Russia le Ukraine Doawknak Kum 1 A Kim

Russia Le Ukraine Doawknak Kum 1 A Kim – Russia cun 2022, February 24 ah Ukraine an rak kap thok ih, tutiang ram pahnih an doawk lai ruangah 2023, February 24 ah Russia le Ukraine buainak kum 1 a kim fel.

Russia cun Ukraine an kahnak san ah NATO sungtel si an tum, ramdang an tuanpi ih Russia siatnak ding an tawlrel. Urkaine hi kan ramri le a hlanah ram pakhat kan si ruangah annih NATO sungih an luh cun kannih Russia ram hrang a him lo. Cumi ruangah Ukraine cu NATO sungtel ah lut lo dingin kan sim rero nan, luh thotho an tum ruangah kap kan si t’n Ukraine an do pekah an rak sim.

NATO pawlkom sungih lut tum Ukraine sawn cu NATO sungtel zatein an pom thluh lo ruangah tutiang Nato sungtel ah an lut thei lo. NATO sungtel ah Ukraine an lut asile buainak a karh sinsin pang ding ti’n NATO sungtel thenkhat cun NATO member si dingah Urkaine an duh lo. Asinan, NATO pawlkom tlunah NATO sungtel pawl cun theitawk in Ukraine an bawm ringring thung.

NATO timi pawlkompi cu raldonak ah khat le khat kan bawm aw ding, kan ram humhimnak hrang kan tangtlang ding ti’n lungkimnak nei pawlkom an si ih NATO sungtel ah Europe ram 28, CANADA le USA Pawl an tel.

Russia in kum 1 sung Ukraine an kah tikah Ukraine ram, mipi le innpi pawlin an tuar nasa tukih Ukraine ram remtha sal ding cun ram pakhat le pawlkom pakhat men ih remthat a ngah nawn lo ding, leitlun huap tangtlang lawngin Ukraine kan remtha sal thei ding ti’n Ukraine president Zelensky cun a sim.

Kum 1 sung an doawk hnuah Russia cun Ukraine hmunram 4 an laksak zo nan, an duhtawk hrih lo ih Ukraine ram sungah umhmun an khuar peh lai. Ukraine lam khal an ram humhimnak hrang theitawk an suah ih, an ram hlohmi pawl lak kirsal an tum ve. Curuangah ram pahnih Ukraine ram sungah an do aw peh rero lai.

NATO sungtel siseh US khalin Ukraine an bawm peh ringring ih, Ukraine lamin Russia donak ralthuam le tulsammi sumpai an nei ringring phah. NATO le US in nasaten Ukraine an bawm bangin Russia khalin bawmtu a nei ve ih, Russia bawmtu pawl cu Iran, China le N.Korea pawl an si ti’n thu a suak.

February 22 khalah China ramdang palai le Russia President Putin tei pahnih cu Moscow khawpi ah an tongaw ih ram pahnih tuantlang peh dan ding an rel. Russia le Ukraine buainak hi kum 1 a kim fel nan,kap aw nawn lo dingin remawknak zianghman an neih thei lo ruangah an kap aw peh vivo hrih dingin a lang.

NUG Palik In PDF 5 An Kai – Sagaing ramthen Wetlet myone sungih cangvai Wetlet GZ Special Task Force sungtel 5 pawl cu mipi ralkap ( pah-khah-pah) hotu an kah ruangah UG palik in kan kai ih daan vekin an thu kan relsak ding ti’n thu an suah.

NUG palik cun “February 17 ,zinglam nazi 10 hrawngah Wetlet myone Satuangkyi khua ih mipi hrilmi khua hotu cu ralthuamkai pahnih in an kap. Ralthuamkai pahnih cu mipi hrilmi khua hotu cu vei 20 tluk an kap ih a bike khalah cerek kahnak a um hnenhnen. February 18 ahcun thilthleng thawn pehparaw in kannih Wetlet myone NUG palik hnenah heknak ca a thleng.

“Heknak ca kan don hnu cun kannih khalin a takin zingzoinak kan nei cih. Mit hmutu khua mipi pawlih sim dan vekin thilthleng thawn pehparawknak nei ih lang Wetlet GZ Special Task Force pawl cu thusutnak nei dingin kan ko. A thok ahcun kan silo ti’n in el ih an ra duh lo nan, neta ahcun thusuhnak nei dingin Wetlet GZ Special Task Force sungtel 18 pawl cu kan hnenah an thleng.

“Thusuhnak kan neih lai ahcun PDF le khua kilhimtu mipi ralkap pawlin in kil thepthep. Thusuhnak kan neih fel tikah Wetlet GZ Special Task Force sungtel lakin mi pahnih cun Pah-khah-pah hotu an rak kap ih, mi pahnih dangin an bom tlunah thupetu pakhat a rak um. Curuangah Wetlet GZ Special Task Force sungtel 5 pawl cu kan kol hrih.

“Thusuhnak kan neihmi Wetlet GZ Special Task Force sungtel dang 10 pawl cu Pah-khah-pah totu kaptu ih an tel lo tlunah dothlengnak ah theitawk suah rerotu an si ih thutiamnak kan neihter ih kan thlahsal. Thusuhnak kan neihmi Wrtlet GZ Special Task Force sungtel dang 4 pawl khal thlah bet kan tum hrih.

“Sualnak tuahtu Wetlet GZ Special Task Force sungtel pahnih, anmah bawmtu an sungtel dang pahnih le thupetu pakhat , an zaten mi 5 pawl cu kan kol hrih ih , daan vekin an tlun thu relcat sak a si ding. Thilthleng hi PDF khat le khat karlak buainak a silo ih PDF par khalah daan vekin lairelnak kan neihsakmi sawn a si,” ti’n thu an suah.

Wetlet GZ Special Task Force khalin an sungtel thenkhat NUG kuthnuai pawlin an kai ti’n thu an rak suah zo. Anmah Wetlet GZ Special Task Force sungtel pawl cu NUG kuthnuai ah lut loin mahte do ih ralhrang do rerotu dothlengnak pawlkom pakhat an si.

Wetlet ahhin buainak mipi ralkap lakah buainak dang khal a rak suak zo. 2022, August 31 khalah Boe Kyarkyi timi mipi ralkap ti aw ve cun mipi pawl sumpai a dil ringring ih NUG pah-khah-pah cun an rak kap. Cumi ahcun Boe Kyarkyi kuthnuai lakin mi pahnih an rak thi ih, 5 in hriamhma an rak ngah.

NUG cozah hin PDF, mipi palik le Pah-khah-pah ti’n mipi kilhimtu ding pawlkom an din. PDF pawl hi ralhrang dotu ding bik ah an dinmi a si ih SIAH khon tivek khal an siang lo. Mipi palik an dinmi cu daan vekin sualnak tuahtu pawl thurel caksaktu ding an si. Pah-khah-pah timi cu khua kilhimtu ralthuamkai an si.