Chin ramkulh Mindat peng lam pan in ralhrang mawtaw tampi an feh hnuah ralhrang pawl cun Mindat peng sungin khua hrekkhat cu Drone hmangin zohfelnak an nei ih, mipi pawl cu fimkhurten um dingin theihter an si.
CDF Mindat cun “Mindat peng sungih khua hrekkhat cu ralhrang pawlin Drone hmangin zohthupnak an nei ih, phone line pawl khal a siat thluh. Mindat peng sungah ralhrang raldonak vanzam zamsuak an um ih,mipi lam fimkhur a tul.
“Mindat ramri ih thleng ralhrang mawtaw 105 khal hmailam an pan vivo ih, raltlan mipi pawl fimkhurten um dingin kan lo theihter duh a si,” tin thu an suah.
Mipi Vawtu An Puh Aw – A tufang Social media ih larzet video pakhat cu ralthuamkai in mipi a sangsangten an vuakmi Video a si ih, khatlam khatlam in an puh aw.
Thuthang hmaisa ahcun Rothil lai mipi pawl cu ralhrang kuthnuai Pyu Saw Htee pawlin an kham ih , pakhat khatten an vuak hnuah an hro vivo ta. Pyu Saw Htee pawl cu PDF vekin an thuam aw ih, PDF pawl thangsiat an tum tin a darh hmaisa.
Neta ahcun ralhrang in khua an urkangmi ah thiltha a um pei maw tin khuadang mipi pawl an feh ih, thil an hawl, cucu mipi ralkap PDF pawlin nunsimnak hrang an vuakmi a si tin thu a suak. Cumi hnuah thudang pakhat a suak betih, ralhrang pawl lamzin ah PDF pawlin bomb an kam, cumi lamzin ah mipi zohman feh lo dingin an theihter nan, mipi pawl thupten an rak feh ih, cucu PDF lamin nunsimnak ah mipi pawl an vua tin thu a suak bet.
Tu ah PDF pawl in mipi nun an simnak a si taktak pei maw? Pyu Saw Htee pawlih cangvaihnak PDF pawl vekin lemcanmi a sisawn pei maw? timi ah thu felfai sawn thei zingin zingzoi peh rero lai a si.
CRPH In Mipi Sawmnak An Nei – CRPH cun tuini Martyr ni ah ram mipi zaten dothlengnak ah thazang suah tento hrih dingin sawmnak an nei ih, lungrualten kekar tlang dingin thu an suah.
CRPH cun “Tuini cu rampi hrang theitawk rak zuamtu mi 9 pawl misual pawl ih thahni Avei 75-nak Martye (Aazani Nih ) a si. Rampi hrang nunnak hlantu miraltha zaten upatnak kan pe ih, kan theihhngilh dah lo ding.
“1947 ,July 19 zarhte ni, zinglam nazi 10:37 hrawngah ralkap bawi Bochuk Aung San ih hohami rampi hrang hnatuan pawl cu meeting an neih laiah kah that an si. Hivek cu rampi hrang siatnak rapthlak tuk a si.
“Tui caan khalah thuneihnak atcilhtu pawlin ralthuam rinsan in rampi thuneihnak an la ih, ram hruaitu pawl cu dankalh in hremnak an pe, an kai. Democracy vekin hriltlinmi pawl cu ralhrang pawlin an cohlang thei lo ruangah thuneihank an la. Thuneinak an lak hnu ahcun ralhrang pawlin mifim, mithiam thatha pawl an kai , an that ih, mipi neihsiat duhtawk in an laksak hnuah mipi inn khal an urkang sak rero.
“Hivek ruangah mipi cun ralhrang uknak cu lotheih loin ralthuam thawn do a tul ve thlang. A san cu daiziar ih lamzawh duhphorhnak khal ralhrang pawlin an theithiam lo ih, ralhtuam hmangin an thekdarh ringring. Tu ah kum 1 tlun ralhrang uknak do rero a si zo ih, kan tumtahbikmi cu Federal Democracy rampi din ding a si.
“Curuangah , rampi hrang nunnak rak hlantu, dothlengnak hrang nunnak rak hlantu , rampi hrang theitawk ih rak zuam rerotu pawl zuamnak , nunnak hlanmi theihsak ringringin dohthlengnak ah lungrualten kekar in hmailam pan vivo uhsi tin mipi kan lo sawm duh a si,” tin thu an suah.
Martyr Ni Ah Ralhrang Thi An Tam – Sagaing ramthen Minmoe myone Wanpih khua lanih feh ralhrang ralkap mawtaw cu July 19, zanlam nazi 3 hrawngah Minmoe PDF in bomb an rak puah ih, ralhrang thi an tam tin thu an suah.
Minmoe PDF thuphuangtu cun “Bomb 5 in kan rak puahmi a si ih, bomb 5 zaten a puak fuh thluh. Hmaisa sawn bomb kan puahmi ah ralhrang 3 an thi ih, hriamhma ngah 5 hrawng an um. Cucu, drone hmangin kan hmu thei. Neta zanlam ah ralhrang pawl bomb kan puah betih, ralhrang thi an tam nan, a zat kan fiah thei hrih lo a si,” tin a sim.
Makui ramthen Sikphyu myone Wankyi khua kiang khalah ralhrang ralkap le mipi ralkap pawl July 19, sun nazi 1 hrawngah an do aw ih, doawknak ah ralhrang thi an tam tin PDF cun thu an suah.
PDF thuphuangtu cun “Ralhrang ralkap pawl umhmun khuarnak kan theihfeng hnuah kannih mipi ralkap komkhawm cun ralhrang umhmun khuarnak cu thupten kan va kap. Cutikah ralhrang pawl thi an tam ding. Ralhrang thizat lawngah kan fiah thei hrih lo a si,” tin a sim.
Ukrane president In A Kuthnuai Pahnih Dawisuak – Russia le Ukrane ram buainak ah Ukrane president Zelensky cun an ram Ukraine hrang humhimnak hnatuantu ralbawi pahnih cu Russia lamtang nan si tin an hna in a bangter.
Ukraine president Zalenky cun “Security hnatuan le cozah sihni hnatuan lakin mipum 60 hrawng cu Russia ih luahnak ramthen pawlah Russia lamtang in hna an tuan. Curuangah, daan lamih hnatuan pawlin ram phatsantu ti ih thubuai an tuahmi 651 a um zo.
“Curuangah Security hotu Bankanov le sihni hotu Venediktova tei pahnih cu an hna ihsin banfel an si ih, an hnuai ih cozah hnatuan lakin ram phatsantu ih puhmi pawl khal thubuai tuahsak thluh an si. Hivek cu Russia thawn kan doawknak ah kan ram hrang tha dingin le kan damsuah theinak hrangih lairelnak a si,” tin a sim.
Russia cun Ukraine khawpi bik Kyiv thuahfai an tumnak an hlawhsam hnuin Ukraine nisuahnak lam cu nasaten an do ih, Donbas ramthen sungin hmun tamzet cu Russia ralkap pawlin an luah thluh zo. Russia ralkap pawl ih luahmi ramthen pawl ahcun Ukraine tuanvo neitu pawlin an thu an fehpi ngam nawn lo. Cuvek a si tikah an hna in banter an si ih, hrekkhat cu thubuai tuahsak phah an si.
Russia cun 2022 February 24 in Ukraine a rak do thok ih, tu cun ram pahnih buainak thla 5 a kim thlang. Thla 5 sungah Russia cun Ukraine rampi sungin thil tampi a siatsak ih, mipi thih phah khal an tam. Ukraine lam cu Russia kutih an pekawk duh lo ruangah an ram humhimnak hrang Russia ralkap pawl rak do rero an si.
Russia cun kan ram humhimnak hrang kan ramri Ukraine ah kan ral pawl umhmun an khuar ding cu rem kan tilo ih, cumi ruangah Ukraine ram thuahfainak nei kan si tin an phuang rero.
Russia president Putin cun “US le NATO pawlkom in Ukraine hmang tangkai in kanmah Russia in do. Cucu, Ukraine lamin an theihthiam lo tikah US le NATO duhdan in an rak cangvai ve ih, an tuar siko. Kannih Russia ram cu thleidang zetih zoh theih kan si nawn lo.
“US le NATO pawlkom in an duhduh in leitlun an cokkual ih, an hruai rero ding kan duh lo ruangah ttansuah kan si. Doawknak ah a takin US le NATO an tel lo nan, thupten ralthuam le sumpai hmangin an tel ziar ih, nehnak co an tum. Midang thazang ringin nehnak cu co tum hai koseh, an tum bangin an thleng maw ti cu kan hmu mai ding.
“Tu ah US le a rualpi ram pawlin sipuazi ah nasaten hram in tum ih, kum 30 liam zo hnu vek caan hmanter in tum. Asinan, Cuvek cu a thleng lo ding. Kan hrang fiahnak nasa tuk a si ih, kan duai men lo ding, kan tum bangin kan feh vivo ding a si,” tin leitlun mipi a simthei ve.
Ram pahnih doawknak ih umzia cu Russia in Ukraine ram sungih ramdang thilri le ralthuam phunphun siatsuah thluh an tum. Cucu, Ukraine lamin theitawk in an rak kham rero a si bikih, a tuartu Ukraine ram le mipi an si. Russia cu an ram suahsan in Ukraine ram sungah raltho an si ih, Russia mipi in ral buainak an rak tuar ve lo. Russia mipi ih tuarmi cu sipuazi ih hremnak ,leitlun ramdangih hremnak pawl an si.
Leave a Reply