Russia In Nasa Ten Ukraine Nisuahnak An Do

Russia in thla 3 zik Ukraine an do hnuah Ukraine nisuahnak lam cu lak fel tumin nasa ten an do bet rero ih, vanzam , tank le bomb kahnak tiang an hmang.

Russia in thla 3 zik Ukraine a domi ah Mariupol khawpi lawng a la thei ih, Ukraine khawpi bik Kyiv khal an la thei lo. Cutikah Russia cun Ukraine an do dan an thlengih, zalennak an rak pekmi Ukraine nisuahnak lam cu nasa ten an do thok.

Russia in Ukraine an do hlanah Russia president Putin cun Ukraine nisuahnak lam Donbas sungin Donetsk le Luhansk cu zalennak a rak pe hmaisa. Tu ah, Russia cun zalennak an pekmi Donetsk le Luhansk cu Ukraine ramin thenfel sak an tumih, Donetsk le Lushansk ih um Ukraine ralkap pawl dawisuak thluh an tum.

Donetsk le Luhansk ahcun Russia miphun tamzet an um ih, Ukraine ralkap pawl doin zalennak rak sual rero cia an si. Russia in Ukraine a do hlan khalah Donetsk le Luhansk ih um Russia dinpitu pawl cu Russia in thupten ralthuam a rak pe thup rero zo.

Ukraine president Zalenskyi cun “Luhansk le Donetsk cu hellram vek a si thlang. Meisa hlir in a khat ih, Russia ralkap pawl cun mipi umnak innpi pawl khal duhduh in an kap. Russia ralkap pawl cun Luhansk le Donetsk ih um Ukraine miphun pawl thah cimit thluh an tum siko,” tin leitlun a simthei.

Ram pahnih buainak ah Ukraine cu an ram le miphun humhimtu an si ih, Ukraine ram sungah an do aw. Russia cu midang ram sungih lut an si. Curuangah, a tuartu cu Ukraine mipi , Ukraine ram le thilri pawl an si. Russia in an tuar ve nan, Ukraine an do ruangah leitlun in a phunphun in Russia an rak hrem rero ve. Doawknak ahcun khatlam khatlam in ralkap thi an tam zo ih, ralkap thizat an phuanmi lawngte ram pahnih thusuak a bangaw thei lo.

Be the first to comment

Leave a Reply

Your email address will not be published.


*