Russia Ah Duhphorhnak An Nei

Russia Ah Duhphorhnak An Nei – Russia president Putin cun ralkap taktak silo zirnak nei rero lai pawl khal Ukraine ah kan kuat ding tin September 21 ah thu a rak suah ih, cumi lungawi lo ruangah mino tampi Russia khawpi Moscow ah duhphorhnak an nei.

Putin ah Ukraine ah Russia ralkap lakin ralkap ih lakfel hrih lomi thelhbawh ralkap ting 3 hrawng kuat dingin thu a suah. Cucu, mipi in an pompi thei lo. Hivek ruangah Russia mipi 1300 hrawng an pungkhawm ih Putin thusuak duhlonak an langter. Cuveten Russia ralkap pawlin mipi umkhawm cu ralthuam hmangin an thekdarh hnuah an kai.

Russia cun tui kum sungah ralkap ting 1 tlun laksak an tumih, ralkap an lak bet ding thu khal an suah zo. Hivek ruangah Russia mino tampi cu Russia ah um paih loin an tlan rero. Ahleice in Dubai lamih tlan an tam ngaingai ih, Vanzam ticket pawl khal an lei thluh zo tin thu a suak.

Russia in 2022, February 24 in Ukraine a rak do zo ih, tuini tiang a tum bangin a fehpi thei hrih lo. Ukraine khawpi lam ahcun Russia ralkap pawl dung an sip rero ih, Ukraine ralkap pawlin hmunram an luah bet rero. Hivek dinhmun ah lungruh Putin cun Ukraine lamah ralkap kuat bet ciamco a duh ih, tu ahcun Russia mipi thawn an duhdan a bangaw thei nawn lo ruangah an buai vutvo.

Shan Ralkap Veve An Kap Aw – Shan ramkulh Citi’ myone Maiye uksuh sungah Shan ralkap RCSS le SSPP an kap aw tin SSPP lam cun thu an suah. Tuitum an doawknak san ih an relmi cu RCSS lamin SSPP umnak an va luhcilh ruangah doaw kan si tin SSPP lam cun an thusuah ahcun an tarlang.

SSPP cun “September 21 zinglam ah RCSS mipum 20 hrawng cun kan umnak lam in ra panih, kan kap aw. Zinglam nazi 7:30 in nazi 7:48 tiang kan kap aw. Cumi hnu ahcun RCSS lam sung an supsal ih, kan boruak a dai hrih. September 17 le 20 ah Kannih SSPP le ralhrang ralkap pawl cu Moemik lamah kan do aw ih, kan karlak boruak a sosang. Hivek dinhmun ah RCSS lamin in ra kapmi a si,” tin thu an suah.

Shan miphun pakhat cun “Kannih Shan khal lungrual um thei hrih hlah. Kan ramkulh sungah ralthuamkai an tam tukih mah le mah do aw tivek cu a um deuh ringring. Kanmah Shan dinhmun ahcun ralkap pahnih kan nei ah a cang. SSPP le RCSS an si ih, RCSS sawn hi ralhrang thawn remawknak nei in NCA hminkhen ngan an si. SSPP cu NCA hminkhen an ngan lo nan, tuitum ah ralhrang hotu Min Aung Hlaing an tong lala fawn, ziangsi an duhsan khal kan thei lo.

“RCSS cu NCA hminkhen an si bangin ralhrang an tong ih, an bia. Umdan cu RCSS lamin ralhrang thawn remnak le hamthatnak an beisei in a lang. SSPP lam khal NCA hminkhen an ngan lo ti ih rel ciamco ding khal an si cuang lo,tuitum ah ralhrang hotu Min Aung Hlaing an tong rero ve. Kannih mipi cu lailak ah harsa tuar in kan ummen. Ralhrang thawn doawk tlunah mah le mah an do aw vivo ih, mipi hrang a harsa tuk a si,” tin a sim.

Ralhrang Sualnak Haileng Dingin One Million An Pe – Ralhrang ralkap in duhtawkin mipi an thahmi le miphun cimit tumnak sual an tuahmi buaipi rerotu UN zingzoitu pawlkom le Myanmar lam zingzoitu pawlkom IIMM hnenah US Embassy cun dollar One Million an pek thu September 21 ah thu an suah.

Ralhrang ralkap in duhtawk in Rakhine mipi an thahnak , Rohingya an thahnak le ram buai ruangih Myanmar mipi an thahnak pawl cu leitlun thuthennak sangbik ICJ Court le ICC Court ah thubuai tawlrel sak rero an si. Himi ah buaipitu pawl cun ralhrang cangvaih dan zingzoi dingin tumsami tampi an nei ve.

Khatlam ahcun ralhrang ruangih a tuartu innsang pawl khal bom tul tuk an si ih. US Embassy cun zingzoitu pawl siseh a tuartu pawl hrang a tangkai thei bikih hman a si theinak dingah bomnak pe kan si tin an tarlang.

ICJ ahcun ralhrang pawlin Rohingya an thah ciamco ruangah miphun pakhat cimit tum sualnak hmangin thubuai tuahsak zo an si ih, Court lamin thu felfai an tuah thei hrih lo. ICC Court ahcun thubuai thehlut dingin buaipi rero fang a si ih, leitlun daan umcia ruangah tutiang ICC Court lamin ralhrang heknak an pom hrih lo nan, ICC in ralhrang heknak pom thei dingin tuanvo neitu pawl cun theitawk an suah peh rero hrih.