Russia In Ukraine Hmunram 4 An Ram Ah An Phuang

Russia In Ukraine Ramthen 4 An Ram Ah An Phuang – Russia in thla 8 sung Ukraine an do hnuah Donbas ramthen sungih hmunram 4 pawl cu Russia ram a si zo tin Russia president Putin cun September 30 ah thu a suah.

Russia in Ukraine ram sungin an ram ih an phuanmi hmunram 4 pawl cu Donetsk, Luhansk , Kherson le Zaporzhzhia pawl an si. Donetsk, Luhansk , Kherson le Zaporzhzhia pawl ahcun Russia lamtang mipi a rak um cia ih, Russia in Ukraine an do hlan ihsin Ukraine ralkap rak do theutu an si. Russia in Ukraine an do hnuah Donetsk, Luhansk , Kherson le Zaporzhzhia ramthen pawl cu olsamten an la thei. Ziangahtile, mipi lakin Russia lamtang rak um cia.

Putin cun “Kan ram humhimnak hrang a tul asile ziangvek ralthuam khal kan hmang ding. Donetsk, Luhansk , Kherson le Zaporzhzhia pawl khal a sungih um mipi pawl duhdan vekin tu ihsin Russia ramsung ah lakluh an si ih, Russia ram ah ka phuang.

“US in leitlun pum hi anmai thuthu in ret an tumih, an bum theimi pawl cu US lamtang ah a tuah vivo. Zoh rero uhla US le NATO pawlkom cun hmunram an kauhnak ding a si ahcun mi pakhat thih khal poi an tilo. Ramri ih umzia khal an thei lo ih,Democracy hmangin leitlun bumkual vivo an tum. US cun an kuthnuai ih an ret thei lomi cu an ral ah an suah.

“Leitlun ih Nuclear hmang hmaisabik khal US an si ih, an dollar in leitlun an cawm thluh thei lo. American thuhnuai ih um duh pawl cu anmahten feh dan nei lo ram hlir an si. Kannih Russia cu US in ziangtik hmanah a kuthnuai ah in ret thei dah lo ding. Russia hi ram ropi kan si ih, kan ropi vivo ding a si,” tin Putin cun thu a suah.

Russia cun 2014 kum khalah Ukraine an rak do zo ih, Ukraine ram sungih Crimea an rak laksak zo. Tuitum ah Russia cun Ukraine hmunram 4 rori an laksak sal ih, Ukraine lam cun tha thlah loin Russia pawl an do peh vivo ding thu an sim ve.

Putin in Ukraine hmunram 4 , Russia ram ih an phuan thluh hnu reilo ah Ukraine president Zelenskyi cun “A rangthei bikin NATO pawlkom ih luh kan duh. UKraine hi kanmahten cun kan him lo a si,” tin thu a rak suah ve. NATO pawlkom ah Europe ram 28, US le Canada ram pawl an um ih,NATO pawlkom sungtel dingin NOTA pawlkom ih umcia zo pawl lungkimpi thluhnak a tul.

American President Biden cun “Ziangtik hmanah Ukraine hmun 4 hi Russia ramsung a si tin kan pom dah lo ding. Hivek ruangah Russia cu hremnak kan pe bet dingih, theitawkin Ukraine kan dinpi vivo ding a si,” tin a sim ve. UN lam cun “Putin hivekin thu a suah ruangah buainak a luai deuhdeuh dingih, remawk a har ding tlunah Mipi in an tuar sinsin ding a si,” tin an sim.

Hivek dinhmun ah US tlangsuak upa cun 12 billion in UKraine bom dingah lungkimnak an rak nei betih, Ukrane ram bom vivo an tum. Russia in Ukraine an do pek ihsin tuini tiang US cun Ukraine an bawm rero ih hmailam khalah bom vivo an tum hrih.

A tufang Ukraine ram sungih Russia ralkap pawl dinhmun cu Russia ralkap pawlin Ukraine khawpi lam an suahsan rero ih, Donbas ramthen sungah an finkhawm aw rero. Curuangah Ukraine ralkap pawlin khawpi lam hmun an luahsal rero nan, Donbas ramthen sung ahcun Russia ralkap pawlin hmunram an luah tam sawn ih, hmunram an luahmi lakin hmun 4 cu Russia ram ah an phuanmi a si.