Russia Le Ralhrang In Meeting An Kaihruai Ding

Mindat Ahcun Mipi Rahrang Hlawknak Tender Ttuan An Siang – Ralhrang ralkap in rampi thuneihnak an lak hnuah mipi ralkap tamsawn cun zokhal ralhrang pekmi tender tuan lo dingin thu an rak suah ih, a tuan thotho pawl cu hremnak pekmi khal an nei.

Mindat ahcun mipi hrang hlawknak, mipi thansohnak le Mindat thansohnak hrangih tender ngahmi pawl cu nan tuan thei ding tin Mindat mipi uktu cun thusuah in mipi theihternak an nei.

Mindat Mipi uktu cun “Tender thuhla thawn pehpar aw in CDF Mindat le mipi uktu pawl thureltlangnak kan nei ih, mipi hrang hlawknak, mipi thansohnak le Mindat thansohnak hrang tender ngahmi pawl cu ttuanter si dingin lungkimnak kan nei a si,” tin thu an suah.

Chindwin Tiva Ah Ralhrang Lawng An Kap – Chindwin tiva ih feh ralhrang lawng cu july 19, sun nazi 2 hrawngah Kani PDF pawlin an rak kap ih, ralhrang thi le hriamhma ngah an um tin mipi an simthei.

Kani PDF thuphuangtu cun “Sun nazi 2 hrawngin Chindwin tiva ih feh ralhrang lawng pawl kan kap ih, zan nazi 6:40 tiang kan kap aw. Ralhrang lawng pawl cu hlaral kahnak Sniper in kan kap ih, cumi hnuah bomb zamthei khalin kan kap.

“Sniper ih kan kahmi ah ralhrang pakhat a thi rori kan hmu ih, bomb kan puahmi le ralthuampi thawn ralhrang lawng kan kahmi khalah ralhrang thi an um bet ding nan, a zat kan fiah thei lo.

“Ralhrang pawl cun July 18 ah Mungzua suahsan in Chindwin tiva tluanah an feh ih, lawng 13 ah mipum 100 hrawng an um. Chindwin tiva tluanih ralhrang sakhan pawl hrang eiin le ralthuam an phur si ding. Ralhrang lawng pawl cu July 18, zinglam nazi 5 hrawng khalah kan kap zo.

“Ni hmaisa sawn ih ralhrang lawng kan kahmi ah ralhrang lawng pil a um ih, ralthuam hrekkhat khal kan laksak thei. Neta ahcun ralhrang pawl cu Sagaing ramthen Khanti le Hungmalin ih ralhrang sakhan hrang ralthuam le eiin phur an si,” tin a sim.

Rakhine Ah Doawknak A Sosang Thei Tin Mipi An Theihter – Kum 2 sung kap aw lo ih an um hnuah Rakhine ralkap AA le ralhrang ralkap pawl cu July 18 zingah an kap aw ih, ralhrang thi an um tlunah AA cun ralhrang 14 an kai ih, ralthuam tampi khal an laksak thluh.

Hivek a thlen hnuah AA cun Rakhine mipi thucahnak an nei ih, Rakhine ah a hlan bangin doawknak a sosang thei, Curuangah mipi lam fimkhurten um hram uh tin an simthei.

AA thuphuangtu Khai Thukah cun “July 4 ah ralhrang pawl cun Karen ih kan sakhan pakhat bomb an thlakih, cumi ruangah kan ralkap 6 an rak thi. Kan sakhan pawl khal a siat phah zetih ,umnak hmun tampi hman tlak nawn lo an tam. Cumi ruangah ralhrang ralkap pawl thungrul in do kan si. Curuangah Rakhine ah doawknak a sosang sinsin thei ih, mipi cu fimkhur teih um dingin kan lo theihter duh a si,” tin a sim.

Ralhrang in rampi thuneihnak an lak hnuah AA le ralhrang pawl an kap aw hngal lo nan, Rakhine ramkulh sung le Chin ramkulh sung Paletwa lamah an hro aw rero ih, vei hnihkhat an rak kap aw phah. Asinan, kahawknak picang a suak lo.

July 18 zingih an kahawknak ahcun ralhrang thi 10 tlun an um tin kiangkap khua mipi cun an sim ih, ralhrang 14 nungdam ih kaih an si tlunah RPG 7, Pistol 2, meithal zun 12 le ralthuam dangdang pawl cu AA in ralhrang pawl hnenin an laksak thei tin an thusuah ahcun an tarlang tel.

Russia Le Ralhrang In Meeting An Kaihruai Ding – ASEAn le a rualpi pawl sungin humhimnak vuanci meeting an neih theumi cu July 20 le 21 ah an neisal tumih, tuitum ahcun meeting kaihruaitu ding cu Russia le ralhrang an si.

An thurel dingmi tlangpi cu dankalh pawlkom zialralter dan ding timi a si ih, ralhrang pawl cun anmah dotu PDF, CDF, NUG le CRPH pawl cu dankalh pawlkom an si tin thu an rak suah zo. Curuangah Russia le Ralhrang ih kaihruai dingmi meeting cu ram hrekkhat in an duh lo ih, tel lo dingin thu an rak suah zo.

Hivek cu tuikum lawngih an tuahmi siloin kum dang khalah an rak tuah rero zomi a si. ASEAN pawlkom sungtel le ramdang an tuanpi pawl thawn humhimnak lam thurel in meeting nei theu an si. ADMM Plus tin pawlkom hmin an pe aw ih, ADMM Plus ahcun ASEAN sungtel ram 10 tlunah Russia, American, Australia, New Zealand, China, Japan, S.Korea le India ram pawl an tel.

Ukraine ram dotu Russia le ralthuam rinsan ih thuneihnak latu ralhrang in meeting an kaihruai ding ruangah ADMM sungtel Australia le New Zealand cun meeting ah an tel lo ding thu felfai zetin thu an rak suah zo. Myanmar mipi dinpitu pawlkom tamzet khalin Russia le ralhrang kaihruai dingmi meeting ah tel lo dingin ramdang pawl an sawm rero ih, meeting an thok tikah ziang ram an tel timi pawl a fiang sinsin ding a si.

Ralhrang In Kum 6 Mi An Kap That – Shan ramkulh Maisoe myone Maikuang lamzin tluanih umhmun khuar ralhrang ralkap pawl cun Maisoe myone sungah duhtawk in meithal an kap ciamco ih, nauhak kum 6 mi le midang pahnih an kap that.

July 18, zan nazi 7 hrawngah Sai Thiha le a nupi Nan Sai Lu cun an fate kum 6 mi tlawngkai an hmuah hnuah khua lam pan in an tlungih lamzin tluanah ralhrang pawl cun an mawtaw an rak kap. Mawtaw sungah nauhak nute le a nu an thi cih ih, inntekpa cu sizung luhpi a sinan, zan nazi 11 hrawngah a thi ve.

Khuami pakhat cun “An fate cu Maisoe khawpi sungah tlawng an kaiter ih, an va hmuak theu. Maisoe in khua an tlunnak lamzin ah ralhrang pawlin an rak kap. Ralhrang pahnih cu fawm hruh loin cangvai an si ih, pabik an kah that ngah lo ruangah nam in an dawt betih, sizung ah a thi. Mawtaw sungih an thilri khal an laksak thluh a si,” tin a sim.

Thailand Mi Thah Thu Ah Myanmar Mi Pahnih – Thailand ram ih Thailand pa thah a si thu ah Myanmar hnatuan pahnih cu Thailand pa thattu ah puh an si ih, thubuai 3 orhter an si tin buaipitu pawl cun an sim.

Thailand palik pawl ih kaihmi Myanmar mi pahnih cu Khin Maung Zaw ( kum 36 ) le Zaw Myo ( kum 23 ) an si ih, anmah pahnih khal an phuang aw zo tin Thailand thuthang pawl cun an tarlang.

U Min Oo cun “Tuhrih tiang ahcun thubuai an tuahsakmi Myanmar mi pahnih khal kan hmu thei hrih lo ih, a nulepa’i hnen khalin dilnak kan dong hrih lo. Thailand lamin thu an suah ruangah theifang kan si ih, an thuhla famkim tla kan thei hrih lo. An nulepa lamin buaipi dingin in bia a si ahcun kan hrang buaipi a nuam sinsin ding,” tin a sim.

Thah tuar Thailand putar kum 81 cu Rabar hmuan neitu a si ih, a fa pahnih cu Thailand cozah hnatuan le sinak nei veve an si tin Bangkok post cun a tarlang.