Russia In Ukraine An Do Caan Thla 4 A Kim Fel

Russia cun 2022, February 24 in Ukraine a rak do thok ih,tuini June 24 ahcun Russia in Ukraine a do caan thla 4 a kim cekci.

A thok ahcun Russia in Ukraine rampum in thuahfai a rak tumih, Ukraine khawpibik Kyiv lam tiang an rak pan nan, an tum vekin thil a feh lo ruangah Russia ralkap pawl dung an sipsal. Cumi hnu ahcun Russia in anmai ramri Ukraine nisuahnak lam Donbas ramthen sung lawng nasa ten a do ih, tuini tiang Donbas ramthen sungah Russia ralkap le Ukraine ralkap pawl an do aw.

Ram pahnih doawknak caan thla 4 a kim cekci nan, ram pahnih remawknak zianghman an nei thei hrih lo ih, an do aw peh hrih. Ram pahnih doawkak ah a takin ramdang tel zohman an um hrih lo. US le ram hrekkhat pawl cun Ukraine cu ralthuam le sumpai in an bawm rero hrih.

Ukraine cun anmai ralthuam men cun Russia an do thei lo thu leitlun theih ah an ausuahpi ih, an hnenah ralthuam thatha bawmnak pe dingin leitlun an rak dil. Russia cu ralthuam le ralkap ah an buai lemlo ih, Ukraine ram luhcilhtu an si. Cucu, Ukraine ralkap pawlin theitawk in an ram sungah an rak do rero ve.

Russia in thla 4 sung Ukraine an donak ah Mariupol khawpi an lak hmaisa bikih, cumi hnu ahcun Donbas ramthen sungin Sievierodonetsk khal Russia ralkap pawlin an luah thluh zo. Lysychansk khal Russia ralkap pawlin reilote hnuah kan la thei ding tin an sim.

Russia in ziang ciah an tumtah timi theih a har ih, leitlun an simtheih dan le an cangvaih dan khal a bang aw lo. Putin cun Ukraine ram thuahfai men kan tumih, thianfainak kan neih thluh le kan duhtawk ding, kan tum bangin thianfainak kan theh hlanhlo cu kan hna kan peh vivo ding tin a rak sim.

Ukraine president Zelensky cun ‘Russia in kan ram lak then an tumih, ramri nor an si. A thok ahcun Ukraine rampi huap an rak beisei ih, neta ahcun Donbas ramthen an beisei. Kannih cun kan ram hloh lo dingin theitawk kan rak do vivo ding. Donbas ramthen sungah ralpi vei hnak hmanin doawkak a sosang sawn a si,” tin leitlun a simthei.

Donbas ramthen sungin Luhansk le Donetsk cu Russia president Putin in Ukraine an do hlan ihsin zalennak a rak pe ciami an si ih, tuitum ah a takin zalenter an tum tikhal in thu a um. Ram pahnih remawknak an naih lo ih, Ukraine nisuahnak lamah nasa ten an do aw rero hrih a si.