Turkey in Finland le Sweden ram NATO pawlkom sungih an tel ding rem an tisak hnuah Russia lam an tongsuak ih, Finland le Sweden ah NATO ralthuam tuahnak le ralthuam retnak sak asile kan kap cih ding tin an theihter.
US ih hohami NATO pawlkom ah Europe ram 28 tlunah Canada le US khal an um ih, ral dinhmun ah khat le khat raldo bawm dingin lungkimnak nei an si. NATO pawlkom sungih lut dingin NATO member zate ih lungkimpinak a tul. Finland le Sweden ih dilnak khal a thokah NATO member sungtel Turkey in an rak dokalh lawk nan, tu ahcun Turkey in Nato pawlkom ih Finland le Sweden an luh ding rem an tisak zo.
Hivek a si tikah NATO member sungtel dangin Finland le Sweden an dokalh lo asile Finland le Sweden cu a takin Nato member an si thlang. Cucu Russia lamin an rak duh lo tukih, ralrinnak an pe cih.
Russia president Putin cun “A hlan ahcun buainak ciamco a um dingah kan ruat lo. Asinan, tu ahcun Sweden le Finland ah ralthuam retnak le tuahnak tivek an sak pang asile kan kap cih ding. Cucu, Sweden le Finland in a takin NATO pawlkom an lutfel asile a thleng thei ih, kan pehtlaihawknak a tha nawn lo ding a si,” tin a sim.
Sweden le Finland cun amahten Russia an doneh ding an zum lo ruangah anmah bawmtu nei dingin NATO pawlkom ih luh an dil phah ih, Ukraine ram ih thilton vek ton an tum lo. Ukraine khalin NATO pawlkom ih tel an dil rero nan, Russia thawn an buai zo laklawk ruangah NATO member zatein NATO pawlkom si dingin Ukraine an cohlang ngam loin a lang.
Leave a Reply