Russia An Buai Sinsin

Russia in thla 2 hrek sung Ukraine an do hnuah buainak a fel thei hrih lo ih, ram pahnih cu Ukraine nisuahnak lamah an do aw rero hrih.

Hivek dinhmun ah Finland le Sweden cun NATO pawlkom ih luh an tum thu an rak ausuahpi ve ih, Russia cu buainak cihnih dangin a burh bet. Russia cun Sweden le Finland cu NATO pawlkom ah lut lo dingin ralrinnak an rak pe ciami a si. Ralrinnak pekmi an si cingin Sweden le Finland cun Nato pawlkom ih luh an hril thotho.

Tu ah NATO pawlkom sungin Turkey cun Finand le Sweden cu NATO pawlkom sungih cohlan ding rem an tilo ih, buainak a karh sinsin men ding tin an sim. NATO pawlkom ah duhduh in a luh theih lo ih, pawlkom sungtel pawl lungkimnak a tul ve. Finland le Sweden khal Nato pawlkom ah an lut fel hrih lo ih, lut dingin tanla men an si hrih.

Khatlam ah NATO ralkap pawl cu Russia ralkap pawl umhmun khuarnak kiangah raldonak zirnak an nei rero ih, pawlkom picang le Russia karlak boruak a se vivo thei in a lang. Russia in Ukraine a do reromi ah remnak a um thei lo ih, buainak dang suak bet vivo thei in thil a um zo sawn. Nato pawlkom ahcun Europe ram 28 tlunah US le Canada an telih,ram buainak ah khat le khat bawm aw dingin lungkimnak nei pawlkom an si.