tin a sim.