Russia ralkap cun Ukraine ram, Donbas ramthen sungin Sieviero khawpi Lilawng bomb an puah siat ih, khawpi sungih um mipi pawl suak thei lo dingin an tuah.
Sievierodonetsk khawpi cu a tufang Russia ralkap pawl in nasa ten Ukraine ralkap pawl an donak hmunpi a si ih, Donbas ramthen sungin khawpi pakhat a si.
Ukraine president Zelenskyi khalin “Donbas ramthen sungah doawknak a sosang tukih, leitlun ralpi vei hnihnak hnakin rapthlak sawn doawknak a thleng. Doawknak ih um mipi pawl cu zangfah umza ngaingai an si ih, an tuar tuk zo. Hivek dinhmun khalah Russia cun Donbas ramthen sungah an ralkap thlah bet vivo an tum.
“Russia cun nauhak nunnak khal ziang an siar lo ih, ramsa thinlung puin an cangvai. Curuangah, leitlun in Russia ralkap pawl cangvaih dan thei uh, nan bomnak kan tul. Russia ralkap pawl do vivo thei dingin ralthuam khal kan tul tuk a si,” tin leitlun mipi a simthei.
Russia cun Sievierodonetsk khawpi sungin hmun tamsawn an la thluh zo nan, mipi 100 hrawng relhnak thirinn le Azot Chemical plant cu Ukraine ralkap pawl kutah a umlai ih,Ukraine ralkap lakah mipi le nauhak khal an um tel. Tuitum ih Russia ralkap pawl tisiatmi lilawn cu khawpi in hmundang pannak a si ih, mipi tlansuak thei lo dingin an tisiat hrim.
Ram pahnih thla 4 zik an do aw thlangih, ziang remnak hman an nei thei hrih lo. Doawknak ruangah Ukraine khawpi tampi a siat zo ih, mipi thih phah khal an tam. Russia ralkap thi le ralthuam an hlohmi a tam ve tuk nan, Ukraine ramsung ih doaw an si tikah Russia mipi cun doawknak ih siatnak an tuar ban ve lo.
Russia mipi ih tuarmi cu leitlun hremnak a si ih, an ram suahsan in an duhnak ram tinkim ah an feh thei nawn lo. Cumi tlunah an ram sumpai dinhmun khal nasa ten a tla. Ram pahnih an tuar dan a bangaw lo. Tukhalah remnak lam an naih cuang lo ih, Donbas ramthen lamah nasa ten an do aw hrih.
Leave a Reply