Russia ralkap pawlin an lak fel zomi Ukraine ram, Mariupol khawpi sung thir cetzung sungih kalhkhum aw Ukraine ralkap pawl cu reizet thir cetzung ih an um hnuah an harsa tuk thlangih Russia ralkap kutah an pe aw fel.
Russia ralkap kutih pe aw Ukraine ralkap 1730 lakah hrekkhat cu hriam ngah, damlo besia tivek an um ih, damlo sizung ih tuamhlawm tul pawl cu mibawmtu Red Cross pawlkom pawlin sizung ah an fehpi. Russia ralkap kutih pe aw Ukraine ralkap cazin zat khal Red Cross mibawmtu pawlkom ih thusuahmi a si.
Russia in thla 2 le hrek tluk Ukraine ram an do hnuah Mariupol khawpi cu an lak theimi umsun a sihrih ih, Mariupol khawpi sungin thir cetzung sungih relh Ukraine mipi pawl cu hmaisa in runsuah an si. Cumi hnuah Russia ralkap kutih pe aw Ukraine ralkap pawl khal runsuah an si.
Thir cetzung sung ahcun Ukraine ralkap pawl cu a thlatel in khum aw an si ih, eiin an tlaksam tlunah tidai in tiang an neih nawnlo ruangah pe an si. Ukraine ralkap pawl thir cetzung sungin an suah tikah an cau, an cawr ih, thazang an nei lo lawlaw tin rak tuamhlawmtu Red Cross pawlkom cun an tarlang.
Ukraine cozah cun Russia ralkap kutih pe aw Ukraine ralkap pawl cu an kaihmi Russia ralkap pawl thawn thlengawk an dil ih, khat le khat an be aw rero lai tin thu an rak suah ve. Russia in mariupol khawpi lawng cu felfai zetin an lak theimi a si ih, tu ah Ukraine nisuahnak lam Donbas ah an do aw rero hrih.
Ram pahnih buainak ruangah ramdang tamzet cun Russia palai pawl cu an ram sungih um siang nawn loin an dawisuak rero ih, cuvek thungrulnak ah Russia khalin an ram sungih ramdang palai pawl an dawisuak rero ve.
May 18 khalah Russia in France palai 34 pawl cu Russia ram ihsin suak dingin an theihter zo ih, zarh 2 lawng caan an pe. France khalin an ram sungih Russia palai 40 an rak dawisuak ve zo. Russia cun an ram sungih Spain palai 27 khal suak dingin thu an pe ih, Spain khalin an ram sungih Russia palai 27 an rak dawisuak ve zo. Russia cun an ram sungih Italy ram palai 24 khal suak dingin an theihter ih, Italay khalin an ram sungih Russia palai 24 an rak dawisuak zo.
Hivek dinhmun ah US tlangsuak upa pawl cun $40billion in Ukraine bawm dingah thurelcatnak an nei ih,theitawk in Ukraine bom vivo an tum. Russia in Ukraine a do hnuah US cun nasa ten Ukraine an bawm ih, hmailam khalah bawm vivo an tum hrih. Sumpai ih an bom tlunah ralthuam khal an kuat phah rero ih, ramdang bomnak ruangah Ukraine khal tuisun nitiang an ram an humhim thei hrih.
Leave a Reply