Ralhrang In Nuclear An Buaipi Thok – Ralhrang ralkap khal an pu Russia rinsan in Nuclear ralthuam neih an rak tum ve ih, tu ahcun Myanmar Nuclear ralthuam hmang hram kan thok thlang tin ralhrang tuanpi Rosatom Company cun thu an suah.
Ralhrang in Nuclear ralthuam an neih theinak dingah Russia le Russia Companay Rosatom an tuanpi. Myanmar thawn Nuclear buaipi dingah le tuantlang dingah November 22 ah hminkhen kan ngan fel zo tin Rosatom cun thu an suah.
Ralhrang in Nuclear ralthuam tuahnak cetzung nei ve dingin 2022 July thla ah ralhrang hotu Min Aung Hlaing cu Russia a rak tlawngih Russia lam thawn remawknak an tuah. Cumi hnu thla 4 ah ralhrang cun nuclear tuah dingin remnak an tuahpimi pawl 2022 November 22 ah hminkhen an nganpi fel.
Ralhrang in rampi thuneihnak an lak hnuah anmah dokalhtu ramdang pawl cu an be duh nawn lo ve ih, anmah buaipitu, tuanpitu le bawmtu Russia, China, India ,Thailand tivek an tlon ciamco sawn. Ralhrang thawn langpang zetih hnatuan tlang khal Russia, China le India ram pawl an si.
NLD party in cozah an din hnu 2016 kum ah Myanmar cun Nuclear ralthuam buaipi lo dingin UN ah hminkhen an rak ngan nan, ralhrang in rampi thuneihnak an lak hnuah anmah hremtu, anmah be duh lotu , ram an tam vivo ih, UN khalah covo an nei nawn lo. Cutikah ralhrang cun Russia tuanpi in Nuclear neih thei dan ding sawn nasaten an buaipi.
Ralhrang in Nuclear nei dingih an buaipimi cu UN Myanmar palai U Kyaw Moe Tun khalin a rak thei ve ih, UN meeting ah a phurlut rero zo. Ralhrang in Russia thawn tuantlang in Nuclear cetzung neih an tummi cu UN lamin a rang theibikin kham dingah le ngahven dingah U Kyaw Moe Tun a theihter. Asinan, tutiang cu ralhrang in Nuclear cetzung an buaipimi ah UN lam thusuak a um hrih lo.
N.Korea In US Ralrinnak An Pe – S.Korea le N.Korea buainak ah N.Korea cun duhduh in Missile an kap suak ih, US tiang kap thei ralthuam kan nei, kan duh asile N.Korea humhimnak ding a si ahcun Nuclear khal kan hmang mai ding tin thu an rak suah rero zo.
Cumi hnuah US le S.Korea cun SKorea tipi ah raldo zirtlang an nei ih, N.Korea lam an cangvai ciamco sal. N.Korea cun US le S.Korea tihrim in raldonak vanzam an zamter ciamco ih, bomb zamthei Missile an kapsuak phah.
Korea ram pahnih boruak a siat ruangah UN Security pawl November 21 ah meeting an rak nei ih, cumi ahcun US in N.Korea hrem dan ding an aupi. N.Korea in duhduh in ralthuam an hman lonak dingah UN member zaten lungrual dingin US cun thu an rak bur. Cucu, N.Korea in an theihsal tikah an thinheng tukih US an hro bet.
N.Korea president ih Kim Jong Un ih nau Kim Yo Jong cun “Nan duhtawk in ralthuam kan neih thei lo dan ding cu rel ko uh,a poi lo. Kannih N.Koreqa cun kan ram humhimnak ding le kan himnak dingah theitawk kan suah vivo ding. Cucu, American in rak thei haiseh. N.Korea dokalh lampang zawngih nan cangvai asile siatnak rapthlak nan tuar men ding. Curuangah,US khal ralrin deuhdeuh dingin le thaten kilhim aw dingin kan theihter duh a si,” tin US thu a cah.
KOrea ram buainak ah US, UK, France, Australia le Japan pawl cun S.Korea an dinpi ih, Russia, China le Iran pawl cun N.Korea an dinpi ve.
Ukraine Ih Nuclear Cetzung A Puak Thei – Europe ih Nuclear cetzung tambik an timi Ukraine Nuclear cetzung cu 2022, March thla ah Russia ralkap pawlin an rak la ih, tuini tiang Ukraine Nuclear cetzungpi cu Russia ralkap pawlin an umcilh.
Ukraine lam cun Nuclear cetzungpi neihsal tumin nasaten an zuam ve. Nuclear cetzungpi kiangah ralthuampi a tla puak ringring ih,a kaptu an puh aw.
Russia cun “Ukraine lamin Nuclear cetzungpi neihsal an duh tuk ruangah Nuclear cetzung ih um Russia ralkap pawl cu ralthuampi in an kap theu. Tuithla sung khalah ralthuampi in Nuclear cetzungpi an kap bet rero lai. Hivekin Ukraine in ralthuampi thawn Nuclear cetzungpi an kap bet rero asile Nuclear cetzungpi a puak thei a si,” tin Russia cun thu an suah.
UKraine lam cun NUclear cetzungpi kan kap lo tin an rak pha ve ih, Russia in leitlun ih hminthat le mithmai tha ngah an duh ruangah a phunphun’n in puh men tiah an sim ve.
2022, November 20 khalah Ukraine ih cetzungpi kiang a puak durdo ih, mi tampi cun Nuclear cetzungpi a kangkai ding an phang zet man. Ukraine ih Nuclear cetzungpi cu Europe ram sungih Nuclear cetzung tumbik a si ruangah a puak asile siatnak tampi a thlen thei tin mithiam pawl cun an sim.
Russia le Ukraine doawknak cu thla 9 sung an do aw zo ih, tukhal ah remnak nei thei hrih lo in an do aw peh rero lai. Khawpi lamah Russia in hmunram suahsanmi an nei nan, Donbas ramthen sung lamah doawknak a sosang. Donbas ramthen cu Russia ramri tluan a si ih, Donbas ramthen sungin hmunram 4 cu Russia in kan ram tin an rak phuang zo.
Tu ah Nato pawlkom UK le US cun theitawk in UKraine an bawm rero ih, doawknak a um peh vivo hrih dingin a lang. Ukraine lamin ralthuam le sumpai hmangin bawmtu an neih sung cu Russia ralkap pawl do vivo an tum ih, doawknak cawl lo dingin ralthuam le sumpai bawmtu an nei ringring thei. Russia cun Ukraine ram suahsan tumnak an nei hrih lo ih, Donbas ramthen sungin hmunram lakbet vivo an tum in a lang.
Leave a Reply